Dr. Debretsion GebreMichael

የትግራይ ክልል ምክትል ርዕሰ መስተዳድር ዶ/ር ደብረጽዮን ገብረሚካኤል

“ከድርጊቱ የማይቆጠብና ይህንን የሚያደርግ ከኾነ መንግሥት እርምጃ ይወስዳል” ብልጽግና

ኢዛ (ሐሙስ ግንቦት ፮ ቀን ፳፻፲፪ ዓ.ም. May 14, 2020)፦ በአገር አቀፍ ደረጃ ምርጫ የማይካሔድ ከኾነ፤ በትግራይ ክልል ውስጥ ምርጫን የሚያደርግ ስለመኾኑ የትግራይ ክልል ምክትል ርዕሰ መስተዳድር ዶ/ር ደብረጽዮን ገብረሚካኤል የገለጹ ሲሆን፤ የብልጽግና ፓርቲ በበኩሉ ይህ አይሞከረም እያለ ነው።

ዶ/ር ደብረጽዮን ትናንት በሰጡት መግለጫ በኮሮና ወረርሽኝ ምክንያት በማድረግ ምርጫው መራዘም የሌለበትና ምርጫው የተራዘመው በኮሮና ወረርሽኝ ሥጋት ብቻ ያለመኾኑን ተናገሩ። በሕገ መንግሥቱ መሠረት ምርጫው የማይካሔድ ከኾነ፤ በትግራይ ክልል ግን ሕገ መንግሥቱን ጠብቀን ምርጫውን እናደርጋለን ብለዋል።

ዶ/ር ደብረጽዮን በዚሁ መግለጫቸው ላይ፤ “ኮሮናን በአግባቡ መመከት ይቻላል። ኮሮና የምርጫ ጉዳይ አይደለም እያልን ነው ያለነው። ኮሮና የሕዝብን ሕይወት የማዳን፣ የማትረፍ ጉዳይ ነው፤ ስለዚህ ከምርጫ በላይ ነው። ሕዝቡን ይዘህ ነው ስለምርጫ ማውራት የምትችለው። ስለዚህ የሕዝቡን ደኅንነት፣ ጤንነት ጠብቀን፤ ምርጫ በኮሮና ጊዜ ማካሔድ ይቻላል ነው እያልን ያለነው” ሲሉ ተደምጠዋል።

ምርጫው ያለመደረጉ ሕገ መንግሥታዊ ጥሰት ከመኾኑም በላይ፤ ምርጫ ያለመደረጉ ደግሞ የሥልጣን ዘመኑ መስከረም 30 ቀን 2013 ዓ.ም. የሚያበቃ በመኾኑ፤ ከዚያ በኋላ ተቀባይነት ያለው መንግሥት ስለማይኖር፤ አደገኛ ሁኔታ ይፈጠራልም በማለት ምርጫ ያለመደረጉ ሊያመጣ የሚችለውን ችግር ለመጥቀስ ሞክረዋል።

ሕወሓት ቀደም ብሎ በሥራ አስፈፃሚው በኩል በክልሉ ምርጫን ለማድረግ እየተዘጋጀ መኾኑን የገለጸ መኾኑ የሚታወስ ሲሆን፤ ትናንት ደግሞ ዶ/ር ደብረጽዮን ይህንኑ የሚያጠናክር መግለጫ ሰጥተዋል።

ይሁን እንጂ ሕወሓት የያዘው አቋም በየትኛውም የአገሪቱ ሕግ ተቀባይነት የሌለው ሲሆን፤ በሕገ መንግሥቱም ከኢትዮጵያ ብሔራዊ ምርጫ ቦርድ ውጭ ምርጫን ማስፈጸም እንደማይቻል የተደነገገ መኾኑ በተደጋጋሚ ሲገልጽ የቆየ ቢኾንም፤ የትግራይ ክልል ከዚህ በተፃራሪው ምርጫ አደርጋለሁ ማለቱ አነጋጋሪ መኾኑ አልቀረም። ዶ/ር ደብረጽዮን ግን ምርጫ በየአምስት ዓመቱ ማድረግ ሕገ መንግሥት ማክበርና ያለማክበር ጉዳይ ነው ብለዋል።

በዚህ ጉዳይ ላይ የትግራይ ብልጽግና ፓርቲ ጽሕፈት ቤት ኃላፊ አቶ ነብዩ ስሑል ሚካኤል፤ “በአገሪቱ ምንም ዐይነት ምርጫ ማካሔድ የሚችለው ብሔራዊ ምርጫ ቦርድ ነው። ሥልጣኑም የሱ ነው። ከዚህ ውጭ የሚደረግ ምርጫ እንደ ወንጀል የሚቆጠር ነው። ስለዚህ እንዲህ ካለው ሕገ መንግሥታዊ ጥሰት ሕወሓት እንዲቆጠብ በተለያየ መንገድ እያሳሰብን ነው” ማለታቸውን መዘገባችን አይዘነጋም።

የብልጽግና ፓርቲ ሕዝብ ግንኙነት ኃላፊ የኾኑት አቶ አወሉ አብዲ ደግሞ፤ የትግራይ ክልል በተናጠል ምርጫውን ማካሔድ ሕገ መንግሥታዊ ባለመኾኑ፤ ከዚህ እንዲቆጠብና ይህንን የሚያደርግ ከኾነ መንግሥት እርምጃ እንደሚወስድ ተናግረዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!