አዛለች ወደ ፓርላማ (የምርጫ ጭውውት)

አዛለች ወደ ፓርላማ (የምርጫ ጭውውት)

ክፍል ሦስት

ዳግማዊ ዳዊት

ባላፈው መጋቢት - የአቦለት ቤተክሲያን

ጠጋ ብዬ ጠየቅሁ - ወረቀት ሲበተን

እንዲህ ይነበባል - በራሪው ወረቀት

ከላይ ምርጫ ብሎ - ከታች ንብ አለበት፤

አዛል ምርጫ ገባች- ሹርባ ተሰርታ

መረራ ጉዲናን - በድምፅ ልትረታ

ኢህአዴግ ፓርቲዋን - ወክላ ቀርባለች

ልማታዊቷ ሴት ምረጡኝ - ትላለች።

 

ፎቶውን አይቸ -

አንገቴን አቅንቸ

መፈለግ ጀመርኩኝ - አዛሉን ጓጉቸ።

መስቀል ሲሳለሙ - አየኋችውና - ለብሰው ጃኖ ኩታ

መንገዴን ቀጠልኩኝ - ከቆሙበት ቦታ።

“ዶ/ር አዛሉ! ዶ/ር …” - ብዬ ስጠራችው

የፌደራል - ፖሊስ ወገቤን ዠለጠው

“አተ… አታ ባለጌ” - ብሎ ሲጮህብኝ

መሬት ተሰንጥቃ - ትውጠኝ ተመኘሁኝ።

እኝህማ አዛሉ - እኔ የማውቃቸው

ጠላ ኮማሪዋ - አይደሉ እንዴ እሳቸው።

ፖሊስ ቢዠልጠኝ - በያዘውም ዱላ

ምን ሊባል - ይገባል ከብልግና ሌላ

እንዲህ ያለ - ጥሪ “ዶክተር!” ብሎ ማለት

ስድብ ብቻ ሳይሆን - ብልግናም አለበት

ከአንድም ሁለት ጊዜ - ለቀበሌ ሸንጎ

ራቦል ጥፌያልሁ - ለአዛለች ሽመኮ

ማንበብና መፃፍ - የማያውቁትን ሴት

ዱላ እማይበቃው ነው - ዶክተር ብሎ መጥራት

ፖሊስ አዋከበኝ - ዶለኝ ወኸኒ ቤት

አዋርዷል ተብዬ - ልማታዊቷን ሴት።

************

ሁለት ወር ታስሬ - የተፈታሁኝ ቀን

አሸነፉን ሰማሁ - አዛሉ መረራን።

የሰፈራችን ሹም - የወያኔው ኔጭ ሹም

እንዲህ አርጎ አሰማኝ - መቸም ጉድ አያልቅም።

“የሰፈር ወይዘሮ - የጠላ ኮማሪ

የትናንት ልማት ሴት - ሥራን አስተማሪ

ማንበብ መጻፍ ባይኖር - ማይምም ቢሏቸው

ሀገር መገንባትን - ዲሞክራሲ አውቀው

የመንግሥት አመራር - በደንብ ገብቷቸው

አዛሉ ዶከተሩን - ጥለው አሳይዋቸው

ፖለቲካ ሳይንስ - ዓለም አቀፍ ቢሉ

ዶክተር መረራ ነኝ - የታወቅሁት ቢሉ

መረራ ተረታ - ድል ሆነ በአዛሉ።

ወይዘሮ አዛለች ነች - የሆነች አንበሳ

እንግዲህ በጀ በል - አምቦም እጅ ንሳ።

አሜሪካን ሀገር ያለሽው ሂላሪ

ይልቅስ ነይና - ከአዛለች ተማሪ።”

በስጨትጨት ብየ - እልሄ መጣና

መናገር ጀመርኩኝ - ተራዬ ሆነና።

“ገና ዱሮ ነበር - ያኔ ሳይወጠን

አልነጋም ያልናቸው - የዛሬውን አይተን።

 

መለስ ወንፊት ሰፍቶ - ማበጠር አቅዶ

ልደቱ እህል ሆኖ - ኃይሉም ገብቶ ወዶ

ይኸው ተበጠረ - መረራም ወረደ

ግፍም ሕግ ሆነና - ውሸት ተለመደ።”

ብዬ ተናግሬ - ልጨምር ስሞክር

ስውር ፖሊስ ኖሮ - ከነጭ ለባሹ ጋር

ሽጉጡን አውጥቶ - እያንገራገረ - ማጅራቴን ይዞ

እስር ቤት ጨመረኝ - በመኪና አግዞ።

ግንቦት 2002

This email address is being protected from spambots. You need JavaScript enabled to view it.