አንዱ እኔን ይመስላል

በጨመረ ቁጥር

እያንዳንዱ ቀናት

እያንዳንዱ ወራት

እያንዳንዱ ዓመታት

ከወየበው ቅጠል

ከሚረግፈው መሐል

ልቤ ድንግጥ አለ

አንዱ እኔን ይመስላል

ገብቶ ነው መሰለኝ

አክቲቪስቱን ኪሱ፣

ጋዜጠኛን ኪሱ፣

ተቃዋሚን ኪሱ

ገጣሚውን ኪሱ፣

ከተታቸው ብሎ አንድ ሰው ነገረኝ

እሱንም አጣሁት ገብቶ ነው መሰለኝ።

ወንድሙን ገደለው

ለዝች ትንሽ ዕድሜ

ቤት አልሠራም ያለው

መሃላ ደርዳሪው

በአብርሃም የቀናው

በቤት ኑዛዜ ውርስ

ተጣልተው እርስ በእርስ

ሳይሠራ ባገኘው

ወንድሙን ገደለው።

እሷን ቀምሰህ እለፍ!

በዓለም ገበታ ከሚቀርበው ድግስ

ማንም ሰው አይችልም አንዷንም መጨረስ

ስለዚህ ሁሉንም ልትበላ አትንሰፍሰፍ

ድርሻህ ኢምንት ናት እሷን ቀምሰህ እለፍ!

ሩጫ ሲጀመር

በየአውራ ጎዳናው ሲታዩ ሲሮጡ

ይመስል ነበረ ውጤት የሚያመጡ

ስንሔድ አንቸኩል እኛ ግን ቀስ ብለን

ሩጫ ሲጀመር እንቀድማቸዋለን