President Isaias Afwerki (L), Debretsion Gebremichael (PHD)

የኤርትራው ፕሬዝዳንት ኢሳይያስ አፈወርቂ እና ዶ/ር ደብረጽዮን ገብረሚካኤል

“ወያኔ በሞት ጣር ላይ ኾኖ እያደረገ ያለው እንቅስቃሴ ግን፤ በአካባቢው የተፈጠረውን ሁኔታ ወደ ኋላ ሊመልሰው አይችልም” የኤርትራ መንግሥት

ኢዛ (ቅዳሜ ጥቅምት ፳፩ ቀን ፳፻፲፫ ዓ.ም. October 31, 2020)፦ በምሥራቅ አፍሪካ መታየት የጀመረውን ለውጥ ትግራይ ተቋዳሽ እንዳትኾን ሕወሓት እንቅፋት ኾኗል ሲል የኤርትራ መንግሥት አስታወቀ።

የኤርትራ መንግሥት ይህንን መግለጫ ያስነበበው በኤርትራ ማስታወቂያ ሚኒስቴር በኩል ሲሆን፤ በአሁኑ ወቅት የትግራይ ክልልን እያስተዳደረ ያለው ገዥ ፓርቲ (ሕወሓት)ን “የወደቀ” በሚል ጭምር ጠቅሶታል።

ሕወሓት ከዚህ ቀደም በአፍሪካ ቀንድ ለተፈጠሩ ችግሮች መነሻ እንደነበር የሚያመለክተው ይኸው የኤርትራ መንግሥት መግለጫ፤ በአሁኑ ወቅት በአካባቢው እየተፈጠረ ላለው መልካም እድል እንቅፋት ኾኗል በማለት ከሷል።

የምሥራቅ አፍሪካ ከነበረበት አስቸጋሪ ሁኔታ ወደ አዲስና ልዩ ምዕራፍ ስለመሸጋገሩ በማመልከትም፤ ለዚህ ማሳያ የኢትዮጵያና የኤርትራ ግንኙነት ከ20 ዓመታት በኋላ የሰላም ስምምነት እና ትብብርን እንደምሳሌ ጠቅሷል።

ይህ ሁለቱ አገሮች የደረሱበት ስምምነት ከኢትዮጵያና ኤርትራ አልፎ ለአፍሪካ አገሮች ተስፋ የሰጠ ጭምር መኾኑን ያወደሰው መግለጫ፤ ነግር ግን ጎሠኛው ሕወሓት እንቅፋት ኾኗል ብሏል።

“ወያኔ በሞት ጣር ላይ ኾኖ እያደረገ ያለው እንቅስቃሴ ግን፤ በአካባቢው የተፈጠረውን ሁኔታ ወደ ኋላ ሊመልሰው አይችልም” በማለት በመግለጫው አመላክቷል።

የኤርትራ መንግሥት ብዙም ባልተለመደ ሁኔታ ዛሬ ያወጣው ይህ መግለጫ፤ ሰሞኑን የኤርትራ መንግሥትን በተመለከተ ሕወሓት ላወጣው መግለጫ ምላሽ ሊኾን እንደሚችል ታምኗል።

ሰሞኑን ሕወሓት ባወጣው መግለጫ ኤርትራን በተመለከተ ከተጠቀሰው ውስጥ፤ “የኢሳይያስ ሥርዓት ከትግራይ ሕዝብ ጠላቶች ጋር ተሻርኮ ዳግም ወደ ደም መቃባት ሊያስገባን ላይ ታች በማለት ላይ ይገኛል” የሚል ይገኝበታል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!