20210302 adwa

የአዲስ አበባ ፖሊስ ኮሚሽን ኮሚሽነር ጌቱ አርጋው (ግራ) እና በሦስት ቀናት ውስጥ በአዲስ አበባ ከተያዙት ሕገወጥ መሣሪያዎች በጥቂቱ

የአዲስ አበባ ፖሊስ ኮሚሽን ኮሚሽነር ጌቱ አርጋው (ግራ) እና በሦስት ቀናት ውስጥ በአዲስ አበባ ከተያዙት ሕገወጥ መሣሪያዎች በጥቂቱ

242 የሕወሓት ተላላኪዎች ተይዘው ምርመራ እየተጣራባቸው ነው
በሦስት ቀናት 744 የጦር መሣሪያዎችና 4628 ጥይቶች ተይዘዋል

ኢዛ (ሐሙስ ኅዳር ፫ ቀን ፳፻፲፫ ዓ.ም. November 12, 2020)፦ የአዲስ አበባ ፖሊስ ኮሚሽን በከተማዋ በሦስት ቀናት በተደረገ ፍተሻና ብርበራ 744 የጦር መሣሪያዎች፣ 4628 ጥይቶች፣ እንዲሁም የሕወሓት ጁንታ ቡድንን ተልዕኮ ተቀብለው ለማስፈጸም ሲንቀሳቀሱ የተገኙ 242 ተላላኪዎችን መያዙን አስታወቀ። ሕወሓት (ኤፈርት) በሚያስተዳድረው ሱር ኮንስትራክሽን ድርጅት ውስጥ ደግሞ ለሕገወጥ ተልዕኮ ማስፈጸሚያ ሊውል የነበረ 115 ልዩ ልዩ የመገናኛ ራዲዮኖች (23ቱ ለረጅም እርቀት ወይም በትከሻ የሚታዘሉ)፤ የጦር መሣሪያዎች፣ 67 የስልክ ግንኙነቶችን ለመጥለፍ የሚያችል መሣሪያ፣ ከአንድ ግለሰብ ላይ 350 ሲም ካርዶች፣ በተለያዩ ተቋማት ስም የተቀረጹ 6 ማሕተሞች፣ አንድ ግለሰብ በተለያየ ስም ያወጣው 7 ፓስፖርቶች መያዛቸውን የአዲስ አበባ ፖሊስ ኮሚሽን ኮሚሽነር ጌቱ አርጋው ገልጸዋል።

“እኔ ከሞትኩ ሰርዶ አይብቀል” በሚል የስግብግብነት መንፈስ እና አገሪቱን እኔ ካልመራሁ ትፈራርሳለች በሚል ኋላቀር እሳቤ፤ እንዳሰበው ሳይሳካለት የሕልውናው ጀንበር የጠለቀችበት ከሃዲው የሕወሓት ጁንታ ቡድን፤ የከተማችንን ጸጥታ ለማደፍረስ ልዩ ልዩ ሴራዎችን ሸርቦ ተላላኪዎቹን በማሰማራት የተለያዩ እንቅስቃሴዎችን እያደረገ ይገኛል።

ቡድኑ ሕጋዊ የኾኑ ተቋማትን እና የንግድ ድርጅቶችን እንዲሁም ግለሰቦችን፤ በተለይ ደግሞ በልዩ ልዩ ምክንያት ከጸጥታ አካላት የተቀነሱ፤ እንዲሁም ያገኙት የነበረው ጥቅም በለውጡ ምክንያት የተቋረጠባቸው በኮንትሮባንድ ንግድ እና በሌሎች ሕገወጥ ተግባራት ላይ የተሰማሩ ግለሰቦችን በመጠቀም፤ አዲስ አበባ ኹከት እና ሥጋት ያንዣበበባት ከተማ እንድትኾን ለማድረግ የአቅሙን እየተፍጨረጨረ ነው።

የአዲስ አበባ ፖሊስ ኮሚሽን ኮሚሽነር ጌቱ አርጋው ኅዳር 3 ቀን 2013 ዓ.ም. በሰጡት መግለጫ የጸጥታ አካላት የዚህን ቡድን እንቅስቃሴ እግር በእግር በመከታተል ጥቅምት 30፣ ኅዳር 1 እና 2/2013 ዓ.ም. ለሦስት ቀናት ባደረጉት ጥብቅ ፍተሻና ብርበራ፤ 18 የእጅ ቦንብ፣ 485 ክላሽንኮብ ጠመንጃ፣ 3 ሳይለንሰር፣ 227 ልዩ ልዩ ሽጉጦች፣ 4628 ልዩ ልዩ ጥይቶች፣ 4 የጦር ሜዳ መነፅር፣ 1 ጂፒስ (GPS)፣ 2 ፀረ-ተሸከርካሪ ፈንጂ፣ ብዛቱ 74 ልዩ ልዩ የጸጥታ አካላት የደንብ አልባሳት እንደተያዘ አስታውቀዋል። በድምሩ 744 የተለያዩ የጦር መሣሪያዎችና 4628 የተለያዩ ጥይቶች ተይዞል።

ኮሚሽነሩ አያይዘውም በተለይ ከአገር መከላከያ ጋር በተደረገው ኦፕሬሽን ሥራ በቂርቆስ ክፍለ ከተማ በሚገኝ አንድ የኮንስትራክሽን ድርጅት ውስጥ ለሕገወጥ ተልዕኮ ማስፈጸሚያ ሊውል የነበረ 115 ልዩ ልዩ የመገናኛ ራዲዮኖች መያዙን፤ ከተያዙት የእጅ ራዲዮኖች መካከል 23 ለረጅም እርቀት ወይም በትከሻ የሚታዘሉ እንደኾኑና የተቀሩት 92 ደግሞ የእጅ መገናኛ መኾናቸውን ገልጸዋል። ከተያዙት የጦር መሣሪያዎች በተጨማሪ 67 የስልክ ግንኙነቶችን ለመጥለፍ የሚያችል መሣሪያ፣ ከአንድ ግለሰብ ላይ 350 ሲም ካርዶች፣ በተለያዩ ተቋማት ስም የተቀረጹ 6 ማሕተሞች፣ አንድ ግለሰብ በተለያየ ስም ያወጣው 7 ፓስፖርቶቸ መገኘቱን ኃላፊው ጨምረው ገልጸዋል።

ከተማችንን ለመረበሽ ተልዕኮ ወስደው ሲንቀሣቀሱ የተገኙ 242 የሕወሓት ተላላኪ ግለሰቦች ተይዘው ምርመራ እየተጣራበቸው መኾኑን ኮሚሽነሩ አስረድተዋል።

የጸጥታ ኃይሉ ጠንካራ እንቅስቃሴና ክትትል በተለይ ደግሞ ሕብረተሰቡ ከጸጥታ ኃይሉ ጋር በመኾን እያደረገ ያለው ድጋፍ ያስጨነቃቸው የሽብር ቡድኑ ተላላኪዎች፤ በሕዝብ ላይ ጉዳት ለማድረስ በአዲስ አበባ የተለያዩ ስፍራዎች በቀላሉ የሚፈነዱና የሚቀጣጠሉ ልዩ ልዩ የጦር መሣሪያዎችን በመጣል ላይ መኾናቸውን ከኮሚሽነሩ ገለጻ መረዳት ተችሏል።

በየካ ክፍለ ከተማ ወረዳ 7 ልዩ ቦታው አድዋ ድልድይ ተጥሎ የተገኘው ቦንብ ፈንድቶ በአንድ ሰው ላይ ያከተለውን ጉዳት በምሳሌነት ያነሱት ኮሚሽነሩ፤ በሦስት ቀናት ብቻ በአዲስ አበባ በተለያዩ ቦታዎች የተፈታቱና የተቆራረጡ ሁለት ክላሽንኮቭ ጠመንጃዎች፣ 90 የክላሽንኮቭ ጥይት፣ አንድ የጦር ሜዳ መነጽር፣ 5 ገጀራ ተጥለው መገኘታቸውን ተናግረዋል።

ባሳለፍነው ሳምንት የጸጥታ አካሉ ባደረገው አሰሳ በርካታ የጦር መሣሪያዎችን መያዙንና በሦስት ቀናት ብቻ ልዩ ልዩ የጦር መሣሪያዎች፣ የተለያዩ የቴሌኮም መገልገያ ቁሳቁሶች፣ የመገናኛ ራዲዮኖች መያዙ፤ እንዲሁም ፀረ-ሰላም ኃይሉ ሕጋዊ ድርጅቶችን ሽፋን በማድረግ መንቀሳቀሱ የጁንታው የተንኮል መረብ ምን ያክል የተወሳሰበ መኾኑን እና የሥልጣን ጥመኛው የሕወሓት ጁንታ ቡድን ከተማችንን ለማተራመስ፤ ሰላሟን ለማድፍረስ ምን ያክል አቅዶ እየሠራ መኾኑን ያሳያል ብለዋል ኮሚሽነሩ።

ከተማችን አዲስ አበባ ከሕወሓት ተላላኪዎች እና የጥፋት ተልዕኮአቸውን ከሚደግፉ ርዝራዦቻቸው ሙሉ ለሙሉ ነፃ ኾናለች ማለት ባያስደፍርም፤ የጸጥታ አካላት እና የሕዝቡ ተደጋግፎ የመሥራቱ ሕብረት ተጠናክሮ ሊቀጥል እንደሚገባ እና ሕብረተሰቡም ኾነ የጸጥታ አካላት ለአፍታም ቢኾን መዘንጋት እንደሌለባቸው ያሳሰቡት ኮሚሽነሩ፤ የሕወሓት ጀንበር መጥለቋ የሚያንገበግባቸው ጀሌዎች በከተማችን ወከባ፣ ችግር እና ግርግር እንደተፈጠረ እንዲሁም ከፍተኛ የጸጥታ ሥጋት እንዳለ አድርገው ማስወራታቸውን ሕብረተሰቡ ተግንዝቦ፤ ለጥፋት ቡድኑ ሐሰተኛ ፕሮፓጋንዳ ጆሮውን ሳይሰጥ፤ ከጸጥታ አካሉ ጋር ያለውን ጠንካራ ግንኙነት ይበልጥ ማጠናከር ይገባዋል ሲሉ መልእክታቸውን አስተላልፈዋል።

በመጨረሻም ተስፋ የቆረጡት እና መውጫ መግቢያ ያጡት የሕወሓት የጥፋት መልእክተኞች በየሜዳው የሚጥሏቸው የተለያዩ የጦር መሣሪያዎች በነዋሪዎች ላይ ድንገተኛ ጉዳት እንዳያደርሱ በግልጽም ኾነ በስውር የጦር መሣሪያ ተጥሎ የተመለከተ ወይም የጦር መሣሪያ ሊኾን ይችላል ብሎ የጠረጠረ ማንኛውም ግለሰብ ከማንሳት እና ከመንካት ተቆጥቦ በአቅራቢያው ለሚገኝ የጸጥታ አካል ማሳወቅ ይኖርበታል ብለዋል።

ኮሚሽኑ በከተማችን ወቅታዊ የጸጥታ ሁኔታዎችን አስመልክቶ ለሕብረተሰቡ የሚሰጠውን መረጃ አጠናክሮ እንደሚቀጥል ኮሚሽነር ጌቱ አርጋው ገልጸዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!