Ethiopia Zare (ማክሰኞ መጋቢት 22 ቀን 2001 ዓ.ም. March 31, 2009)፦ ከወራት በፊት ራሳቸውን ከገደሉት ባለሀብቶች ውስጥ የ”ጌታነህ ትሬዲንግ” ባለቤት የነበሩትን የአቶ ዮሐንስ ጌታነህ ንብረት አቢሲኒያ ባንክ በ58 ነጥብ 5 ሚሊዮን ብር ዕዳ የሐራጅ ሽያጭ አወጣበት።

 

አቶ ዮሐንስ ጌታነህ የጌታነህ ትሬዲንግ ባለቤት ሲሆኑ፣ ምን እንደሆነ ባልታወቀ ምክንያት በመኖሪያ ቤታቸው ውስጥ ራሳቸውን በሽጉጥ ገድለው ተገኝተዋል። ምንጮቻችን እንደገጹት ለሞት ያበቃቸው ምክንያት ከአቢሲኒያ ባንክ የተበደሩትን በርካታ ገንዘብ መክፈል ስላቃታቸውና ከባንኩ ጋር በፍርድ ቤት የያዙት ክርክር ውሳኔው በመቃረቡ ምክንያት ነው።

 

ባንኩ ለፌደራል ከፍተኛ ፍርድ ቤት ያቀረበው ክስ ክርክር ቀጥሎ መጨረሻ በተሰጠው ውሳኔ አቶ ዮሐንስ ጌታነህ በድርጅቶቻቸው በ”ጌታነህ ትሬዲንግ” እና በ”ጌታነህ ኃላፊነቱ የተወሰነ የግል ማኅበር” እንዲሁም በመንድማቸው አቶ አጥናፉ ጌታነህ ስም ያስያዟቸው ስምንት ቤቶችና መጋዘኖች በሐራጅ ሊሸጡ ነው። የንብረቶቹ የጨረታ መነሻ ዋጋም 58 ነጥብ 5 ሚሊዮን ብር ነው።

 

አቶ ዮሐንስ ጌታነህ ኢትዮጵያ ውስጥ በከፈቱት ፋብሪካ የተለያዩ ልብሶችን በአነስተኛ ዋጋ እያመረቱ ለገበያ ያቀርቡ የነበረ ሲሆን፣ ለተለያየ ምርት የሚያገለግሉ ጥሬ ዕቃዎችንም ያቀርቡ ነበር።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!