Jawar Mohammed (L), Bekele Gerba (M) and Hachalu Hundessa (R)

አቶ ጃዋር መሐመድ (በግራ)፣ አቶ በቀለ ገርባ (መኻል) እና አርቲስት ሐጫሉ ሁንዴሳ (በቀኝ)

በኹከቱ 78 ሰዎች ሕይወታቸውን አጥተዋል

ኢዛ (ሐሙስ ሰኔ ፳፭ ቀን ፳፻፲፪ ዓ.ም. July 2, 2020)፦ አቶ ጃዋር መሐመድ እና አቶ በቀለ ገርባ የአርቲስት ሐጫሉ ሁንዴሳን ግድያ ተከትሎ ለበርካቶች ሞት ምክንያት የኾነውን ኹከት በመቀስቀስ እና በሰው ሕይወት ማጥፋት ተጠርጥረው ዛሬ ሐሙስ ሰኔ 25 ቀን 2012 ዓ.ም. ፍርድ ቤት ቀረቡ።

የአርቲስት ሐጫሉ ሁንዴሳን ግድያ ተከትሎ በአቶ ጃዋር መሐመድ የሚመራው ቡድን ባለፈው ማክሰኞ ሰኔ 23 ቀን 2012 ዓ.ም. የአርቲስቱን አስክሬን ሽኝት በማሰናከላቸውና ከአቶ ጃዋር ጋር ከነበሩና ከታጠቁ ኃይሎች በተተኮሰ ጥይት አንድ የኦሮሚያ ፖሊስ ልዩ ኃይል ባልደረባ ከተገደለ በኋላ ነበር 35 ሰዎች በቁጥጥር ሥር የዋሉት።

ይህንኑ ተከትሎ ፖሊስ አቶ ጃዋር መሐመድን እና አቶ በቀለ ገርባን በዛሬው ዕለት በአዲስ አበባ የፌዴራሉ ከፍተኛ ፍርድ ቤት አቅርቧቸው የነበረ ሲሆን፤ ፍርድ ቤቱ ለፖሊስ ተጨማሪ ቀጠሮ መስጠቱ ታውቋል። የፌዴራሉ ከፍተኛ ፍርድ ቤት አቶ ጃዋር መሐመድን ለሐምሌ 9 ቀን 2012 ዓ.ም. የቀጠረ ሲሆን፤ አቶ በቀለ ገርባን ደግሞ ለሐምሌ 6 ቀን 2012 ዓ.ም. ፍርድ ቤት እንዲቀርቡ ቀነ ቀጠሮ መስጠቱንና ግለሰቦቹ ወደ ማረፊያ ቤት እንዲመለሱ መደረጉን የመንግሥት መገናኛ በዙኀን ዘግበዋል።

በአዲስ አበባና በኦሮሚያ ክልል የአርቲስት ሐጫሉ ሁንዴሳን ግድያ ተከትሎ ሕይወታቸው ያለፉት ሰዎች ቁጥር 78 መድረሱን በመንግሥት ኃላፊዎች የተነገረ ቢሆንም፤ አንዳንድ ወገኖቹ የሟቾች ቁጥር ከዚህ ከፍ ያለ መኾኑን እየገለጹ ይገኛሉ። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!