Hachalu Hundessa

አርቲስት ሐጫሉ ሁንዴሳ

በሐረር የራስ መኮንን፣ በሎንዶን የቀዳማዊ ኃይለሥላሴ ሐውልቶች ፈርሰው ተሰባበሩ

ኢዛ (ማክሰኞ ሰኔ ፳፫ ቀን ፳፻፲፪ ዓ.ም. June 30, 2020)፦ የአርቲስት ሐጫሉ ሁንዴሳን ግድያ ተከትሎ ከትናንትና ምሽት ጀምሮ በተለይ በአዲስ አበባ አንዳንድ አካባቢዎች ተረብሸው ያደሩ ሲሆን፣ ንጋት ላይ ደግሞ አዲስ አበባን ጨምሮ በተለያዩ የኦሮሚያ ክልል ከተሞች በርካታ ሰዎች ሕይወታቸው ማለፉ ተነገረ።

በአዲስ አበባ ከትናንት ምሽት ጀምሮ ከፍተኛ ተኩስ በተለያዩ የከተማይቱ ክፍለ ከተሞች ሲደመጥ የነጋ ሲሆን፣ በዛሬው ዕለት ማክሰኞ ሰኔ 23 ቀን ደግሞ አንድ ፖሊስን ጨምሮ የሰዎች ሕይወት ከማለፉም በተጨማሪ ለጊዜው ግምቱ ያልታወቀ ንብረት መውደሙን ለመረዳት ችለናል። በከተማይቱ ኃይለኛ የተኩስ ድምፅ ሲሰማ የዋለ ሲሆን፣ ፖሊስ ለተቃውሞ የወጡትን ለመበተን አስለቃሽ ጭስ መጠቀሙ ታውቋል።

የአርቲስት ሐጫሉን አስከሬን ከአዲስ አበባ ወደ ትውልድ ስፍራው አምቦ ከተማ በመኪና ለመሸኘት የነበረውን ሒደት ለተቃውሞ የወጡት ወገኖች የአስክሬን ሽኝቱን ማስተጓጎላቸውንና፤ የአስከሬኑን የጫነው መኪና ከአዲስ አበባ እንዳይወጣ ጥረት ሲያደርጉ እንደነበር ታውቋል። የወላጆቹ መኖሪያ ቤት ወደሚገኙበት አምቦ ከተማ ልዩ ስሙ ቶርበን ኩታዬ ወደሚባለው ቀበሌ አስከሬኑን ለመሸኘት መንግሥት ሔሊኮፕተር ለመጠቀም መገደዱን ገልጿል።

ሐረር ከተማና በአንዳንድ የኦሮሚያ ከተሞች በአምቦ፣ በአርሲ ኔጌለ፣ በሻሸመኔ፣ በዝዋይ ከፍተኛ ረብሻ የነበረ ሲሆን፣ በቤትና በንብረት ላይ ጥፋት መድረሱን ከአካባቢው የሚወጡ መረጃዎች ያመላክታሉ።

በሐረር ከተማ የሚገኘው የራስ መኮንን ሐውልትን በማፍረስና በመሰባበር የተቃጠለ ሲሆን፣ በሻሸመኔ የኃይሌ ሕንጻ መቃጠሉም ተደምጧል።

ከዚሁ ጋር በተያያዘ በዛሬው ዕለት በእንግሊዝ ዋና ከተማ ሎንዶን ልዩ ስሙ ዊምብልደን ኮመን ተብሎ በሚጣራው አካባቢ የነበረውን የቀዳማዊ ኃይለሥላሴን ሐውልት ጥቂት ወጣቶች ያፈረሱትና ሲሰባብሩት የሚያሳይ ቪዲዮ ፌስቡክና በማኅበራዊ ሚዲያዎች ተሰራጭቷል።

ከዚህም በተጨማሪ በሎንዶን በሚገኘው የኢትዮጵያ ኤምባሲ ደግሞ በተመሳሳይ ሁኔታ ተቃውሞ ከማሰማት ባሻገር የኢትዮጵያን ባንዲራ በማውረድና የኦነግን ባንዲራ በመስቀል፣ እንዲሁም ኤምባሲው በሚገኝበት ሕንጻ ሥር የነበረ አንድ ግለሰብን ለመምታት ጥረት ሲያደርጉ የሚያሳይ ቪዲዮ በማኅበራዊ ሚዲያ የተሰራጩት ቪዲዮዎች ያመላክታሉ። በኤምባሲው መግቢያ ላይ ሁለት የእንግሊዝ የጥበቃ ሠራተኞች ጥበቃ ሲያደርጉ እንደነበረ ከቪዲዮዎቹ ለመረዳት ተችሏል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!