House of Peoples’ Representatives of the Federal Democratic Republic of Ethiopia

የኢትዮጵያ ፌዴራላዊ ዴሞክራሲያዊ ሪፑብሊክ የሕዝብ ተወካዮች ምክር ቤት

ምርጫውን ለማራዘም የቀረበውን የውሳኔ ሐሳብ አጸደቀ
የውሳኔ ሐሳቡ የጸደቀው በ114 ድጋፍና በአራት ተቃውሞ ነው

ኢዛ (ረቡዕ ሰኔ ፫ ቀን ፳፻፲፪ ዓ.ም. June 10, 2020)፦ የፌዴሬሽን ምክር ቤት የኮሮና ወረርሽኝ የአገሪቱ ሥጋት ኾኖ እስከቀጠለ ድረስ፤ ሁሉም የፌዴራልና የክልል ምክር ቤቶች ሥራቸውን እንዲቀጥሉና ስድስተኛው ምርጫም ወረርሽኙ ሥጋት አለመኾኑ ከተረጋገጠ በኋላ ከዘጠኝ ወር እስከ አንድ ዓመት ባለው ጊዜ እንዲካሔድ አጸደቀ።

የፌዴሬሽን ምክር ቤት አፈ ጉባዔዋ ኃላፊነቴን ለቅቄአለሁ ባሉ ማግሥት በተካሔደው መደበኛ ስብሰባው የፌዴራልና የክልል ምክር ቤቶች የኮሮና ቫይረስ ወረርሽኝ ሥጋት ኾኖ እስከቀጠለ ድረስ ሥራቸውን እንዲቀጥሉ በሚል የቀረበለትን የውሳኔ ሐሳብ ያጸደቀውም ዛሬ ሰኔ 3 ቀን 2012 ዓ.ም. ነው።

የፌዴሬሽን ምክር ቤት የሕገ መንግሥት ትርጉምና የማንነት ጉዳዮች ቋሚ ኮሚቴ ምርጫን ከማራዘም ጋር በተያያዘ የቀረበለትን የሕገ መንግሥት ትርጓሜ ጥያቄ ተገቢውን ምርመራ በማድረግ፤ ምርጫውን ለማራዘም የቀረበውን የውሳኔ ሐሳብ በአብላጫ ድምፅ አጽድቋል።

ስድስተኛውን አገር አቀፍ ምርጫ ለማራዘም የቀረበውን የውሳኔ ሐሳብም በ114 ድጋፍ፣ በአራት አባላት ተቃውሞው እና በአንድ ድምፀ ተአቅቦ በአብላጫ ድምፅ ጸድቋል።

ምርጫውን በማራዘሙ ውሳኔ ላይ የተደረሰበት ስምምነት ዓለም አቀፍና አህጉር አቀፍ የጤና ድርጅቶች ወረርሽኙን በተመለከተ የሚያወጡትን መረጃ መሠረት በማድረግ፤ የጤና ሚኒስቴር፣ የኢትዮጵያ ሕብረተሰብ ጤና ኢንስቲትዩት እና የሳይንስ ማኅበረሰብ አካላት ወረርሽኙ የሕዝብ ሥጋት አለመኾኑን ካረጋገጡ፤ ይህም በምክር ቤቱ ከጸደቀ አገራዊ ምርጫውን ከዘጠኝ ወር እስከ አንድ ዓመት ማካሔድ እንደሚቻል የውሳኔ ሐሳብ የቀረበበትም ነው።

በአብላጫ ድምፅ የጸደቀው ይህ ጉዳይ፤ ክርክር ማስነሳቱ ግን አልቀረም። ምርጫውን በዚህ መልኩ ማራዘምና ሕገ መንግሥት ትርጓሜ መጠየቁ አግባብ አይደለም የሚል መከራከሪያቸውን አቅርበው ነበር። ሕገ መንግሥቱ ምርጫ የሚካሔደው በየአምስት ዓመቱ በመኾኑ ይህንን መተርጎም አይቻልም በማለትም የገለጹ የፌዴሬሽን ምክር ቤት አባላት ነበሩ። ሒደቱ አሁን በሥልጣን ላይ ያለው መንግሥት ዕድሜውን ለማራዘም ያደረገው ነው ከማለትም በላይ፤ ምርጫውን በወቅቱ ለማካሔድ ፍላጎት አልነበረውም በማለት ተሟግተዋል።

ኾኖም ምርጫው ሊራዘም የቻለበትን ምክንያት ደግሞ በዝርዝር ያቀረቡ ሌሎች አባላት፤ አሁን ሥልጣን ላይ ያለው መግሥት ምርጫውን በተያዘለት የጊዜ ገደብ ለማካሔድ ቁርጠኛ እንደነበር በመጥቀስ፤ ምርጫው እንዲራዘም የቀረበውን የውሳኔ ሐሳብ ለተቃወሙ አባላት ምላሽ ሰጥተዋል። ቅድሚያ ለሕዝብ ጤንነት መስጠትም ወሳኝ በመኾኑ፤ የምርጫው መራዘም ተገቢነት ላይ ሐሳባቸውን ሰጥተዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!