Melete Kahssay, 25 ወ/ት ምልዕተ ካህሳይ ገዳይዋ ለፖሊስ እጁን ሰጠ

Ethiopia Zare (ሐሙስ ነሐሴ 7 ቀን 2001 ዓ.ም. August 13, 2009)፦ በስዊድን ዋና ከተማ ስቶክሆልም በስደት ትኖር የነበረችና ወ/ት ምልዕተ ካህሳይ የተባለች የ25 ዓመት ወጣት ኢትዮጵያዊት ባለፈው ሣምንት ረቡዕ ዕለት የተገደለች ሲሆን፤ ገዳይዋም በማግስቱ እጁን ለፖሊስ መስጠቱን የኢትዮጵያ ዛሬ ሪፖርተር ዘገበ። 

 

የቤቷ አከራይ በነበረው የሱፍ በሚባል ሰው እንደተገደለች የገለጹት የወጣቷ ጓደኞች፤ ረቡዕ ሐምሌ 29 ቀን 2001 ዓ.ም. በኢትዮጵያ አቆጣጠር ከምሽቱ ሦስት ሰዓት አካባቢ በሕይወት እንደነበረች ማረጋገጣቸውን ለሪፖርተራችን ገልጸዋል። በዚያን ሰዓት ከጓደኞችዋ ጋር በስልክ ስታወራ እንደነበር አስረድተዋል።

 

የወ/ት ምልዕተ የቤት አከራይ ይኖርበት የነበረውን ቤት አከራይቷት ስዊድን ውስጥ ሌላ ከተማ ይኖር የነበረ ሲሆን፣ በቅርቡም ወደ ስቶክሆልም ተመልሶ በቤቱ ውስጥ አብሯት መኖር ጀምሮ እንደነበር ታውቋል።

 

ወዳጅ ጓደኞችዋ አልቢ በተሰኘው ክፍለ ከተማ Alhagsvägen 40 በሚገኝ አዳራሽ ተከራይተው ከዛሬ ሐሙስ ኦገስት 13 ቀን እስከ ኦገስት 19 ቀን ኀዘን መቀመጣቸውን ሪፖርተራችን ዘግቧል።

 

በዚህም አጋጣሚ የወጣት ምልዕተ ካህሳይን አስከሬን ወደ ትውልድ ሀገሯ ኢትዮጵያ ለመሸኘትና የቀብር ሥነሥርዓቷን ለማስፈፀሚያ በሚደረገው የገንዘብ ማሰባሰብ ላይ በየትኛውም አካባቢ የሚገኙ ኢትዮጵያውያን የእርዳታ እጃቸውን እንዲዘረጉ መጠየቁን ልንገልጽ እንወዳለን።

 

በአካል ተገኝተው ኀዘን ለመድረስም ሆነ ለመርዳት የሚፈልጉ አልቢ በሚገኘው Alhagsvägen 40 አድራሻ መሄድ እንደሚችሉና፣ ገንዘብ ለመርዳት የሚፈልጉ ደግሞ በፖስት ዩሮ ቁጥር 49434 - 4 መጠቀም እንደሚችሉ ከጓደኞችዋ አካባቢ ለማወቅ ችለናል። የፖስት ዩሮው ቁጥር ለወ/ት ምልዕተ ተብሎ የተከፈተ ጊዜያዊ የገንዘብ መሰብሰቢያ መሆኑ ተገልጾልናል።

 

ከዚህም ሌላ ከነገ አርብ ኦገስት 14 ጀምሮ በስቶክሆልም ከተማ በሐሉንዳ ክፍለ ከተማ በሚደረገው የስፖርት ዝግጅት ላይ ለወ/ት ምልዕተ አስከሬን መሸኛ የገንዘብ ማሰባሰቢያ ሳጥኖች እንደሚቀመጡም ለመረዳት ችለናል። ይህንኑ ጉዳይ ለማስተባበር ተጠሪ ተደርገው የተመረጡት አቶ ንጉሴ ብርሃኑ (ስልክ 070-712 48 95) እና ወ/ሮ አበባ ትኩ (ስልክ 073-617 76 63) ሲሆኑ፣ አስፈላጊ ለሆኑ ጉዳዮች ደውሎ ማናገር እንደሚቻል ተረድተናል።

 

የኢትዮጵያ ዛሬ ዝግጅት ክፍል ለወ/ት ምልዕተ ካህሳይ ቤተሰቦች፣ ዘመዶች፣ ጓደኞችና ወዳጆች ሁሉ በያሉበት መጽናናትን ትመኛለች።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!