ሰው መኾን አትጥላ

ሰው ኾነህ ተፈጥረህ ሰው መኾን አትጥላ

እሚያዋጣህ የለም ሰው ከመኾን ሌላ

መነሻ ጥፋቱ ለሰው ሰው ችግሩ

ሰው ሳይኾን ሰው ኾኖ ከሰው ጋር መኖሩ

ካንስር ነው ተጠንቀቅ!

ወሬን ንፋስ ይዞት፣ እያገላበጠ አገርን ሲያዞረው፣ ከመንገድ አግኝቶህ

ጓዙን አከፋፋይ፣ ትጉህ ሠራተኛ፣ አጋሰስ ፈረሱ፣ አድርጎ ከጫነህ

ከዛ ከውትብትብ ከማይታይ ገመድ፣ ማሰሪያ ሸምቀቆ አንተን ለማላቀቅ

ማንም ኃይል የለውም፣ ጸሎት አያድንህ፣ ፀበልም አይሠራ፤ ካንሰር ነው ተጠንቀቅ!

ክፉ ጠላት አለን!

ከሳሽ ነው በብርቱ፣ ከሳሽ ነው ዲያቢሎስ፣

ሁሉንም ይከሳል

አጣልቶ በጥብጦ፣ አጋጭቶ፣ ከፋፍሎ፣

ሕዝብን ያጫርሳል

ሰው እንደበደለን፣ ሰው እንደከሰሰን፣

ሰው እንደገደለን

አርገን አንገምተው፣ እላያችን ሰፍሮ፣ ውሎ ያደረብን

ክፉ ጠላት አለን!።

ከኛ ፍቅር ጠፍቶ

አገሬ ብትለብስም ደርባ ደራርባ

ለብዙ ዘመናት የታሪክን ካባ

እላይዋ ነተበ አስቀየመ አርጅቶ

ሠርተን ሳናድሰው ከኛ ፍቅር ጠፍቶ

ሚጥለውን ያውቃል

ቀኑን ተመልክተህ እወድቃለሁ አትበል

እውነተኛ ኾኖ አይረጋም ያንተ ቃል

እሱ በፈለገው ባሻው ቦታ ወርዶ

ሚጥለውን ያውቃል የዕለቱ በረዶ