የበደል እዳ

ማየትን መስማትን ማሽተትን

በነፃ ሰጥቶን ፈጣሪያችን

ምስጋና ሳንሰጠው በበደል እዳችን

ያስከፍለን ጀመር ሕይወት በሳላችን

ድጋሚ ተነስተህ

የወሬ አውሎ ንፋስ ምቶህ ብትቀበር

ሞቻለሁኝ ብለህ ዝም ብለህ አትቅር

ተንኮል ምቀኝነት ክፋት የጋረደህ

እንዳልኾንክ አሳየው ድጋሚ ተነስተህ

በብልጦች መንገድ ላይ!

ሞኝ ነህ! እንዳልሽኝ፣ ያኔ! እንደነገርሽኝ፤

በዛው የሞኝ እግር፣ በዛው የጅል ጫማ፤

የብልጦች መሔጃን መንገድ ሳልሻማ፤

እዚህ ደርሻለሁ - ያንቺን ሰማሁልሽ

በብልጦች መንገድ ላይ ደንቃራ እንደረገጥሽ።

ስንያዝ ከንቱ ነን

አላምርበት አለ ይሄ ዘመን ከፋ

ሞት በጅምላ ኾነ ቀረ በወረፋ

እባክህ ፈጣሪ ቀንስ ከሞታችን

ስንያዝ ከንቱ ነን ትንሽ ናት አቅማችን

የዘንድሮው ጠላት

መሣሪያ ጨብጦ ተሸክሞ ጥይት

አይተን ምንዋጋው ነበር ድሮ ጠላት

የዘንደሮው ባሰ ያሁን ደመኛችን

ሳናየው እያየ ደርሶ ገዳያችን