ሕይወት ይከስራሉ

በክፋት ቢከብሩ በተንኮል ሊያተርፉ

እችላለሁ ብለው በፍፁም አይልፉ

አጋጣሚም ሆኖ ለማግኘት ቢችሉ

ዕድሜ ቅንቡጭ ይላል ሕይወት ይከስራሉ

አንተ ነህ የምትቀር

ሁልቀን ሌላ ሰው ‘ሚሞት አይምሰልህ

አንድ ቀን ከዛ ቤት አንተም ትጎላለህ

በሞት ተጠፍሮ ያንተ ሁለት እግር

በቀብር ሳትቆም አንተ ነህ የምትቀር

በአልኮል እንጠበስ!

አውቀንበት ነበር ዋሽቶ በመኖሩ፣

አስቸገሩን እንጂ! ህሊናና እግዜሩ፣

ህሊና አይታሰር እግዜር አይከሰስ፣

እንደ ልማዳችን በአልኮል እንጠበስ!

እግርና ጫማ

እግርና ጫማ ተጣብቀው አንድ ላይ

በክር ተሳስረው አብረው ውለው ስታይ

እውነት አይምሰልህ ያ ሁሉ ፍቅራቸው

ሲመሽ ወደማታ ሄደህ ብታያቸው

በአንሶላ መካከል እግር ተዘርግቶ

ጫማ በራፉ ላይ ወድቋል አፉን ከፍቶ

ወለላዬ (ከስዊድን)

(ግጥሙን በፒ.ዲ.ኤፍ. አስነብበኝ!)

ሰው በሕይወት ሳለ መቼም ማድነቅ አንወድ

ማሻሻል አለብን ይሄን ነገር የግድ

እኚህ ጠንካራ ሰው ፕሮፌሠር መስፍን

ለራሳቸው ቢሆን የለፉት እስካሁን

ሀብት ከሥልጣን ጋር በእጃቸው ጨብጠው

በታዩ ነበረ ከሁሉ ሰው በልጠው