Ethiopian Broadcasting Authority

የኢትዮጵያ ብሮድካስት ባለሥልጣን

ቢቢሲና ጀርመን ድምፅ አማርኛ፣ አልጀዚራ፣ ሮይተርስና ዊልያም ዳቪሰንን በሚመለከት ማብራሪያ ተሰጥቷል

ኢዛ (ሰኞ ኅዳር ፲፬ ቀን ፳፻፲፫ ዓ.ም. November 23, 2020)፦ የኢትዮጵያ ብሮድካስት ባለሥልጣን በቅርቡ በውጭ ሚዲያዎችና ዘጋቢዎች ላይ የወሰዳቸውን እርምጃዎች በዝርዝር የሚያመላክት መግለጫ አወጣ።

ዛሬ ሰኞ ኅዳር 14 ቀን 2013 ዓ.ም. ባለሥልጣኑ ባወጣው መግለጫ፤ በሚዲያዎቹና በዘጋቢዎቹ ላይ እርምጃ የወሰደበት ዋነኛ ምክንያት፤ የሚያሰራጯቸው መረጃዎች ዓለም አቀፍ የጋዜጠኝነት መርኆችን ያላገናዘቡ እና የግል አቋም የመያዝ አዝማሚያ የሚታይባቸው በመኾናቸው” እንደኾነ በመጥቀስ፤ ሚዛናዊነት ያለመጠበና ሌሎች ሙያዊ ግድፈቶች የታየባቸው በመኾኑ ነው ሲል አስረድቷል።

ከሕግ ማስከበር ሒደት ይልቅ፤ የእርስ በእርስ ጦርነት አንድምታ ላይ ማተኮርና የችግሩን ስፋት መለጠጥ ከብዙ ግድፈቶች በጥቂቱ የሚጠቀሱ ናቸው ብሏል።

ባለፈው ሳምንት በመንግሥት ከተወሰኑ ውሳኔዎች ውስጥ በትግራይ ክልል ሕግ ከማስከበር ሥራ ጋር በተያያዘ የተዛባ መረጃ ሲሰጡ ቆይተዋል በተባሉ የውጭ መገናኛ ብዙኀን ወኪሎች እና ጣቢያዎች ላይ እርምጃ መውሰዱ አይዘነጋም።

በመንግሥት ውሳኔ መሠረት በምሥራቅ አፍሪካ “የኢንተርናሽናል ክራይስስ” ግሩፕ ከፍተኛ ተንታኝ ኾኖ ሲሠራ የቆየው እንግሊዛዊው ዊልያም ዴቪሰን የሥራ ፈቃዱ እንደተሰረዘና ከአገር እንዲወጣ መደረጉ ተዘግቧል። “ከተመደበበት የሥራ ኃላፊነት ውጭ በኾነ ተግባር ሲንቀሳቀስ ነበር” በሚል ቅሬታ አቅርቦበት ነበር የተባለው ዊልያም፤ ከዚህ ቀደም በኢትዮጵያ የብሉምበርግና የቢቢሲ ወኪል ኾኖ ሲሠራ የነበረና በተለይም ከቀድሞዎቹ የሕወሓት ባለሥልጣናት ጋር ከፍተኛ ቅርበት እንደነበረው ተጠቁሟል። የኢትዮጵያ ብሮድካስት ባለሥልጣን በዛሬው መግለጫው ዊልያም ከሦስት ዓመት በፊት የሥራ ፈቃዱን በገዛ ፈቃዱ መመለሱን ገልጿል። ከዚህም ሌላ የሮይተርስ ወኪል የኾነችው ጁሊያ ፓራቪሲንም የሥራ ፈቃዷ ተሰርዟል። ለቢቢሲና ለጀርመን ሬዲዮም ማስጠንቀቂያ ተሰጥቷል።

በዚህ በዛሬው የባለሥልጣኑ መግለጫ፤ እርምጃ በወሰዳበቸው ሮይተርስ፣ አልጀዚራ፣ ዶቼቬሌ አማርኛ፣ ቢቢሲ አማርኛ ሚዲያዎች፤ እንዲሁም በዊልያም ዳቪሰን ላይ እርምጃው እንዲወሰድባቸው የተደረገበትን ምክንያት በዝርዝር ያቀረበበት ነው። የመግለጫው ሙሉ ቃል የሚከተለው ነው። (ኢዛ)

የኢትዮጵያ ብሮድካስት ባለሥልጣን

ለሚመለከተው ሁሉ፦

የኢትዮጵያ ብሮድካስት ባለሥልጣን ጥራቱ የተጠበቀ፣ በኃላፊነት ስሜት የሚንቀሳቀስ እና ነፃነቱ የተረጋገጠ አስተማማኝ የመገናኛ ብዙኀን የመገንባት እና የመቆጣጠር ዓላማን ይዞ የተቋቋመ አካል ነው።

የውጭ ሚዲያንም በተመለከተ የዘገባ ፈቃድና ዕውቅና ከመስጠት ባለፈ ከዘገባዎቻቸው በመነሳት የአዝማሚያ ትንተና (trend analysis) በመሥራት ዘገባዎቻቸው እውነትን መሠረት ያደረጉ እንዲኾኑ፤ ሚዛናዊና ታአማኒነት ያላቸው ብሎም ሙያዊ ሥነ ምግባር የተላበሱ እንዲኾኑ ለማድረግ የሚረዳ ግብረ መልስ ይሰጣል፤ የእርምት እርምጃ ይወስዳል።ይህ ሙከራምመሻሻሎችን ለማየት አስችሏል።

ይሁንና የተሰጣቸውን ሙያዊ አስተያየት ችላ በማለት የተሳሳቱ ወይም ሚዛናዊነት የጎደላቸው ዘገባዎችን በመሥራት የቀጠሉ አንዳንድ የውጭ የመገናኛ ብዙኀን አልጠፉም። ለምሳሌ ሮይተርስ፤ ቢቢሲ (አማርኛና እንግሊዝኛ ፕሮግራሞች)፤ የጀርመን ድምፅ የአማርኛ ፕሮግራም፤ እና አልጀዚራ (እንግሊዝኛ) ተጠቃሽ ናቸው።

እነኚህ ሚዲያዎች በአገራችን ሕጋዊ ፈቃድ የሌላቸው እንደ አዲስ ስታንዳርድ ያሉ ድረ-ገጾች እንዲሁም የጋዜጠኝነት ዕውቅናና ፈቃድ የሌላቸው እንደ ዊሊያም ዴቪሰን (William Davison) ያሉ ራሳቸውን የኢትዮጵያ ጉዳይ ተንታኝ አድርገው ያስቀመጡ ግለሰቦች በቅርቡ የፌዴራል መንግሥትና የአገር መከላከያ ሠራዊት በሕወሓት ጁንታ ላይ ሕግን ለማስከበር እየወሰደ ያለውን እርምጃ አስመልክቶ ከሐቅ የራቁ መረጃዎችን የማሰራጨት፤ የኢትዮጵያ መንግሥትን አስተያየት ያለማካተት እና ውጊያው የእርስ በእርስ ጦርነት እንደኾነ አስመስሎ የማቅረብ፤ እንዲሁም እየተወሰደ ያለውን እርምጃ ከክቡር ጠ/ሚኒስትር ዶ/ር ዐቢይ አሕመድ የሰላም ኖቤል ሽልማት አሸናፊነት ጋር በማያያዝ፤ ፌዴራል መንግሥቱ ተገዶ የገባበት ሳይኾን ችግሩን በሰላምና በድርድር የመፍታት ፈቃደኝነት የጎደለው በማስመሰል፤ እንዲሁም ሊፈጠር የሚችለውን ሰብአዊ ቀውስ በተጋነነ መልኩ በመሳል ዓለም አቀፉ ማኅበረሰብ ኢትዮጵያ ላይ ጫና እንዲፈጠር የማድረግ አዝማሚያ አስተውለናል።

ስለኾነም የኢትዮጵያ ብሮድካስት ባለሥልጣን እየወሰደ ያለውን ማስተካያዎች እንደሚከተለው ይገልጻል።

ሮይተርስ

ሮይተርስ ፈቃዱ ተሰርዞ ከኢትዮጵያ እንደተባረረ በተለያዩ ሚዲያዎች የተገለጸው ስህተት ነው። እውነታው በኢትዮጵያ የሮይተርስ ቋሚ የዜና ወኪል የኾኑት ጋዜጠኛ Giulia Paravicini ተቋማቸው የሠራውን ሚዛናዊነት የጎደለው ዘገባ አስመልክቶ ከተለያዩ ከፍተኛ የመንግሥት የሥራ ኃላፊዎች ጋር በተደረገው ውይይት ወቅት ባሳዩት የመታረም ፈቃደኝነት ጉድለት እና ያልገባ ባሕርይ፤ ብሎም የአገሪቱን ሕግ አክብረው ለመንቀሳቀስ ፍቃደኛ ባለመኾናቸው የድርጅታቸው የምሥራቅ አፍሪካ ቢሮ ጋር በተደረገ ውይይት በ Giulia Paravicini ምትክ ሮይተርስ ሌላ ቋሚ የዜና ወኪል እንዲመድብ ጥያቄ ቀርቧል።

በምሳሌ ለማሳየት ያህል፡- Nov.08/2020 “Ethiopia’s PM seeks to regain control over restive Tigray region” በሚል ርዕስ ሮይተርስ ባወጣው ዘገባ፤ ግጭቱ ወደ እርስ በእርስ ጦርነት ሊለወጥ እንደሚችል እና የብሔር መልክ የመያዝ እድል እንዳለው ጠቅሶ፤ እንዲሁም የኢትዮጵያ መከላከያ ሠራዊት በየብሔር ተከፋፍሎ የመበተን ከፍተኛ አደጋ እንደተደቀነበትና ምልክቶችም እየታዩ እንደኾነ ይጠቅሳል። ኾኖም በጋዜጠኛ Giulia Paravicini በኩል የመንግሥትን አስተያየት ለማካተትም ይሁን ከገለልተኛ ወገን ለማጣራት ሙከራ አልተደረገም።

William Davison

William Davison የጋዜጠኝነት ዕውቅናና ፈቃድ የሌለው፤ እንዲሁም በራሱ የኢትዮጵያ ጉዳይ ተንታኝ እንደኾነ አድርጎ ያስቀመጠ ግለሰብ ነው። ኾኖም ለበርካታ ዓመታት በኢትዮጵያ የBloomberg ሚዲያ ቋሚ የዜና ወኪል ኾኖ የሠራ ቢኾንም ከባለፉት ሦስት (3) ዓመታት ወዲህ ግን የዘገባ ፍቃዱን በራሱ ተነሳሽነት መልሶ የተሰናበተ መኾኑን እያረጋገጥን፤ በተለያዩ የሚዲያ አውታሮች በጋዜጠኝነት ሥራው ምክንያት ከአገር እንደተባረረ ተደርጎ የሚሰራጨው መረጃ ፍጹም ሐሰት መኾኑን ማረጋገጥ እንወዳለን።

አልጀዚራ (English)

አልጀዚራን በተመለከተ በEnglish ዘገባዎች ውስጥ በኢትዮጵያ መንግሥት ወገን ያለን ምልከታ ሳያካትት በሕወሓት ጁንታ ላይ የሚደረገውን የሕግ ማስከበር ሒደት በአንድ አገር ብቻ የማያበቃ፤ ነገር ግን መላ የአፍሪካ ቀንድን ሊያዳርስ የሚችል ጦርነት አድርጎ በመዘገብና በድርድር ጥያቄ ዙሪያ መንግሥት እምቢተኛ መኾኑን በማጉላት በአገሪቱ ላይ የዓለም አቀፍ አሉታዊ ተጽዕኖ እንዲበረታ ሊያደርጉ የሚችሉ ኃላፊነት የጎላቸው ዘገባዎች ይታያሉ። ይህም በዋናነት Doha በሚገኘው የአልጀዚራ ዋና ማሰራጫ የእንግሊዝኛ ስርጭት ክፍሉ የሚታይ ግድፈት መኾኑን በመረዳት በቀጣይ የማስተካከያ እርምጃ እንዲወስዱ ሪፖርት ተደርጎላቸዋል።

DW አማርኛ

ለማሳያ ያህል፡-

“የተባበሩት መንግሥታት ድርጅት ዋና ጸሐፊ አንቶኒዮ ጉቴሬዝ በኢትዮጵያ ትግራይ ክልል የተቀሰቀሰው ግጭት እንዳሳሰባቸው ገለጹ። ውጥረቱን ለማርገብ እና ውዝግቡን በሰላማዊ መንገድ ለመፍታት አፋጣኝ እርምጃ ሊወሰድ እንደሚገባ ዋና ጸሐፊው አሳስበዋል።” በሚል ኖቬምበር 5/2020 ባሰራጨው ዘገባ፤ በትክክል የተባበሩት መንግሥታት ድርጅት ዋና ጸሐፊ አንቶኒዮ ጉቴሬዝ ቃል መኾን ያለመኾኑን ማረጋገጥ በማያስችል መልኩ የቀረበ ከመኾኑም ባሻገር፤ የሕግ የበላይነትን ማስከበር ሳይኾን የእርስ በእርስ ግጭት እንደኾነ የሚያስመስል ዘገባ በመኾኑ ሊታረም የሚገባ መኾኑን ጀርመን ቦን ለሚገኙ ኃላፊዎች ተገልጾላቸዋል።

ቢቢሲ በአማርኛ

ቢቢሲም በአማርኛው ዘገባ ላይ ሰኞ ኅዳር 07/2013 ዓ.ም.፤ “ዛሬ ረፋዱ ላይ በትግራይ ክልል ርዕሰ ከተማ መቀሌ ውስጥ የአየር ጥቃት መፈጸሙን የከተማዋ ነዋሪዎችና የቢቢሲ ዘጋቢ ከስፍራው ገለጹ” በማለት ዘግቦ ሲያበቃ፤ በሁለተኛው ቀን ቀደም ሲል ያስተላለፈው ዘገባ የስህተት መረጃ መኾኑን ባግባቡ ሳይገልጽ፤ በሌላ ዘገባ “የአስቸኳይ ጊዜ መረጃ ማዕከል ዛሬ ማክሰኞ ባወጣው መግለጫ ጥቃቱ ከመቀሌ ከተማ ውጪ ባሉ በተመረጡ ሕወሓትን ዒላማ ያደረጉ መኾናቸውን ገልጿል” በማለት አሻሽሏል። በሁለቱ ዘገባዎች መኻል የሚታየው ልዩነት በትልቅ ኃላፊነትና ጥንቃቄ ሊሰራጭ የሚገባውና በአገር ሰላም ዙሪያ ከፍተኛ አንድምታ ያለው ጉዳይ ላይ የሐሰት መረጃን በማን አለብኝነት ማስተላለፍ የውጪ ሚዲያዎች ልምድ እየሆነ መጥቷል። ይህም አገሪቱን በውጪው ዓለም ዘንድ ትክክል ያልኾነ የነበራዊ ሁኔታ ምስል እንዲኖር ስለሚያደርግ፤ አገሪቱ በጥንቃቄ ልትይዘው የሚገባ ጉዳይ ነው። በዚህም መሰረት ቢቢሲ አማርኛ በአፋጣኝ ማስተካከያ እንዲያደርግ ሪፖርት ተደርጎለታል።

እንደ ማጠቃለያም ከላይ የተጠቀሱት ዘጋቢዎች የሚያሰራጯቸው መረጃዎች ዓለም አቀፍ የጋዜጠኝነት መርኆችን ያላገናዘቡ እና የግል አቋም የመያዝ አዝማሚያ የሚታይባቸው ናቸው። በሁሉም በመገናኛ ብዙኀኑ በተመሳሳይ ሁኔታ የሚታዩ ግድፈቶች፡-

- ሚዛናዊነትን አለመጠበቅ
- እውነትኝነትን መርኅ ያላደረጉ ዘገባዎች
- በርዕሰ-አንቀጾቻቸው ላይ ግነትን መጨመር
- የመንግሥት አስተያየትን አለማካተት
- ሙያዊ ሥነ ምግባር ያለመላበስ
- ከሕግ ማስከበር ሒደት ይልቅ የእርስ በእርስ ጦርነት አንድምታ ላይ ማተኮርና የችግሩን ስፋት መለጠጥ ከብዙ ግድፈቶች ጥቂቶቹ ናቸው።

የኢትዮጵያ ብሮድካስት ባለሥልጣን
አዲስ አበባ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!