Hachalu Hundessa

በሠላሳ ስድስት ዓመቱ ከዚህ ዓለም በሞት የተለየው አርቲስት ሐጫሉ ሁንዴሳ

ከአንድ ሺህ አራት መቶ በላይ ተጠርጣሪዎች ታስረዋል

ኢዛ (እሁድ ሰኔ ፳፰ ቀን ፳፻፲፪ ዓ.ም. July 5, 2020)፦ የአርቲስት ሐጫሉ ሁንዴሳን ግድያ ተከትሎ በአዲስ አበባና በተለያዩ የኦሮሚያ ክልሎች ከፍተኛ ኹከት ከመከሰቱ ባሻገር የበርካቶች ንጹኀን ዜጎችና የመንግሥት የጸጥታ አስከባሪ አባላት ሕይወት ከመጥፋቱም በላይ ለጊዜው በውል ያልታወቀ ንብረት መውደሙ ይታወቃል። በአሁኑ ወቅት የመከላከይ ኃይል፣ የልዩ ኃይልና የፖሊስ ኃይሎች ከሕብረተሰቡ ጋር በመቀናጀት ኹከቱ በተቀሰቀሰባቸው አካባቢዎች ሰላም በማስፈን ላይ እንደሚገኙ ተገለጸ።

ከዚሁ ኹከት ጋር በተገናኘ ከአንድ ሺህ አራት መቶ በላይ ተጠርጣሪዎች መታሰራቸውን የጠቅላይ ሚኒስትር ጽሕፈት ቤት ሴክሬታሪያት ኃላፊ አቶ ንጉሡ ጥላሁን ገልጸዋል። እስካሁን “አይነኬ መስለው የቆዩ” አካላትም በቁጥጥር ሥር መዋላቸውን ተናግረዋል።

አቶ ንጉሡ አክለው እንደገለጹት እስከዛሬ በሽምግልና ጉዳዩን ለማየት ሲሞከር የነበረ መኾኑን አስታውሰው፤ “ከእንግዲህ በኋላ ሽምግልና አይሠራም” በማለት የመንግሥታቸውን አቋም አንጸባርቀዋል።

ሻሸመኔ

እየወጡ ያሉ መረጃዎች እንደሚጠቁሙት ከኾነ ከፍተኛ ንብረት ከወደመባቸው ከተሞች ውስጥ ሻሸመኔ ከተማ ግንባር ቀደምዋ እንደኾነች እየተነገረ ይገኛል። የአትሌት ኃይሌ ገብረሥላሴን ሆቴል ጨምሮ የንግድ ተቋማት፣ ከተማዋን ያስዋቡዋት ትላልቅ ሕንጻዎች፣ ት/ቤት፣ … እንዲሁም የበርካታ ዜጎች ቤቶች በእሳት ጋይተዋል፤ መኪኖች ተቃጥለዋል።

አዲስ አበባ

በአዲስ አበባም የመንግሥትና የግል ድርጅቶች፣ ኩባንያዎችና የንግድ ቤቶች፣ ባንኮች መስኮቶች ተሰባብረዋ፣ ተዘርፈዋል። የንብረት መውደም ከደረሰባቸው የከተማይቱ ክፍለ ከተሞች ውስጥ ቦሌ፣ ቄራና ሳሪስ ይገኙበታል። በአሁኑ ሰዓት ከተማይቱ በጸጥታ ኃይሎች ጥበቃ ሥር ትገኛለች።

ሐረር እና ድሬዳዋ

ኹከቱ ከጎበኛቸው ትላልቅ ከተሞች ውስጥ ሐረር እና ድሬዳዋ የሚገኙበት ሲሆን፣ በተለይም የምሥራቅ ዕዝ መከላከያ ሠራዊት ከተሞቹን በቁጥጥር ሥር በማዋል ሰላም የማስፈን ሥራ መሥራቱን ከአካባቢው ነዋሪዎች ለመረዳት ችለናል። የሕዝብ ማመላለሻዎች ከሐረር ወደ ድሬዳዋ የሚያደርጉትን ጉዞ ያቋረጡ ሲሆን፣ የጭነት መኪኖች ግን በኮንቮይ በመታጀብ የሚንቀሳቀሱ መኾኑን ለመረዳት ችለናል።

መንግሥት

በሰሞኑ ኹከት የደረሰውን ጥቃት በተመለከተ መንግሥት በሰጠው መግለጫ፤ ጥቃቱ በደረሰባቸው አካባቢዎች መንግሥት መልሶ በመገንባት ሒደቱ ላይ እገዛ እንደሚያደርግ አስታውቋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!