Eng. Takele Uma and His Holiness Abune Mathias I

ኢንጂነር ታከለ ኡማና ብፁዕ ወቅዱስ አቡነ ማትያስ ቀዳማዊ ፓትርያርክ

በግጭቱ ተሳታፊነት የተጠረጠሩ ሰባት ሰዎች ታስረዋል

ኢዛ (ረቡዕ ጥር ፳፯ ቀን ፳፻፲፪ ዓ.ም. February 5, 2020)፦ በአዲስ አበባ 22 አካባቢ በሚገኝ ቦታ ላይ ቤተክርስቲያን እንገነባለን በሚሉ ወገኖችና በሕግ አስከባሪ አካላት መካከል ተፈጠረ በተባለው ግጭት የሰው ሕይወት ጠፋ። በድርጊቱ ተሳታፊ ናቸው የተባሉ ሰባት ሰዎች ተይዘው ምርመራ እየተደረገባቸው መኾኑን ኢ/ር ታከለ ዛሬ በሠጡት መግለጫ ላይ አስታውቀዋል።

ትናንት ከሌሊት ጀምሮ በተፈጠረው ግጭት ሕግ ለማስከበር ጥረት ሲደረግ የፖሊስ መኪና መቃጠሉን፣ የሰው ሕይወት ስለመጥፋቱም እየተገለጸ ነው። ዛሬ ከቀኑ ስምንት ሰዓት አካባቢ የከተማዋ ምክትል ከንቲባ ደግሞ በፌስቡክ ገጻቸው ሁለት ወጣቶች ስለመሞታቸው የሚያመለክት መረጃ አስፍረዋል። ኢንጂነር ታከለ ኡማ በጉዳዩ ዙሪያ በፌስቡክ ገጻቸው ያሠፈሩት የሚከተለውን ነው።

“ከየትኛውም ጊዜ በተለየ ከሃይማኖት ተቋማት ጋር ተቀራርበን እየሠራን እንገኛለን። ከሥራችን ጅማሬ አንስቶ የደከምንበት የሃይማኖት ተቋማት ጥያቄዎች ምክንያት አንድም የሰው ሕይወት ይጠፋል ብለን አስበን አናውቅም።

“በተለይም ከይዞታ ጥያቄዎች ጋር በተያያዘ ረጅም ርቀት ሔደን ጥያቄዎችን ስንመልስ ቆይተናል። ይሁን እንጂ በመንግሥትና በሃይማኖት ተቋማት ውስጥ በሚገኙ ጥቂት አጥፊዎች ምክንያት በከተማችን ይኾናል ያላልነው፤ እንዳይኾንም የለፋንበት ድርጊት ተፈጽሟል።

“ከተማችንን በመለወጥ ሒደት ውስጥ ሕይወታቸው ይለወጣል ብዬ ከማስብላቸው ወጣቶች ሁለቱን አጥተናል።

“እነዚህን ወጣቶች ለማጣት ያበቁንን በየትኛውም ወገን ያሉ የጥፋቱ አካላትን በሕግ እንዲጠየቁ እናደርጋለን።

“በጥፋቱ ወንድሞቻችንን አጥተናል። ለቤተሰቦቻቸው መጽናናትን እመኛለሁ። እጅግ አዝኛለሁ።” የሚል ነበር የከተማው ከንቲባ ሙሉ ጽሑፍ።

ብፁዕ ወቅዱስ አቡነ ማትያስ መንግሥት ወንጀለኞቹን ለሕግ እንዲያቀርብ ጠየቁ

ከዚሁ ጋር በተገናኘ ከኢትዮጵያ ኦርቶዶክስ ተዋኅዶ ቤተ ክርስቲያን፤ ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወጨጌ ዘመንበረ ተክለሃይማኖት ሕይወታቸውን ላጡት ወጣቶች የተሰማቸውን ኀዘን ገልጸዋል።

ፓትርያርኩ ለጋዜጠኞች በሠጡት መግለጫ ላይ ጉዳዩ የሚመለከታቸው የመንግሥት አካላት የማጣራት ሥራ አከናውነው ወንጀለኞችን ለሕግ እንዲያቀርቡና የወንጀሉን የምርመራና የማጣራቱን ሒደት በተመለከት ዝርዝር ሪፖርት ለሕዝብ ይፋ ያደረጉ ዘንድ ጥሪ አቅርበዋል።

ብፁዕነታቸው ሕይወታቸውን ላጡ ፈጣሪ እረፍተ ነፍስ እንዲሰጥ፣ ለሟች ቤተሰቦችና ወዳጆች መጽናናትን እንዲያድል በመጸለይ፤ ግጭቱ እንዲረግብና ሰላም ይሰፍን ዘንድ ጥሪያቸውን አስተላልፈዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!