Endeshaw Tassew

የፌዴራል ፖሊስ ኮሚሽን ኮሚሽነር ጄኔራል እንደሻው ጣሰው

የፌዴራል ፖሊስ የደንብ ልብስ ሊቀየር ነው

ኢዛ (ማክሰኞ ነኀሴ ፲፱ ቀን ፳፻፲፪ ዓ.ም. August 25, 2020)፦ የፌዴራል ፖሊስ የደንብ ልብሱን ሊቀይር መኾኑንና አዳዲስ የፖሊስ ዘርፎችን ወደ ሥራ ሊያስገባ መኾኑን የፌዴራል ፖሊስ ኮሚሽን ኮሚሽነር ጄኔራል አስታወቁ።

ኮሚሽነር ጄኔራል እንደሻው ጣሰው ዛሬ ማክሰኞ ነኀሴ 19 ቀን 2012 ዓ.ም. ማምሻውን በሰጡት መግለጫ የፌዴራል ፖሊስ የደንብ ልብስ ለመቀየር ከታሰበባቸው ምክንያቶች አንዱ፤ አሁን ያለው የደንብ ልብስ በቀላሉ የሚገኝ ከመኾኑ ጋር የተያያዘ መኾኑን ጠቅሰዋል።

ከዚህም ሌላ በሥነ ምግባር የተባረሩ ፖሊሶች የደንብ ልብሱን ለብሰው እየተንቀሳቀሱ መኾናቸው፤ ይህንን የደንብ ልብስ በመልበስ የሚፈጸሙ ወንጀሎችና ዝርፊያዎች መበራከታቸው የደንብ ልብሱን ለመቀየር ካስገደዱ ምክንያቶች ውስጥ የተጠቀሱ ናቸው።

ኾኖም በአጠቃላይ የደንብ ልብሱን ቅያሬ አስመልክቶ ዝርዝር መረጃው የፊታችን ቅዳሜ ይሰጥበታል ተብሏል።

በዛሬው መግለጫ ላይ ኮሚሽነር ጄኔራሉ የተጠቀሱት ሌላው ጉዳይ በአዲሱ ዓመት 2013 ዓ.ም. አዳዲስ የፖሊስ ዘርፎች በሙከራ ደረጃ ወደ ሥራ ሊገቡ ስለመኾኑ ነው። እንደእርሳቸው ገለጻ በቀጣዩ ዓመት የዩኒቨርሲቲ፣ የቱሪዝም እና የኢንዱስትሪ ፓርኮች ፖሊስ በሚሉ ዘርፎች ወደ ሥራ ይገባል ተብሏል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!