ግርማ ካሣ

 “Hailemariam Desalegn a perfect mimic of Meles” በሚል ርእስ ሥር በኢትዮሜዲያ የቀረበች አጭር ትንተና አነበብኩ። የአቶ ኃይለማርያም ባለቤት ወ/ሮ ሮማን ተስፋዬን እንዲሁም ልጃቸው ዮሃናን በተመለከተ በተጻፈው ላይ ትንሽ የግሌን አስተያየት እንዳቀርብ ይፈቀድልኝ።

 

የአቶ ኃይለማርያም ባለቤት ወ/ሮ ሮማን ተስፋዬ ኤርትራዊት እንደሆኑ ተገልጿል። አቶ መለስ እናታቸው አዲ ቋላ የተወለዱ ኤርትራዊት በመሆናቸው «ለኤርትራ ያደላሉ» ይባሉ እንደነበረው፣ አቶ ኃይለማርያምም ባለቤታቸው «ኤርትራዊት» በመሆናቸው ልባቸው ሻእቢያ ጋር ነው የሚል እድምታን ለማሳየት የተሞከረ ይመስላል።

 

ወ/ሮ ሮማን ኤርትራዊት መሆናቸውን ለማሳየት ፣ ለመጀመሪያ ሴት ልጃቸው የተሰጠው «ዮሃና» የሚለው ስም እንደ ዋና መረጃነት ቀርቧል። «ዮሃና» የሚለው ስም «እንኳን ቀናህ፤ እንኳን ተሳካልህ» (Congratulation) ማለት እንደሆነና የብዙ ኤርትራውያን ስም መጠሪያ እንደሆነ በመግለጽ ነው የወ/ሮ ሮማን «ኤርትራዊነት» የታወጀው።

 

ወ/ሮ ሮማን የተወለዱት ጋሼኖ በምትባል የወላይታ ሶዶ ከተማ ነው። የአንደኛ ደረጃ ትምህርታቸውን በዚችው በጋቼኖ ካጠናቀቁ በኋላ ከአምስት እስከ ስምንተኛ ክፍል በሊጋባ፣ ከዘጠኝ እስከ 12ኛ ክፍል ደግሞ በወላይታ ሶዶ ከፍተኛ ሁለተኛ ደረጃ ትምህርት ቤት አጠናቀዋል። ወላይትኛ ፣ አማርኛ እና እንግሊዘኛ ቋንቋዎች የሚናገሩ ሲሆን እናታቸውም አባታቸውም ኤርትራውያን ሳይሆኑ ኩሩ ወላይታዎች ናቸው።

 

የመጀመሪያ ሴት ልጃቸው ዮሃና በአሁኑ ወቅት በኢትዮጵያ ውስጥ የሕክምና ትምህርት እየተከታተለች ያለች ትሁት ኢትዮጵያዊት ናት። አባቷ፣ ምንም እንኳን የአገር ምክትል ጠቅላይ ሚኒስተር ቢሆኑም፣ ዮሃና በምታመልክበት ቤተክርስቲያን ከአምልኮ በኋላ፣ ሻሂ በማፍላት ከእህቶቿ ጋር ምእመናን የምታገለግል ወጣት ናት።

 

ወላጆቿ ዮሃና የሚል ስም የሰጧት እንደ አብዛኞች የወንጌላዊት አብያተ ከርስቲያናት አማኞች፣ መጽሃፍ ቅዱስ ውስጥ ያለ ስም በመሆኑ ነው። ዮሃና የሚል ስም ያላቸው ሁለት ሴት ልጆችን አውቃለሁ። ሁለቱም ቤተሰቦቻቸው ኤርትራውያን አይደሉም። ዮሃና እንደ አፈወርቂ፣ ትርሃስ፣ ዘይዳ፣ ብርክቲ ፣ የማነ፣ ካሳይ ,… የኤርትራውያን ወይን የትግሪኛ ተናጋሪዎች ስም ሳይሆን የመጽሃፍ ቅዱስ ስም ነው።

 

በሉቃስ ወንጌል ምእራፍ 8 ቁጥር 3 «መግደላዊት የተባለችው ማርያም፣ የሄሮድስ ቤት ሃላፊ የነበረው የኩዛ ሚስት ዮሃና፣ ሶስና ፣ ደግሞም ሌሎች ብዙዎች በግል ንብረታቸው የሚያገለግሉት ነበሩ» የሚል እናነባለን። ጌታችን መድሃኒታችን ኢየሱስ ክርስቶስ ያገለግሉት ከነበሩ ሴቶች መካከል ዮሃን የምትባል እንደነበረች በግልጽ የሚያሳይ ነው።

 

ጌታችን መድሃኒታችን ከመቃብር እንደተነሳ መጀመሪያ ያዩት ሴቶች ነበሩ። እነዚህ ሴቶች ያዩትን የትንሳዔውን ኃይል ለሐዋርያት መሰከሩ። በሉቃስ ወንጌል 24፡ 10 «ይህን (ጌታ መነሳቱን) ለሐዋርያት የነገሯቸውም መግደላዊት ማርያም፣ ዮሃና፣ የያእቆብ እናት ማርያም፣ ከነርሱ ጋር የነበሩት ሌሎች ሴቶች ነበሩ » የሚል ቃል ተጽፏል። የጌታን ትንሳዔ በመጀምሪያ ካወጁት ሴቶች መካከል በግልጽ ዩሃና የምታባል ሴት እንደነበረች እናያለን።

 

ዮሃና የእብራይስጥ ቃል ነው። «የእግዚአብሄር ስጦታ» ወይም «የእግዚአብሄር ጸጋ” ማለት ነው። መዝሙረ ዳዊት «ልጆች የእግዚአብሄር ስጦታ ናቸው» ይላል። ወ/ሮ ሮማን እና አቶ ኃይለማርያም፣ የመጀመሪያ ሴት ልጃቸውን «እግዚአብሄር የሰጠን ስጦታ» ብለው ዮሃና ማለታቸው፣ እግዚአብሄርን የሚያከብሩ መሆናቸውን የሚያሳይ ነው እንጂ ኤርትራዊ መሆናቸውን የሚያሳይ አይደለም።

 

በነገራችን ላይ ኤርትራዊ ናቸው ብለን ብንቀበልም ደግሞ እንኳ ምን ችግር ሊኖረው እንደሚችል አይታየኝም። ዘራይ ደረስ፣ ጄነራል አማን፣ ሞገስ አስግዶም፣ አብርሃም ደቦጭ ኤርትራውያን ነበሩ። አሁንም እንደ ፕሮፌሰር ተስፋጽዮን ያሉ የኢትዮጵያውያንን እና የኤርትራውያንን ወንድማማችነት የሚሰብኩ የሰላም ሐዋርያ የሆኑ ኤርትራውያን አሉ። እንደ አቶ ኢሳያስ አፈወርቂ ያሉ እምነት የለሽ፣ ጨካኝ ግለሰቦች ምክንያት ለሺሆች አመታት የነበረ ዝምድናና አንድነት ረስተን ለኤርትራውያን ወንድሞቻችን ጀርባ መስጠት የለብንም።

 

ኤርትራውያን ወንድሞቻችን ናቸው። ተዋልደናል፤ ተዛምደናል። ከጥቂት አመታት በፊት ኤርትራ የኢትዮጵያ ግዛት ነበረች። እግዚአብሄር ከፈቀደም እንደገና ልንገንኝ እንችላለን። ስለዚህ አንድን ሰው «ኤርትራዊ ነው፣ ትግሬ ነው፣ ኦሮሞ ነው ፣ ከዚህ ዘር ነው፣ ከዚህ ጎሳ ነው» ከሚል የደም ሃረግ ስንጠቃ ፖለቲካ መላቀቅ ያለብን ይመስለኛል። አንድ ሰው መመዘን ያለበት በሚሰራውና በሚናገረው ነገር ብቻ መሆን አለበት።

 

አቶ ኃይለማሪያም ደሳለኝ በሚሰሩትና በሚናገሩት ነገር መመዘን፣ ከአቶ መለስ ጋር የተመሳሰሉ ናቸው የሚል፣ በማንነትና በዘር ላይ ያተኮረ ሳይሆን፣ በተጨባጭ ፖሊሲዎቻቸው ላይ ያተኮረ አስተያየቶችን መሰንዘር ፣ አቶ ኃይለማሪያም መቃወምና መተቸት ተገቢ ነው። እዚያ ላይ ቅሬታ በፍጹም የለኝም።

 

አቶ ኃይለማሪያም ጠቅላይ ሚኒስቴር ከሆኑ ጀምሮ የሰጧቸው በርካታ ቃለ መጠይቆችን፣ ያቀረቧቸውን በርካታ ንግግሮች አድምጫለሁ። የተናገሩትን በሙሉ ስመዝነው፣ እምብዛም አቶ መለስ ከሚናገሩት የተለየ ሆኖ አላገኘሁትም። እነ እስክንድር ነጋን የመሳሰሉ ሰላማዊ ዜጎችን፣ «ሁለት ቆብ ያጠለቁ» ማለታቸው በጣም አስከፍቶኛል። በፓርላማ አቶ ግርማ ሰይፉ ላቀረቡት ጥያቄ የመለሱት መልስ አሳዛኝ ነው። «ሕገ መንግስት አላክብረም ብሎ ነፍጥ ካነሳ ከኦጋዴን ነጻ አውጭ ግንባር ጋር ኢሕአዴግ ለመነጋገር ፍቃደኛ ሆኖ፣ በሕግና በሰላም ከሚንቀሳቀሰው መድረክ ጋር ለመነጋገር ለምን ፍቃደኛ አይሆንም ? » ብለው አቶ ግርማ ሰይፉ ያልተወሳሰብ ግልጽ ጥያቄ ነው የጠየቁት። አቶ ኃይለማርያም የመለሱት መልስ ግን ውሃ የማይቋጥር ፣ ከወዲሁ የሚያስገምታቸው፣ አምነውበት ሳይሆን፣ ምናልባት «ለዚህ አይነቱ ጥያቄ ይሄን መልስ መስጠት ያስፈልጋል» የሚል ስምምነት ከሥራ ጓዶቻቸው ጋር ስለተስማሙ የመለሱት መልስ ይመስለኛል። ይህ አይነቱ መልስ ትልቅ ተስፋ ካደረገባቸው ሕዝብ ጋር ከወዲሁ ሊያጋጫቸው የሚችል እንደሆነም አስባለሁ።

 

እንደዚያም ሆኖ ግን አሁንም አቶ ኃይለማርያም ከአቶ መለስ በተለየ መልኩ አዎንታዊ ለውጦች ሊያመጡ ይችላሉ የሚል ተስፋ አለኝ። ይሄንንም ስል ያለ ምክንያት አይደለም።

 

በስፋት በአገር ቤት እየተወራ ያለ አንድ ጉዳይ አለ። የቀድሞ የኢትዮጵያ ቀዳማዊት እመቤት ወ/ሮ አዜብ መስፋን የአራት ኪሎ ቤተ መንግስትን ለመልቀቅ ፍቃደኛ አለመሆናቸው ነው። እንደሰማሁት «ወ/ሮ አዜብ ሃዘን ላይ ናቸው፣ ባለቤታቸውን አጥተዋል » በሚል አቶ ኃይለማርያም ወ/ሮ አዜብን በሃዘኔታ መጫን አልፈለጉም። «ሕዝቡ እኔን ምንም አያደርገኝም» በሚል ከዚህ በፊት እንደሚያደርጉት አጀባ ሳይበዛ ከቤታቸው ወደ ቢሯችው መመላለስ ፈለጉ። የደህንነት ሃላፊዎች አልተስማሙም። ፕሮቶኮል ስለሆነ አቶ ኃይለማርያም በሞተር ሳይክሎች እየታጀቡ እንዲሄዱ፣ መንገዶችምን መዝጋት ተጀመረ። ይሄን ጊዜ አቶ ኃይለማሩያም «ሕዝቡን አላንገላታም» በሚል፣ የትራፊክ መጨናነቅ እንዳይኖር፣ ጠዋት ከ11 ሰዓት (5 AM ) በፊት ወደ ስራቸው ይሄዳሉ፤ ማታ ደግሞ ከሥራቸው በጣም አምሽተው ይመለሳሉ።

 

ይህ መሆን ያልነበረበት ቢሆንም የአቶ ኃይለማርያምን ማንነት በትንሹ ሊያሳይ የሚችል ነው። እኝህ ሰው እንዲህ አይነት ሃዘኔታ ለሕዝቡ ካላቸው፣ ከአራት ኪሎ ሕዝቡን የማስጨነቅ፣ የማፈን፣ የማሰር፣ የማንገላታት ነገር ሊያበቃ የሚችልበት ሁኔታ ሊኖር እንደሚችል ያመላክታል። በፓርላማም ሆነ በአሜሪካ ድምጽ የተናገሯቸው አንዳንድ አሳዛኝ አባባሎች ቢኖሩም፣ ስልጣናቸውን በሚገባ እስኪያረጋግጡ፣ ደህንነቱን እና ወታደራዊ መዋቅሩን የሚቆጠጠሩ ጥቂት የኢሕአዴግ አክራሪ አመራሮችን ለጊዜው ለማለዘብ ሲሉ የተናገሯቸው እንጂ፣ የታሰሩ የሕሊና እስረኞችን ላለመፍታት፣ እንደ መድረክ ካሉ ደርጅቶችም ጋር ላለመነጋገር ከልብ ፍላጎትና ውሳኔ ኖሯቸው አይመስለኝም። ለዚህም በተቻለ መጠንም በኢሕአዴግ ውስጥ ሊኖር የሚችሉትን እንቅፋቶች አልፈው መሄድ እንዲችሉ፣ ትንሽ ጊዜ ብንሰጣቸውና ሊጠቅም ይችላል የሚል አስተያየት ያለኝ።

 

በነገራችን በዚህ አጋጣሚ ላይ የቀድሞዋ ቀዳማዊት እመቤት ወ/ሮ አዜብ መስፍን ፣ እያደረጉት ያለው ነገር፣ የርሳቸውን ብቻ ሳይሆን የሟቹ የአቶ መለስንም ክብር እያጎደፉ እንደሆነ ለመግለጽ እወዳለሁ። ወደ ተዘጋጀላቸው ቤት መሄድ ነበረባቸው። ከአራት ኪሎ ቤተ መንግስት አልወጣም ማለት አልነበረባቸውም። ይህ አቶ ኃይለማሪያምን መናቅ፣ ፓርላማውን መናቅ፣ የኢትዮጵያን ሕዝብ መናቅ ነው።

 

የደህንነት ሃላፊዎችም ከጅምሩ ይሄን አይነቱ ድራማ እንዲፈጠር ማድረግ አልነበረባቸውም። ለዚህ ሁሉ ውዝግብም ከወ/ሮ አዜብ መስፍን በላይ፣ በቀዳሚነት ተጠያቂ መሆን ያለባቸው እነርሱ ናቸው።

 

አቶ መለስ ዜናዊ ሞተዋል። ወ/ሮ አዜብ የቀድሞ ቀዳማዊት እመቤት እንጂ የአሁኗ ቀዳማዊት እመቤት አይደሉም። አራት ነጥብ። ከቤተ መንግስቱም በአስቸኳይ መልቀቅ አለባቸው። ይሄንን ካላደረጉ የደህንነት አባላት ሕግን የማስከበር ሃላፊነት አላባቸውና ሴትየዋን በኋይል የማስወጣት ግዴታ ይጠበቅባቸዋል።

 

በሚቀጥለው ጽሁፌ አቶ ኃይለማርያም በፓርላማ ባቀረቧቸው አንዳንድ ነጥቦች ላይ አስተያየቶችን በስፋት ይዤ እቀርባለሁ።

እስከዚያው ለሁላችንም ቸር ይግጠመን !


ግርማ ካሣ (This email address is being protected from spambots. You need JavaScript enabled to view it.)

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!