TPLF and PM Abiy Ahmed

ጠቅላይ ሚኒስትር ዶ/ር ዐቢይ አሕመድ መከላከያ ሕወሓትን እያሸነፈና ሕግ እያስከበረ መኾኑን ገለጹ

መከላከያ ሠራዊት ወደ መቀሌ እያመራ ነው

ኢዛ (ቅዳሜ ኅዳር ፲ ቀን ፳፻፲፫ ዓ.ም. November 19, 2020)፦ የኢትዮጵያ መከላከያ ሠራዊት ዛሬ አዲግራትን ከሕወሓት ኃይል ሙሉ ለሙሉ ነፃ ማውጣቱን ጠቅላይ ሚኒስትር ዶ/ር ዐቢይ አሕመድ በማኅበራዊ ትስስር ገጻቸው ከጥቂት ደቂቃዎች በፊት ይፋ አደረጉ። የአስቸኳይ ጊዜ አዋጅ የመረጃ ማጣሪያ በበኩሉ “የመከላከያ ሠራዊታችን በአሁኑ ጊዜ ወደ መቀሌ እያመራ ነው” በማለት አስታውቋል።

በትናንትናው ዕለት የአገር መከላከያ ሠራዊት አክሱምን ሙሉ ለሙሉ ከሕወሓት ነፃ አድርጎ የአዲግራትን ዙሪያ መቆጣጠሩን ተከትሎ ተጨማሪ ድል በሕወሓት ላይ መቀናጀቱ ታውቋል። ከዚህም ባሻገር በአሁኑ ሰዓት ወደ መቀሌ እያመራ ነው።

ከጠቅላይ ሚኒስትሩ መልእክት መረዳት እንደተቻለው፤ የፌዴራል መንግሥቱ እስካሁን በእጁ በስገባቸውና ሙሉ ለሙሉ በተቆጣጠረባቸው ከተሞችና አካባቢዎች የሚኖሩ ዜጎች ወደ የዕለት ተዕለት እንቅስቃሴያቸው ተመልሰዋል። በአካባቢዎቹም የጸጥታ ኃይሎች ለዜጎች ጥበቃ እያደረጉላቸው መኾኑንም ዶ/ር ዐቢይ ገልጸዋል።

በእነዚህ ከሕወሓት ነፃ በወጡ አካባቢዎች ያለውን ተጨባጭ ሁኔታ የሚያጣራ የልዑካን ቡድን ከፌዴራል መንግሥት መላኩን ያስታወቁት ጠቅላይ ሚኒስትሩ፤ ቡድኑ ተመጣጣኝ እና ወቅታዊ ድጋፍ ለአካባቢውና ለነዋሪዎቹ ለማቅረብ የሚያስችል መረጃ እንደሚያሰባስብ አስረድተዋል።

ይኸው ቡድን በጦርነቱ ምክንያት መኖሪያ ቀዬአቸውን ጥለው ለስደት የተዳረጉ ዜጎችን በሙሉ ወደ ነበሩበት ለመመለስና መልሶ ለማቋቋም ይቻል ዘንድ ባለድራ ናቸው ከተባሉ አካላት ጋር እየሠራ እንዳለና በዚህ ሥራው እንደሚቀጥልም ዶ/ር ዐቢይ ካስተላለፉት መረጃ ለመረዳት ተችሏል።

ጠቅላይ ሚኒስትሩ በዚሁ መልእክታቸው ማሳረጊያ ላይ፤ “የፌደራል መንግሥት ለትግራይ ሕዝብ አጠቃላይ ደኅንነት እና ጤንነት ከፍተኛ ዋጋ የሚሰጥ ስለኾነ፤ በትግራይ ክልል መረጋጋት እንዲሰፍን እና ዜጎቻችን ከጉዳት እና እጦት ነፃ እንዲኾኑ አስፈላጊውን ሁሉ እናደርጋለን።” በማለት ለትግራይ ሕዝብና ለመላው ኢትዮጵያውያን ገልጸዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!