L. Gen. Tsadkan Gebretensae

የአንበሳ ኢንተርናሽናል ባንክ የቦርድ ሊቀመንበር ሌተናል ጄኔራል ጻድቃን ገብረትንሣይ

ጄኔራሉን የሚተካ አዲስ የቦርድ ሊቀመንበር ይመረጣል ተብሏል

ኢዛ (ማክሰኞ ታኅሣሥ ፳ ቀን ፳፻፲፫ ዓ.ም. December 29, 2020)፦ አንበሳ ኢንተርናሽናል ባንክ የቦርድ ሊቀመንበር ሌተናል ጄኔራል ጻድቃን ገብረትንሣይ በሌሉበት ጠቅላላ ጉባዔውን አካሔደ።

ባንኩ የ2012 የበጀት ዓመት ጠቅላላ ጉባዔውን ባለፈው ቅዳሜ ሲያካሒድ ለጠቅላላ ጉባዔው ሪፖርት ማቅረብ የነበረባቸው የባንኩ ቦርድ ሰብሳቢ ሌተናል ጄኔራል ጻድቃን ገብረትንሣይ ሊገኙ ባለመቻላቸው በሌላ የቦርድ አባል ሪፖርቱ ሊቀርብ ችሏል።

ሌ/ጄኔራል ጻድቃን በዕለቱ ያልተገኙበት ምክንያት በጠቅላላ ጉባዔው ላይ ባይገለጽም፤ መንግሥት ከሕወሓት ጁንታ ቡድን ጋር በተያያዘ በአገር ክህደት የእስር ማዘዣ ከወጣባቸው የቀድሞ የጦር መኮንኖች መካከል አንዱ በመኾናቸው ሊገኙ አለመቻላቸው ግን ይታወቃል።

በቀጣይ ቦርዱን በሊቀመንበርነት ማን እንደሚመራው ባይታወቅም፤ በቀጣይ የባንኩ ቦርድ አባላት አዲስ የቦርድ ሊቀመንበር ይመርጣሉ ተብሎ ይጠበቃል። ጄኔራል ጻድቃን የአንበሳ ባንክ የቦርድ ሊቀመንበር ኾነው የተመረጡት ባለፈው ዓመት ነበር።

አንበሳ ኢንተርናሽናል ባንክ በኢትዮጵያ ውስጥ እየሠሩ ከሚገኙ 16 የግል ባንኮች አንዱ ሲሆን፤ በ2012 በጀት ዓመት ከ718 ሚሊዮን ብር በላይ ትርፍ እንዳስመዘገበ ተገልጿል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!