Ayele Chamiso

አቶ አየለ ጫሚሱ የሚመሩት ቅንጅት ለምርጫ ቦርድ ያቀረቡትን የመሥራች አባላት ዝርዝርና የፊርማ እውነተኝነት ፖሊስ ሊያጣራ ነው

ምርጫ ቦርድ ለናሙና ከመረመረው 50 ፊርማዎች 49ኙ ያልፈረሙ ናቸው ብሏል

ኢዛ (ቅዳሜ የካቲት ፳፰ ቀን ፳፻፲፪ ዓ.ም. March 7, 2020)፦ በአቶ አየለ ጫሚሶ የሚመራው ቅንጅት ለአንድነትና ለዴሞክራሲ ፓርቲ (ቅንጅት) ለምርጫ ቦርድ ካቀረበው የመሥራች አባላት ፊርማ ዝርዝር ጋር በተያያዘ ያልፈረሙ እንደፈረሙ ተደርጎ በመቅረቡ፤ የኢትዮጵያ ብሔራዊ ምርጫ ቦርድ ሰነዱን የፌዴራል ፖሊስ እንዲያጣራለት መላኩን አስታወቀ።

ቦርዱ የካቲት 27 ቀን 2012 ዓ.ም. እንዳስታወቀው ቅንጅት ለቦርዱ የመሥራች አባላት ፊርማ የያዘ ሰነድ ያቀረበ ሲሆን፣ ቦርዱ ባደረገው ማጣራት ጥሪ ካደረገላቸው 50 ፈራሚዎች መካከል አንዱ ብቻ ፈርሞ ሲገኝ 49ኙ ግን በተለያዩ ምክንያት ፊርማቸውን አለማኖራቸውን በማረጋገጡ ነው ጉዳዩ እንዲጣራ ለፖሊስ መላኩን አስታውቋል።

ቦርዱ የእነዚህን ፈራሚዎች ጉዳይ ብቻ ሳይሆን፤ ፓርቲው ካቀረባቸው አንዳንድ ሰነዶች ላይም ያገኘውን ክፍተት አመልክቷል።

በመኾኑም ቅንጅት ያቀረባቸው የመሥራች አባላት ፊርማ ትክክል ለመኾናቸው ለማረጋገጥ ባለመቻሉ፤ የፌዴራል ፖሊስ ጉዳዩን ተመልክቶ ሕጋዊ ማጣራት እንዲያደርግለት ዝርዝሩን ለፖሊስ ማስተላለፉንም አስታውቋል።

ቦርዱ በዚህ ጉዳይ ላይ የሠጠው መረጃ የሚከተለው ነው። (ኢዛ)

የኢትዮጵያ ብሔራዊ ምርጫ ቦርድ ቅንጅት ለአንድነትና ለዴሞክራሲ ፓርቲ (ቅንጅት) መሥራች አባላት ስም ዝርዝርን እንዲያጣራ ለፌደራል ፖሊስ ኮሚሽን ጥያቄ አቀረበ።

የኢትዮጵያ ብሔራዊ ምርጫ ቦርድ በቀድሞ አዋጅ ተመዝግበው የሚገኙ የፓለቲካ ፓርቲዎች በአዲሱ ሕግ ላይ የተቀመጡትን መስፈርቶች እንዲያሟሉ መጠየቁ ይታወሳል። በዚህም መሰረት ቅንጅት ለአንድነትና ለዴሞክራሲ በአዲሱ አዋጅ በተደነገገው መሰረት 7,214 (ሰባት ሺህ ሁለት መቶ አስራ አራት) ተጨማሪ መሥራች የፓርቲ አባላትን አስፈርሞ እስከ መጋቢት 3 ቀን 2012 ዓ.ም ድረስ እንዲያቀርብ ተገልጾለት ነበር።

ፓርቲው ጥር 26 ቀን 2012 ዓ.ም. ከ8 ክልሎች የተሰበሰበ የመሥራች አባላት ፊርማ የያዘ ሰነድ ለቦርዱ አቀርቧል። በመኾኑም የቀረበው ሰነድ ላይ የሚከተሉትን ቦርዱ አስተውሏል።

- ቦርዱ ከእያንዳንዱ ገጽ ላይ በተወሰደና ወካይ ሊሆን የሚችል ናሙና ባደረገው ማጣራት፣ ጥሪ ካደረገባላቸው 50 ፈራሚዎች መካከል፣ አንዱ ብቻ ፈርሞ ሲገኝ 49ኙ ግን በተለያየ ምክንያት ፊርማቸውን አለማኖራቸውን አረጋግጧል። (አብዛኛው የተሳሳተ ስልክ ነው፣ አልፈረምኩም የሚሉ ምላሾችና የማይሠራ መስመር ኾነው ተገኝተዋል)፤

- የፓርቲው ማመልከቻ ላይ የፓርቲው ሊቀመንበር ቢፈርሙም፣ የተሰበሰበው ፊርማ ቃለ መሃላ ላይ የፈረመው ሌላ ግለሰብ መኾኑን፣ ኃላፊነቱም አለመገለጹን፤

- የአያት ስም ያላስመዘገቡ፣ ስለአባልነታቸው በፊርማቸው ያላረጋገጡ፣ ዕድሜ፣ ጾታ፣ የምዝገባ ቀናቸው የማይታወቅ ፈራሚ ስሞችም በጉልህ ተገኝተዋል።

በአዋጅ ቁጥር 1162/2011 እና አዋጁን ለማስፈጸም የወጣው አዋጅ መሠረት በአባልነት ያልተመዘገበን ሰው የተመዘገበ በማስመሰል፤ የሌለን ሰው እንዳለ ማስመሰል፤ ሐሰተኛ ስምና ፊርማ ማዘጋጀት በጥብቅ የተከለከለ ነው። በአዋጁ መሠረት ቦርዱ ሊወስድ ከሚችላቸው ምዝገባን ከመከልከልና ከማገድ በተጨማሪ፤ አግባብ ባለው የወንጀል ሕግ መሠረትም ሊጠየቅ እንደሚችል የሕጉ ድንጋጌዎች ያዛሉ።

ቦርዱ ከላይ ከተጠቀሱት ምክንያቶች በመነሳት ቅንጅት ለአንድነትና ለዴሞክራሲ ፓርቲ (ቅንጅት) ያቀረባቸው የመሥራች አባላት ፊርማ ስም ትክክለኛ ለመኾናቸው ማረጋገጥ አልቻለም። ስለዚህም የፌደራል ፓሊስ ኮሚሽን ጉዳዩን ተመልክቶ ሕጋዊ ማጣራት እንዲያደርግ በዛሬው ዕለት የካቲት 27 ቀን 2012 ዓ.ም አስተላልፏል።

የኢትዮጵያ ብሔራዊ ምርጫ ቦርድ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!