Office of the mayor, Addis Ababa

የአዲስ አበባ ከንቲባ ጽሕፈት ቤት

በሆቴልና ቱሪዝም ቦታዎች ላይ ተጥሎ የነበረውን ቅጣት አነሳ

ኢዛ (ቅዳሜ ግንቦት ፳፱ ቀን ፳፻፲፪ ዓ.ም. June 6, 2020)፦ የአዲስ አበባ ከተማ አስተዳደር የከተማ መሬት ይዞታ ክፍያ እዳ ማቅለያ፤ እንዲሁም ከአልሚዎች ግንባታ ጋር የተያያዙ የተለያዩ የሊዝ እና የግብር ክፍያዎችን የተመለከቱ ውሳኔዎች በዛሬው ዕለት አስተላለፈ። የመሬት ይዞታ ሊዝ ክፍያ እዳ ማቅለያ እንዲሰጥም ወስኗል።

የከተማ አስተዳደሩ ካቢኔ በዛሬው ዕለት (ቅዳሜ ግንቦት 29 ቀን 2012 ዓ.ም.) ውሳኔ ካሳለፈባቸው ጉዳዮች ውስጥ በሊዝ የተያዙና ከአሁን ቀድም በአልሚዎች ተይዘው የሊዝ ክፍያ ፍሬ ግብር እንዲከፍሉና የነበራቸው ወለድና ቅጣት እንዲነሳ መወሰኑ አንዱ ነው።

ከዚህም ሌላ በሊዝ ቦታ ወስደው ግንባታ ያልጀመሩ ግለሰቦችና ባለሀብቶች፤ የግንባታ ፍቃዳቸው ያለቅጣት እንዲስተናገድ ካቢኔው መወሰኑ የተገለጸ ሲሆን፤ በተለይ በሆቴልና ቱሪዝም ዘርፍ ቦታ ወስደው የወለድና መቀጫ ያለባቸው፤ መቀጫው ሙሉ በሙሉ እንዲቀርላቸው ተወስኗል። መክፈል የሚጠበቅባቸው ወለድ ደግሞ 30 በመቶ እንዲቀር ስለመደረጉ አስተዳደሩ አስታውቋል። የካቢኒው የዛሬ ውሳኔ የሚከተለው ነው። (ኢዛ)

1. በሊዝ የተያዙና ከአሁን ቀደም አግባብ ባለው አካል የይዞታ ማረጋገጫ በሊዝ ሥርዓት እንዲስተናገዱ በተወሰነላቸውና በቀጥታ በሊዝ በተያዙ የመኖረያ ይዞታዎች ላይ በአልሚዎች ተይዘው የሊዝ ክፍያ ፍሬ ግብር እንዲከፍሉ፤ ነገር ግን ወለድና ቅጣት እንዲነሳላቸው፤

2. መሬት አግባብ ባለው የሊዝ ሥርዓት ወስደው በወቅቱ ግንባታ ያልጀመሩና ያላጠናቀቁ ግለሰቦች፣ ባለሀብቶች እንዲሁም ተቋማት የግንባታ ፈቃዳቸውን ያለቅጣት እንዲያድሱና ተጨማሪ የአንድ ዓመት የማራዘሚያ ጊዜ እንዲሰጣቸው፤

3. በሪልስቴት ከተያዙት ውጪ የመኖሪያ ይዞታዎች ወለድና መቀጫ ሙሉ በሙሉ እንዲነሳላቸው፤

4. ለቢዝነስ በተለይም በሆቴልና ቱሪዝም ይዞታዎች መቀጫን ሙሉ ለሙሉ ወለድ ደግሞ 30% እንዲቀር የተወሰነ ሲሆን፤ ውሳኔው የከተማ አስተዳደሩን እስከ አንድ ቢሊዮን ብር ገቢ የሚያሳጣ ቢሆንም፤ የተቀዛቀዘውን የከተማችንን ኢኮኖሚ በተለይም የኮንስትራክሽን ዘርፋን በማነቃቃት ረገድ ከሚኖረው ሚና ባሻገር፤ ውዝፍ ገቢዎች እንዲሰበሰቡ የሚያስችልና ከ50 ሺህ በላይ ነዋሪዎችን በቀጥታ ተጠቃሚ የሚያደርግ ወቅታዊ ውሳኔ እንደኾነ ተመላክቷል፡፡

5. በክስ ሂደት ላይ ያሉ አልሚዎችም ከቅጣቱና ከወለድ ክፍያ 30 በመቶ ተነስቶላቸው እንዲከፍሉ ተወስኗል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!