ምርጫ ቦርድ፣ አቶ ዳውድ ኢብሳ፤ እገዳውን ካሳለፉት አመራሮች ሦስቱ

ምርጫ ቦርድ (ዓርማ)፣ ከኦነግ ሊቀመንበርነታቸው የታገዱት አቶ ዳውድ ኢብሳ (በቀኝ)፤ እገዳውን ካሳለፉት አመራሮች ሦስቱ (በግራ)

ሁለቱ ቡድኖች በጋራ ስብሰባ ይቀመጡ ብሏል

ኢዛ (ዓርብ ታኅሣሥ ፱ ቀን ፳፻፲፫ ዓ.ም. December 18, 2020)፦ በኦነግ ሊቀመንበር እና በሌሎች የኦነግ የአመራር አባላት መካከል በተፈጠረው አለመግባባት ላይ ከሁለቱም ወገኖች የቀረቡለትን መረጃዎች በመመርመር ውሳኔ ማሳለፉን የኢትዮጵያ ብሔራዊ ምርጫ ቦርድ አስታወቀ።

በሁለቱም ወገኖች በኩል የቀረቡት መረጃዎች የየራሳቸው ምልከታ ያላቸው በመኾኑ፤ ያለመግባባቱ የሥራ አስፈጻሚ አካላቱ ኃላፊነታቸውን ለመወጣት ስላላስቻላቸው ሁለቱም ቡድኖች በጋራ ጠቅላላ ጉባዔያቸውን እንዲያከናውኑ ወስኗል።

ይህንን ጠቅላላ ጉባዔም በኢትዮጵያ ምርጫ ቦርድ የስብሰባ አዳራሽ እንዲያከናውኑ መፍትሔ ያለውን ውሳኔ ማሳለፉን ቦርዱ አመልክቷል።

ቦርዱ በኦነግ አመራር አባላት መካከል የተፈጠረውን ችግርና የቡድኖቹን ጥያቄዎች፤ እንዲሁም ውሳኔውን የሚያሳየው ዝርዝር ሙሉ መግለጫ የሚከተለው ነው። (ኢዛ)

የኢትዮጵያ ብሔራዊ ምርጫ ቦርድ የኦሮሞ ነፃነት ግንባር (ኦነግ) አመራር አባላት መካከል የተፈጠረ አለመግባባትን አስመልክቶ የተሰጠ ውሳኔ

የኢትዮጵያ ብሔራዊ ምርጫ ቦርድ ከኦሮሞ ነፃነት ግንባር አመራር አካላት መካከል ተፈጠረውን አለመግባባት አስመልክቶ የተለያዩ አቤቱታዎች ሲደርሱት እንደነበር ይታወቃል።

የፓርቲው የተወሰኑ የሥራ አስፈጻሚ አባላት ነኀሴ 01 ቀን 2012 ዓ.ም. በተጻፈ እና በድርጅቱ ምክትል ሊቀመንበር በተፈረመ ደብዳቤ የድርጅቱን ሊቀመንበር መታገዳቸውን ለቦርዱ አሳውቀዋል። ከዚህም በተጨማሪ የድርጅቱ አመራር ላይ ተከታታይ አቤቱታዎች አስገብተዋል።

በሌላ በኩል የድርጅቱ ሊቀመንበር መስከረም 02 ቀን 2013 ዓ.ም. ድርጅቱ ብሔራዊ ምክር ቤት ስብሰባ አድርጎ የፓርቲውን ምክትል ሊቀመንበር፣ የሥራ አስፈጻሚ ኮሚቴ አባላትን፤ እንዲሁም የማዕከላዊ ኮሚቴ አባላት እስከሚቀጥለው የድርጅቱ ጠቅላላ ጉባዔ ድረስ ከኃላፊነታቸው ታግደው እንዲቆዩ እንደወሰነ ለቦርዱ አሳውቀዋል።

በፖለቲካ ፓርቲ አባላት መኻከል አለመግባባት ሲከሰት እና ለቦርዱ አቤቱታ ሲቀርብለት በአዋጅ ቁጥር 1162/11 አንቀፅ 74 ንዑስ አንቀጽ 6 መሠረት ጉዳዩን ተመልክቶ የውሳኔ ሐሳብ የሚያቀርብ የባለሙያዎች ጉባዔ የማቋቋም ሥልጣን አለው። በሕግ የተሰጠውን ሥልጣን መሠረት በማድረግ የሁለቱንም ቡድኖች ደብዳቤዎች እና አቤቱታዎች የሚያይ የባለሞያዎች ኮሚቴ ለማቋቋም ውሳኔ አሳልፎ እንደነበር ይታወሳል። በዚህም መሠረት በእነ አቶ አራርሶ በኩል ባለሞያ ቢመድቡም፣ በእነ አቶ ዳውድ በኩል ባለሞያ ለመመደብ ፍቃደኛ ካለመኾናቸውም በላይ፤ የፓርቲው የውስጥ ደንብ መሠረት መጠናቀቅ ያለበት ጉዳይ ነው በማለት መልስ ሰጥተዋል። ከዚህም በተጨማሪ ቦርዱ ይህንን ጉዳይ ለማየት ፍቃደኛ የኾነ ባለሞያ ለማግኘት አልቻለም። በመኾኑም ቦርዱ በራሱ ጉዳዩን መርምሮ ለመወሰን ተገዷል።

ቦርዱ ጉዳዩን በመመርመር ሒደት በሁለቱም ወገን ያሉ የፓርቲው አመራሮችን አነጋግሯል። ሁለቱም ወገኖች የጠቀሱት የፓርቲው ሥነሥርዓት እና ቁጥጥር ኮሚቴንም ጠርቶ አወያይቷል። በውይይቱም ወቅት የፓርቲው ሥነሥርዓት እና ቁጥጥር ኮሚቴ ከላይ በተጠቀሱ እግዶች ዙሪያ ውሳኔ መስጠት እንደማያስፈልገው ገልጿል። ከዚህም በመነሳት በአመራሮቹ መካከል ያለው አለመግባባት በፓርቲው ውስጥ እንደማይፈታ እና የቦርዱን ውሳኔ እንደሚፈልግ በመረዳት የሚከተሉትን ዋና ዋና ውሳኔዎች ቦርዱ ወስኗል።

1. ቦርዱ በድርጅቱ ምክትል ሰብሳቢ አቶ አራርሶ ቢቂላ ፊርማ የተላከለትን የድርጅቱን ሊቀመንበር የታገዱበትን ስብሰባ የሚገልጸውን ቃለጉባዔ ተመልክቶ፤ በቃለጉባዔው ላይ የተገኙት ሥራ አስፈጻሚ አባላት ከስምንቱ አምስት መኾናቸውን፤ ከአምስቱ መካከልም አንዱ አባል ከዚህ ቀደም በዜግነታቸው የተነሳ ከሥራ አስፈጻሚ ኮሚቴው የተቀነሱ በመኾናቸው፤ ሥራ አስፈጻሚው ስብሰባ የሚጠበቀውን 2/3ተኛ ምልአተ ጉባዔ ያልተሟላበት መኾኑን ተረድቷል። በመኾኑም ከድርጅቱ የሥራ አስፈጻሚ የተላከው የሊቀመንበሩ እገዳ ውሳኔ ሕጋዊ ተቀባይነት የሌለው መኾኑን ወስኗል።

2. በአቶ ዳውድ ፊርማ የተከናወነው እና የብሔራዊ ምክር ቤት ውሳኔ ነው ተብሎ ለቦርዱ የቀረበው የፓርቲውን ምክትል ሊቀመንበር፣ የሥራ አስፈጻሚ ኮሚቴ አባላትን፣ እንዲሁም የማዕከላዊ ኮሚቴ አባላት እስከሚቀጥለው የድርጅቱ ጠቅላላ ጉባዔ ድረስ ከኃላፊነታቸው ታግደው እንዲቆዩ የተወሰነው ውሳኔ የስብሰባው በትክክል መካሔዱን የሚያሳይ ቃለጉባዔ የሌለው፣ ምን ያህል የምክር ቤት አባላት እንደተሳተፉበት እና በምን ዐይነት ድምፅ አሰጣጥ (አብላጫ ድምፅ የተወሰነ መኾን አለመኾኑን) መኾኑን የማያሳይ በሊቀመንበሩ ፊርማ ብቻ የተላከ ውሳኔ በመኾኑ ሕጋዊ ተቀባይነት የሌለው መኾኑን ወስኗል። በዚህም መሠረት የፓርቲው ሊቀመንበርም ኾነ በሊቀመንበሩ ታግደዋል የተባሉት ሥራ አስፈጻሚዎች ሕጋዊ የድርጅቱ አካላት ኾነው ይቀጥላሉ።

3. ቦርዱ ከሁለቱም ወገኖች ጋር ባደረገው ውይይት፤ ሁለቱም ወገኖች የድርጅቱ ጠቅላላ ጉባዔ በታኅሣሥ 2013 ዓ.ም. መደረግ እንደሚገባው፤ ምክር ቤቱ ቀደም ሲል የወሰነ እንደነበረ አረጋግጠዋል። በቦርዱ መስፈርትም መሠረት ኦነግ እስከ ጥር 30 ቀን 2013 ዓ.ም. ድረስ ጠቅላላ ጉባዔ ማድረግ ከሚገባቸው ፓርቲዎች አንዱ ነው። በተጨማሪም አሁን ባለው አለመግባባት የሥራ አስፈጻሚ አባላቱ ኃላፊነታቸውን በመወጣት የአባላቶቻቸውን እና የፓርቲውን ጥቅም የሚያስጠብቁበት ሁኔታ ላይ እንዳልኾኑም በግልጽ ይታያል። በዚህም የተነሳ ለዚህ መፍትሔ ይኾን ዘንድ ሁለቱም ቡድኖች በጋራ ጠቅላላ ጉባዔ እንዲያከናውኑ ቦርዱ ወስኗል። ለዚህ ዝግጅት ሁለቱም ወገኖች የሚገኙበት የመጀመሪያ ስብሰባቸውንም በቦርዱ ስበሰባ አዳራሽ እንዲያከናውኑ የተወሰነ ሲሆን፤ ጊዜው ለሁለቱም አመራሮች የሚነገር ይኾናል።

የኢትዮጵያ ብሔራዊ ምርጫ ቦርድ
ታኅሣሥ 09 ቀን 2013 ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!