Eethiopia and Sudan border conflict

የኢትዮ-ሱዳን ድንበር

ሱዳን የተወረረችውን መሬት እንድትለቅ ጠይቃለች

ኢዛ (ረቡዕ ሚያዝያ ፮ ቀን ፳፻፲፫ ዓ.ም. April 14, 2021)፦ ሱዳን የኢትዮጵያን ድንበር አልፋ ወረራ ስለመፈጸሙ እና የኢትዮጵያን ተጨማሪ መሬት ለመያዝ የጦርነት ነጋሪት እየጎሰመች መኾኑን የኢትዮጵያ መንግሥት አስታወቀ።

ዛሬ ከውጭ ጉዳይ ሚኒስቴር መሥሪያ ቤት የወጣው መግለጫ፤ በሱዳን የመሬት ወረራ ጉዳይ ጋር እስከዛሬ ካወጣቸው መግለጫዎች ሁሉ ጠንከር ብሎ የታየ እና ሁኔታውን በዝርዝር ያመላከተ ኾኗል።

የውጭ ጉዳይ ሚኒስቴር በዛሬው (ረቡዕ ሚያዝያ 6 ቀን 2013 ዓ.ም.) መግለጫስ ላይ፤ ሱዳን ባደረገቸው ወረራ በአካባቢው የነበሩ ንጹሐን መፈናቀላቸውን ጭምር የገለጸ ሲሆን፤ ይህ አልበቃ ብሎም ተጨማሪ የኢትዮጵያ መሬትን ለመያዝ ጦርነት እየጎሰምች ነው በማለት አስታውቋል።

ዓለም አቀፉ ማኅበረሰብ በሱዳን ላይ ጫና እንዲያሳድር ጥሪ የቀረበበት የኢትዮጵያ መንግሥት መግለጫ፤ ሱዳን በኃይል ከያዘቻቸው የኢትዮጵያ ግዛቶች ወታደሮችዋን እንድታወጣ ማድረግ እንዳለባትም አሳስቧል።

ኢትዮጵያ ከድንበር ጋር ተያይዞ ያለውን ችግር በተቀመጡት የግጭት መፍቻ ዘዴዎች ለመፍታት ዝግጁ ስለመኾኗም ያመላከተው ይኸው መግለጫ፤ በተቀመጠው የችግር መፍቻ ዘዴ ችግሩን ለመፍታትም እ.ኤ.አ. በ1972 ዓ.ም. በተለዋወጧቸው ማስታወሻዎች መሠረት መኾን ይገባዋልም ይላል።

ሁለቱ አገራት እ.ኤ.አ. 1972 የተለዋወጧቸው ማስታወሻዎች መሠረት ዜጎችን ማፈናቀል እና ኃይል መጠቀም አይገባም የሚሉ መሠረታዊ ስምምነቶች አስቀድሞ መከበር እንዳለባቸው የውጭ ጉዳይ ሚኒስቴር አስታውቋል። በሱዳን ወረራ መግለጫው ሱዳን የወቅቱ የኢጋድ ሊቀመንበር ኾና ሳለ፤ የአፍሪካ ቀንድ ሰላም ለማወክ እያደረገች ያለው እንቅስቃሴ የሚያሳዝን መኾኑን የሚኒስቴር መሥሪያ ቤቱ ገልጿል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!