Total coronavirus cases in Ethiopia, May 22, 2020

በኢትዮጵያ የኮሮና ቫይረስ የሁኔታ መግለጫ (ዓርብ ግንቦት 14 ቀን 2012 ዓ.ም.፤ በጤና ሚኒስቴር እና በኢትዮጵያ ሕብረተሰብ ጤና ኢንስቲትዩት የተዘጋጀ)

በኢትዮጵያ የተጠቂዎች ቁጥር 433 ደርሷል
በአዲስ አበባ የተጠቂዎች ቁጥር እየጨመረ ነው
በሐረሪ የመጀመሪያው የቫይረሱ የተገኘበት ሰው ሪፖርት ተደረገ

ኢዛ (ዓርብ ግንቦት ፲፬ ቀን ፳፻፲፪ ዓ.ም. May 22, 2020)፦ የጤና ሚኒስቴር ዛሬ ዓርብ ግንቦት 14 ቀን 2012 ዓ.ም. ቀትር ላይ በሰጠው ዕለታዊ መግለጫ በኢትዮጵያ የኮሮና ቫይረስ የተያዙ 30 አዳዲስ ሰዎች መገኘታቸውን ከገለጸ በኋላ ከአማራ ክልል አራት አዳዲስ ቫይረሱ የተገኘባቸው ሰዎች ሪፖርት በመደረጉ በዛሬው ዕለት 34 አዳዲስ የቫይረሱ ተጠቂዎች መገኘታቸውን አመልክቷል።

ማምሻውን ከአማራ ክልል አራት ተጨማሪ ሰዎች በቫይረሱ የተያዙ መገኘታቸውን ተከትሎም አጠቃላይ በአገሪቱ በቫይረሱ የተያዙ ሰዎች ቁጥር ወደ 433 ከፍ ሊል ችሏል።

ቀትር ላይ ከጤና ሚኒስቴር የወጣው መረጃ ከ30ዎቹ አዳዲስ የቫይረሱ ተጠቂዎች ውስጥ ዘጠኙ ብቻ የውጭ ጉዞ ታሪክ ያላቸው ሲሆኑ፤ 17ቱ ደግሞ በበሽታው ከተያዘ ሰው ጋር ግንኙነት የነበራቸው ኾነው ተገኝተዋል። ቀሪዎቹ አራቱ ደግሞ የውጭ ጉዞም ኮነ በሽታው ከተገኘበት ሰው ጋር ግንኙነት የሌላቸው ናቸው ተብሏል።

ይህም ወረርሽኙ በአብላጫው የተገኘው ምንም የጉዞ ታሪክ በሌላቸውና በበሽታው ከተያዘ ሰው ጋር ግንኙነት ያላቸው በቫይረሱ መያዛቸውን ያመለክታል።

በዛሬው ሪፖርት ከ30ዎቹ ውስጥ አሁንም አብዛኛዎቹ ወይም 18ቱ የተገኙት በአዲስ አበባ ነው። ሦስቱ ከአፋር፣ አራት ከኦሮሚያ፣ ሦስት ከትግራይ ክልልና ሁለት ከአማራ ክልል ነው።

ማምሻውን ከአማራ ክልል የተገኙትን አራት አዳዲስ ሰዎች ጨምሮ በአጠቃላይ ከአማራ ክልል በዛሬው ዕለት የተገኙት ተጠቂዎች ስድስት አድርሶታል።

በአጠቃላይ 34ቱ አዳዲስ የተገኙ የቫይረሱ ተጠቂዎች የተገኙት 3,656 የላቦራቶሪ ምርመራ ከተደረገ በኋላ ነው። ይህም እስካሁን በኢትዮጵያ የላቦራቶሪ ምርመራ የተደረገላቸውን ሰዎች 73,205 አድርሷል። አዲስ ያገገሙ አምስት ሰዎች የተገኙ በመኾኑም፤ ያገገሙ ሰዎች ቁጥር 128 መድረሱንም ለማወቅ ተችሏል።

በአሁኑ ወቅት የቫይረሱ ሥርጭት ሁሉንም የአገሪቱ ክፍል እያዳረሰ ሲሆን፤ ትናንትም በሐረሪ ክልል የመጀመሪያው የቫይረሱ ተጠቂ መገኘቱን መዘገባችን አይዘነጋም

አሁንም ከሌሎች ክልሎች በበለጠ ወረርሽኙ የከፋው አዲስ አበባ ላይ ሲሆን፤ ከአንድ ቀን ቀደም ብሎ ከጠቅላላው የቫይረሱ ተጠቂዎች ከ63 በመቶ በላይ የሚኾኑት ከአዲስ አበባ የተገኙ ናቸው።

በዛሬው ሪፖርትም ከ34ቱ ውስጥ ወደ ግማሽ የሚጠጉት (18ቱ) ከአዲስ አበባ መኾናቸው አሁንም ችግሩ በመዲናዋ ውስጥ የከፋ መኾኑን አሳይቷል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!