Fikreselassie Wogderess

የቀድሞው ጠቅላይ ሚኒስትርነት ሻምበል ፍቅረሥላሴ ወግደረስ

የመጀመሪያው የኢሕዴሪ ጠቅላይ ሚኒስትር ነበሩ

ኢዛ (ረቡዕ ታኅሣሥ ፯ ቀን ፳፻፲፫ ዓ.ም. December 16, 2020)፦ ታኅሣሥ 3 ቀን 2013 ዓ.ም. ዜና እረፍታቸው የተሰማው የቀድሞው ጠቅላይ ሚኒስትርነት ሻምበል ፍቅረሥላሴ ወግደረስ ሥርዓተ ቀብር ዛሬ ታኅሣሥ 7 ቀን 2013 ዓ.ም. በአዲስ አበባ መንበረ ጽባኦት ቅድስት ሥላሴ ካቴድራል ተፈጸመ።

ወዳጅ ዘመዶቻቸው በተገኙበት ሥርዓተ ቀብራቸው ዛሬ የተፈጸመው ሻምበል ፍቅረሥላሴ ከዚህ ዓለም በሞት የተለዩት በ75 ዓመታቸው ነው።

ሻምበል ፍቅረሥላሴ ደርግን ከመሠረቱት ዋነኛ ወታደራዊ መኮንኖች አንዱ እንደነበሩ የሚታወስ ሲሆን፤ ደርግ ከወደቀ በኋላ በእስር ቆይተው እንደነበር ይታወሳል። ከእስር ከወጡ በኋላ “እኔና አብዮቱ” እና “እኛና አብዮቱ” በሚሉ ርዕሶች ሁለት መጻሕፍትን አሳትመዋል።

ዓርብ ሐምሌ 6 ቀን 1937 ዓ.ም. (July 13, 1945 እ.ኤ.አ.) በአዲስ አበባ ተወልደው ያደጉት ሻምበል ፍቅረሥላሴ፤ በደርግ ሥርዓት በተለያዩ የኃላፊነት ቦታዎች ላይ ያገለገሉ ሲሆን፤ በይበልጥ የሚታወቁት ግን ከመስከረም 1979 ዓ.ም. እስከ ጥቅምት መጨረሻ 1982 ዓ.ም. ድረስ በጠቅላይ ሚኒስትርነት በማገልገላቸው ነው።

ሻምበል ፍቅረሥላሴ የመጀመሪያው የኢትዮጵያ ሕዝባዊ ዴሞክራሲያዊ ሪፐብሊክ (ኢሕዴሪ/ኢሕዲሪ) ጠቅላይ ሚኒስትር ነበሩ።

ሕወሓት/ኢሕአዴግ ደርግን አስወግዶ በትረ ሥልጣኑን ከተቆጣጠረ በኋላ በቁጥጥር ሥራ ባዋላቸው እንዲሁም ኮሎኔል መንግሥቱ ኃይለማርያምን ጨምሮ በቁጥጥር ሥር ባላዋለቸው የደርግ እና የኢሕዴሪ ባለሥልጣናት ላይ በመሠረተው ክስ፤ ሻምበል ፍቅረሥላሴ ጨምሮ 23 የደርግ ባለሥልጣናት ላይ የሞት ፍርድ ተፈርዶባቸው ነበር። ከሃያ ዓመታት በኋላ መስከረም 23 ቀን 2004 ዓ.ም. ከሌሎች 16 የደርግ ባለሥልጣናት ጋር በነፃ መለቀቃቸው ይታወቃል።

ጓድ ፍቅረሥላሴ በስኳር እና በኩላሊት በሽታ የሕክምና እርዳታ ሲደረግላቸው መቆየቱ ታውቋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!