Ethiopia Zare (ረቡዕ መጋቢት 29 ቀን 2002 ዓ.ም. April 7, 2010)፦ ኢዴፓ ባሳለፍነው ሣምንት ሜክሲኮ አካባቢ በሚገኘው ተግባረ ዕድ አዳራሽ በጠራው ህዝባዊ 300 ከሚደርሱ ደጋፊዎቹ ጋር ውይይት ማድረጉ ታወቀ።

 

በስብሰባው የድርጅቱ ሊቀመንበር አቶ ልደቱ አያሌው ባሰሙት ንግግር “የኑሮ ውድነት በመቶዎች እጥፍ አድጓል፣ መንግሥት ከሁለት መቶ ብር የቆዳ ጫማ አንድ መቶ ሃያ ብር በታክስ ሂሳብ ይወስዳል፣ የኑሮ ውድነትን ያባባሰው ቫት ነው፣ ከ2500 - 3000 ብር የወር ደምወዝ የሚከፈላቸው የገዢው ፓርቲ ጥቂት የሆኑ ትልልቅ የመንግሥት ባለሥልጣናት የ2 ነጥብ 2 ሚሊዮን ብር ዘመናዊ አውቶሞቢል እያሽከረከሩ ነው” በማለት ማብራሪያ ከሰጡ በኋላ፤ ከተሰብሳቢው ለቀረበላቸው ጥያቄ ምላሽ መስጠታቸውን ለማወቅ ችለናል።

 

ወ/ሮ ሶፍያን እና አቶ ሙሼ ሰሙም በስብሰባው ተገኝተው የፓርቲያቸውን አቋም ለተሰብሳቢው አስረድተዋል።

 

አቶ ልደቱ ከአሁን በፊት ይወዳደሩበት የነበረውን አዲስ አበባን ጥለው በተወለዱበት ቡግና የመወዳደራቸው በሰጡት ምላሽ፤ “ከአዲስ አበባ ከተማ ወጥቼ በቡግና የምወዳደረው፣ ያ ቦታ ስም አጥፊዎች ማወናበድ የማይችሉበት ለም መሬት በመሆኑና የቡግናም ህዝብ ባለፉት 4 ዓመታት በተወለድኩበት አካባቢ እንድወዳደር ጥሪ ስላቀረበልኝ ነው” ብለዋል። “ዶ/ር ነጋሶ ከደምቢ ዶሎ መጥተው በአዲስ አበባ ሲወዳደሩ ዝም ተብሎ፤ እኔ በቡግና ዕጩ ሆኜ መቅረቤ ጥያቄ ውስጥ የገባው ለምንድነው?” ሲሉም ይሄን መሰሉ ጥያቄ በመቅረቡ የተሰማቸውን ቅሬታ ግልጽ አድርገዋል። “እኔ ትግሉን አልሸሸውም። ከህዝብ ጋር ነኝ። ህዝቡን የሸሹትማ አሜሪካ ነው ያሉት” ሲሉም ተደምጠዋል።

 

የኢዴፓው ሊቀመንበር አቶ ልደቱ አያሌው፤ በስብሰባው በፖለቲካ ተሳትፎ 23ተኛ ዕድሜያቸውን መጀመራቸውን፣ በሚቀጥለው ዓመት ራሳቸውን ከፓርቲያቸው መሪነት እንደሚያገሉ፤ ወጣቱ የኢትዮጵያን የፖለቲካ በትር መጨበጥ እንዳለበት፣ ሞት ካልሆነ በቀር የሚለየን የለም በማለት ቆብ የሚለዋውጡ ግራ ዘመም ፖለቲከኞች መወገድ እንደሚኖርባቸው፣ የኢትዮጵያ ህዝብ የአሜሪካንን ህዝብ ያህል 5 በመቶ እንኳ እንደማይደጎም፤ ይልቁንም በሀገሪቱ ሰው በረሃብ እየሞተ “ድጎማ አያስፈልግም” መባሉ ፌዝ መሆኑን፣ ፓርቲያቸው ቢመረጥ ከ30 ሺ ብር የማይበልጥ የዓመት ገቢ ያላቸውን ነጋዴዎች 50 እጅ ከመቶ ከገቢ ግብር ነፃ እንደሚያደርግ፣ የሠራተኛውን ህዝብ ዝቅተኛ መነሻ ደምወዝ 500 ብር እንደሚያደርግና ሌሎችንም ሃሳቦች የሰነዘሩ ሲሆን፤ “83 ሚሊዮን ህዝብ ባለባት ሀገር አቶ መለስ ዜናዊ የሚተካኝ የለም ብለው ማለታቸው ለኢትዮጵያ ህዝብ ስድብ ነው” ብለዋል።

 

ኢዴፓ ህዝባዊ ስብሰባውን በተለያዩ የሀገሪቱ ክፍሎች በተለይም በባህር ዳር፣ ጎንደርና የተለያዩ ክፍሎች ለመቀጠል ዕቅድ እንዳለው ይፋ አድርጓል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!