20210302 adwa

አከራዮቹን ደህንነቶች እያስፈራሩ ነው

Ethiopia Zare (ማክሰኞ የካቲት 4 ቀን 2000 ዓ.ም Feb. 12,2008)፦ በምክትል ሊቀመንበሯ ወ/ት ብርቱካን ሚደቅሳ የሚመራው የቅንጅት ሥራ አስፈጻሚ በአንድ የሕግ ባለሙያ አማካኝነት የተከራዩትን ቢሮ የቤቱ ባለቤትና አከራይ የወያኔ ደህንነቶችና የቀበሌ ደንብ አስከባሪዎች ለሕገወጥ ተግባር ቤቱን አከራይተሻል በሚል ጫና በማሳደራቸው ምክንያት በዛሬው ዕለት አስለቅቃቸዋለች።

 

ሀገር ቤት የሚገኙ ለጉዳዩ ቅርበት ያላቸው ምንጮች እንደገለጹት የእነ አቶ ኃይሉ ሻውል ቡድን ቴዎድሮስ አደባባይ በሚገኘውና ከውህደቱ በኋላ የቅንጅት ሆኖ በነበረው የቀድሞው የመኢአድ ቢሮ እንዳይገቡ ከተከለከሉ በኋላ በአንድ የሕግ ባለሙያ አማካኝነት በአዲስ አበባ ቂርቆስ ክፍለ ከተማ በተለምዶ ቄራ ተብሎ በሚጠራው አካባቢ ቢሮ ተከራይተዋል።

 

ቢሮውን መጠቀም እንደጀመሩ የቤቱን አከራይና ባለቤት የቀበሌ ደንብ አስከባሪዎችና ደህንነቶች እያስፈራሯት መሆኑን በመግለጽ ቤቱን እንዲለቁ ትጠይቃለች። በወቅቱ በተደረገ ማግባባትም ለሁለት ወራት ያህል መቆየት ቢቻልም ማስፈራራቱ እየበረታባት በመምጣቱ በዛሬው ዕለት እንዲወጡ አድርጋለች።

 

አባላቱ ሌላ ቢሮ ለመከራየት ጥረት ቢያደርጉም የሚያከራያቸው ደርጅትም ሆነ ግለሰብ ማግኘት እንዳልቻሉ ለማወቅ ተችሏል። ቤቱን እንዲያከራይ የሚጠየቀው ግለሰብም ሆነ ድርጅት ማንነታቸውን ካረጋገጡ በኋላ እንቢታን ማሳየታቸው በደህንነት ሰዎች የሚደርሰውን ወከባ ከመፍራት አኳያ ሳይሆን እንዳልቀረ ተገምቷል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!