Total coronavirus cases in Ethiopia, June 7, 2020

በኢትዮጵያ የኮሮና ቫይረስ የሁኔታ መግለጫ (እሁድ ግንቦት 30 ቀን 2012 ዓ.ም.፤ በጤና ሚኒስቴር እና በኢትዮጵያ ሕብረተሰብ ጤና ኢንስቲትዩት የተዘጋጀ)

1510 የሚኾኑት የአዲስ አበባ ነዋሪዎች ናቸው

ኢዛ (እሁድ ግንቦት ፴ ቀን ፳፻፲፪ ዓ.ም. June 7, 2020)፦ በኢትዮጵያ የመጀመሪያው የኮሮና ወረርሽኝ ተጠቂ ከተገኘ ከሁለት ቀናት በኋላ ሦስተኛ ወሩን ይይዛል። ባለፉት ሦስት ወራት ውስጥ በተለይ በግንቦት ወር የተገኙት የተጠቂዎች ቁጥር በቀዳሚዎቹ ሁለት ወራት ከተገኙት በእጅጉ በልጦ ይታያል።

ዛሬ እሁድ ግንቦት 30 ቀን 2012 ዓ.ም. የወጣው መረጃ እንደሚያሳየው ደግሞ፤ በኢትዮጵያ የኮሮና ተጠቂዎች ቁጥር ከሁለት ሺህ በላይ የደረሰበት ሳምንት ኾኗል። ዛሬ ይፋ በተደረገ የጤና ሚኒስቴር ዕለታዊ መረጃ፤ ከ6 ሺህ 92 ሰዎች የላብራቶሪ ምርመራ ውስጥ 86 ሰዎች የኮሮና ቫይረስ ሲገኝባቸው፤ የሰባት ሰዎች ሕይወት ማለፉ ታውቋል።

ይህም በአጠቃላይ በኢትዮጵያ ቫይረሱ በምርመራ የተገኘባቸው ሰዎች ቁጥር 2 ሺሕ 20 መድረሱን አመላክቷል።

ባለፉት 24 ሰዓት ውስጥ ቫይረሱ በምርመራ ከተገኘባቸው ሰዎች ውስጥ፤ ሁሉም ሰዎች ኢትዮጵያውያን ሲሆኑ፤ ዕድሜያቸው ከ7 እስከ 87 ዓመት የኾኑ፤ 51 ወንዶች እና 35 ሴቶች ናቸው። ቫይረሱ በምርመራ ከተገኘባቸው ሰዎች ውስጥ 66 ሰዎች ከአዲስ አበባ ሲሆኑ፣ 1 ሰው ከአማራ ክልል፣ ሰባት ሰዎች ከትግራይ ክልል፣ ሰባት ሰዎች ከኦሮሚያ ክልል፣ ከደቡብ ክልል 4 ሰዎች፤ እንዲሁም ከድሬዳዋ ከተማ አስተዳደር አንድ ሰው ናቸው።

የዛሬውን የጤና ሚኒስቴር ሪፖርት ለየት የሚያደርገው ከሌላው ጊዜ በተለየ ዛሬ ከፍተኛ የሚባል ቁጥር ያለው ሞት መመዝገቡ ነው። የአዲስ አበባ ነዋሪዎች የኾኑ ሁለት ወንድ እና አራት ሴቶች እንዲሁም አንድ ሰው ከኦሮሚያ ክልል ሕይወት ማለፉ መገለጹ ነው።

ሕይወታቸው ካለፉት ሰባት ሰዎች መካከል አምስቱ በአስክሬን ላይ በተደረገ ምርመራ የኮሮና ቫይረስ እንደነበረባቸው የታወቁ ናቸው ተብሏል። በአጠቃላይ በቫይረሱ ሕይወታቸው ያለፈ ሰዎች ቁጥር 27 ደርሷል።

በትላንትናው ዕለት 63 ሰዎች ያገገሙ ሰሆን፣ በአጠቃላይ በኢትዮጵያ ከበሽታው ያገገሙ ሰዎች ቁጥር 344 ቢደርስም፤ በፀና የታመሙ ሰዎች ቁጥርም 32 ስለመድረሱ መረጃው ያመለክታል።

በዛሬው ሪፖርት መሠረት በአሁኑ ወቅት በአጠቃላይ በቫይረሱ ከተያዙት 2 ሺሕ 20 ሰዎች መካከል የአዲስ አበባ ነዋሪ የሆኑት 1510 ናቸው። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!