Federal Police and TPLF

የፌዴራል ፖሊስ እና የሕወሓት ዓርማ

ጁንታው የሐውዜኑን የፕሮፓጋንዳ ድራማ ሊደግም እንዳሰበ ተጠቆመ

ኢዛ (ሐሙስ ኅዳር ፲፯ ቀን ፳፻፲፫ ዓ.ም. November 26, 2020)፦ የሕወሓት ቡድን በመቀሌ ከተማ ውስጥ በማይካድራ የፈጸመውንና ብሔርን መሠረት ያደረገ ጭፍጨፋ (ዘር ማጥፋት) ለመድገም እየተዘጋጀ ስለመኾኑ የፌዴራል ፖሊስ አስታወቀ።

አንዳንድ ከአካባቢው የወጡ መረጃዎች እንደሚጠቁሙት ከኾነ፤ የሕወሓት ጁንታ ቡድን መቀሌ ውስጥ የራሱን ታጣቂዎች የኤርትራን እና የኢትዮጵያን መከላከያ ሠራዊት ወታደራዊ ልብስ ማልበሱንና ቪዲዮ መቅረጫዎችን በየቦታው መጥመዱን እየተገለጹ ይገኛሉ። ከደርግ ጋር ሲዋጋ በነበረበት ጊዜ በሐውዜን የሠራውን የፕሮፓጋንዳ ድራማ አሁንም ለመድገምና ለመሥራት እንደተዘጋጀ እየተጠቆም ይገኛል።

የፌዴራል ፖሊስ “የሕወሓትን እኩይ ተግባር እቅድ ይፋ ኾነ” በሚል ያወጣው አጭር መግለጫ የሚከተለው ነው። (ኢዛ)

የሕወሓት የእኩይ ተግባር እቅድ ይፋ ኾነ (የፌዴራል ፖሊስ ኮሚሽን)

ለመላው የአገራችን ሕዝቦችና ለዓለም ማኅበረሰብ በትግራይ ክልል የጀመርነው ሕግን የማስከበር እርምጃ ሁለተኛ ምዕራፍ ተጠናቆ የመጨረሻውና ሦስተኛው ወሳኝ ምዕራፍ ላይ ደርሰናል።

ይህ በዚህ እንዳለ ጽንፈኛው የሕወሓት ጁንታ ቡድን መቀሌ ከተማ ውስጥ የሚኖሩ የትግራይ ተወላጆች ያልኾኑትን ሰዎች ማረድ፣ አንገታቸውን በገመድ ማነቅ፣ ንብረታቸውን መዝረፍ እና ማቃጠል፣ የመከላከያ ሠራዊታችንን የደንብ ልብስ በመልበስ ሰዎች ላይ በድንገት ተኩስ በመክፈት ሰሞኑን በማይካድራ የፈጸመውን ብሔርን መሠረት ያደረገ አስነዋሪ፣ አሳፋሪና አሰቃቂ ጭፍጨፋ ለመድገም እቅድ አውጥቶ ተግባራዊ ለማድረግ እየተንቀሳቀሰ መኾኑንና ይህንን እኩይ ተግባር ከፈጸመም በኋላ ድርጊቱ የተፈጸመው በመንግሥት ነው ብሎ በሚዲያ ለማሰራጨት የተዘጋጀ መኾኑን ከሕዝብ መረጃ ደርሶናል። በመኾኑም ሁሉም ኢትዮጵያዊ እና ዓለም አቀፍ ማኅበረሰብ ይህንን የጥፋት ሴራ ተከትሎ ጁንታው ቡድን ሊያሰራጭ የተዘጋጀውን የሐሰት ፕሮፖጋንዳና ይህንን እኩይ ተግባር አስቀድሞ እንዲረዳና ተቀባይነት ያጣ ዘንድ የበኩላችሁን ጥረት እንድታደርጉ ማሳሰብ እንወዳለን።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!