20210302 adwa

ቤንሻንጉል ጉሙዝ

ቤንሻንጉል ጉሙዝ

ጥቃቱ የተፈጸመው እየተጓዘ ባለ አውቶቡስ ላይ ነው
በጥቃቱ እስካሁን 34 ንጹኀን ዜጎች ተጎጂ ኾነዋል

ኢዛ (እሁድ ኅዳር ፮ ቀን ፳፻፲፫ ዓ.ም. November 15, 2020)፦ የኢትዮጵያ ሰብአዊ መብት ኮሚሽን በቤንሻንጉል ጉሙዝ ክልል በመጓዝ ላይ ባለ የሕዝብ ማመላለሻ አውቶቡስ ላይ ዘግናኝ ነው ባለው ጥቃት ጉዳይ እንደደረሰ አመለከተ። እስካሁን በደረሰው መረጃ በዚህ ጥቃት 34 ሰዎች እንደተጎዱና ይህ ቁጥር እንደሚጨምር የሚጠበቅ መኾኑን፤ “ቤንሻንጉል ጉሙዝ ክልል ጸጥታና ደኅንነት ለማጠናከር ፈጣንና የተቀናጀ እርምጃ አስፈላጊ ነው” በሚል ርዕስ ባወጣው መግለጫ አስታወቀ።

የኢትዮጵያ ሰብአዊ መብቶች ኮሚሽን ዛሬ ኅዳር 6 ቀን 2013 ዓ.ም. ከሁለት ሰዓት በፊት ያወጣው ሙሉ መግለጫ የሚከተለው ነው። (ኢዛ)

ቤንሻንጉል ጉሙዝ ክልል፤ ጽጥታና ደኅንነትን ለማጠናከር ፈጣንና የተቀናጀ እርምጃ አስፈላጊ ነው

የኢትዮጵያ ሰብአዊ መብቶች ኮሚሽን (ኢሰመኮ) ኅዳር 5 ቀን 2013 ዓ.ም. ሌሊቱን፣ በቤንሻንጉል ጉሙዝ ክልል በደባጤ ወረዳ ከወንበራ ወደ ቻግኒ በመጓዝ ላይ በነበረ የሕዝብ ማመላሻ አውቶብስ ላይ በተፈጸመው ዘግናኝ ጥቃት የተሰማውን ኀዘን ይገልጻል።

ኢሰመኮ በደረሰው መረጃ መሠረት በተመሳሳይ ወቅት በሌሎች የክልሉ ወረዳዎች (ውብጊሽ፣ ያምፕ እና ቂዶህ) ጥቃት መሰንዘሩ እና ለጊዜው ሕይወታቸውን ለማዳን የሸሹ ሰዎች መኖራቸው በመነገሩ፣ በአሁኑ ወቅት የሚገመተው የተጎጂዎች ቁጥር 34 ቢኾንም ሊጨምር እንደሚችል ይጠብቃል።

የኢሰመኮ ዋና ኮሚሽነር ዶ/ር ዳንኤል በቀለ፤ “ይህ ጥቃት ሁላችንም በጋራ የተሸከምነውን የሰው ሕይወት ክፍያ ዛሬም በአሳዛኝ ሁኔታ የሚያሻቅብ ነው። የመንግሥት የጸጥታ ኃይሎች በፍጥነት ጥቃቱ የበለጠ እንዳይባባስ እርምጃ መውሰዳቸው አበረታች ነው” ብለዋል።

መስከረም 16 ቀን 2013 ዓ.ም. ኢሰመኮ ያወጣውንና በክልሉ የሚከሰቱ ጥቃቶች ተደጋጋሚነትና አስከፊ ባሕርይ በተለየ ሁኔታ ያሰመረበትን መግለጫ በማስታወስ፣ ዋና ኮሚሽነሩ የሚከተለውን አክለዋል፤ “በቤንሻንጉል ጉሙዝ በሲቪል ሰዎች ላይ የሚደርሰው ጥቃት ፋታ የማይሰጥ ኾኖ በመቀጠሉ፤ በፌዴራልና በክልሉ መንግሥታት የጸጥታ ኃይሎች መካከል በፍጥነትና ንቁ ኾኖ መጠበቅ ላይ የተመሰረተ የተሻለ ቅንጅት የሚሻ ነው። የፌዴራልና የክልሉ የጸጥታና የፍትሕ አካላት ከአካባቢው ማኅበረሰብ ጋር በመኾን እነዚህን ጥቃቶች ሊያስቆም የሚችል አዲስ ክልላዊ የጸጥታ ስትራቴጂ ሊነድፉ ይገባል።”

የኢትዮጵያ ሰብአዊ መብት ኮሚሽን
ኅዳር 6 ቀን 2013 ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!