Dawud Ibas and OLF leaders

ከኦነግ ሊቀመንበርነታቸው የታገዱት አቶ ዳውድ ኢብሳ (በቀኝ)፤ እገዳውን ካሳለፉት አመራሮች ሦስቱ (በግራ)

አዲስ ምርጫ እስኪካሔድ ምክትላቸው ተተክተዋል

ኢዛ (እሁድ መስከረም ፫ ቀን ፳፻፲፫ ዓ.ም. September 13, 2020)፦ የኦሮሞ ነፃነት ግንባር (ኦነግ) ሥራ አስፈጻሚ የድርጅቱን ሊቀመንበር አቶ ዳውድ ኢብሳን ከሊቀመንበርነታቸውና ከፓርቲው እንዲታገዱ ውሳኔ ማሳለፉ ታወቀ።

ኦነግ ለወራት በአመራር ደረጃ ውዝግብ ውስጥ የነበረ መኾኑ የሚታወስ ሲሆን፤ ዛሬ ይፋ በኾነው የኦነግ ሥራ አስፈጻሚ መግለጫ፤ የድርጀቱን ሊቀመንበር አቶ ዳውድ ኢብሳ ከፓርቲው መገዱንና አዲስ ምርጫ እስኪደረግ እና አዲስ መሪ እስኪመረጥ ድረስ የድርጅቱ ተወካይና መሪ ምክትል ሊቀመንበሩ አቶ አራርሶ ቢቂላ እንዲኾኑ መሰየማቸው ታውቋል።

የድርጅቱ ሥራ አስፈጻሚ ውሳኔን ተንተርሶ የወጣው መግለጫና የድርጅቱ የሕዝብ ግንኙነት ኃላፊ አቶ ቀጀላ መርዳሳ እንደገለጹት፤ አቶ ዳውድ በፓርቲው አንድነትና ሰላማዊ ትግል ላይ እየፈጠሩ የነበሩትን ችግር ለመቅረፍ ተደጋጋሚ ጥረቶች ቢደረጉም፤ ያሉባቸውን ችግሮች ከማስተካከል ይልቅ ፓርቲውን የመከፋፈል አጀንዳ የመፍጠር አካሔዶች ሲከተሉ በመቆየታቸው ለፓርቲው ሕልውና ሲባል የኦነግ ሥራ አስፈጻሚ አቶ ዳውድን ከፓርቲው አግዷቸዋል ብለዋል።

አቶ ዳውድ ባለፉት 20 ዓመታት በፓርቲው ላይ የተለያዩ አደጋዎች በተደጋጋሚ እንዲደቀኑ አድርገዋል የሚለው የአቶ ቀጀላ ማብራሪያ፤ በቀጣይ በፓርቲው አሠራር መሠረት የሚከናወኑ ተግባራት መኖራቸውንና ለዚህም ሁሉንም ሒደቶች የሚያመላክት ሰነድና ማስረጃ ለምርጫ ቦርድ መግባቱንም ጠቅሰዋል።

ፓርቲው ከዚሁ ጉዳይ ጋር በተያያዘ ያወጣው ሰፊ መግለጫ የሚከተለው ነው። (ኢዛ)

የኦሮሞ ነፃነት ግንባር እንዲያገግም፣ እንዲጠነክር፣ አሳታፊና ዴሞክራሲያዊ እንዲኾን ለማድረግ የተጀመረው ትግል ይቀጥላል
(ከኦሮሞ ነፃነት ግንባር የተሰጠ መግለጫ)

አንድን የፖለቲካ ድርጅት ትክክለኛና ዴሞክራሲያዊ ድርጅት ሊያደርገው የሚችለው የሚገዛበት ዴሞክራሲያዊ ሕገ ደንብ፣ የጠራ የፖለቲካ ፕሮግራም፣ ግልጽ ስትራቴጂና የትግል ስልት፣ የሚመራበት የሥነ ምግባር ደንብ ሲኖረውና እነዚህንም ተግባራዊ ሲያደርግ ብቻ ነው። የኦሮሞ ነፃነት ግንባር መሥራች ጉባዔ ሰኔ 1968 ተቀምጦ የግንባሩ የፖለቲካ ፕሮግራምና ሕገ ደንብ ላይ ተወያይቶ በማጽደቅ የተሟላ ድርጅታዊ መዋቅር ዘርግቶ እንቅስቃሴ ከጀመረ እነሆ 44 ዓመታት አልፎታል።

ይሁን እንጂ በተለያዩ ጊዜያት ለሚጣሱ የሥነ ሥርዓት ህጎች አግባብ ያለው መፍትሄ ከመስጠት በእልህና በማን አለብኝነት በድርጅቱ ውስጥ በሚነዙ አፍራሽ ፕሮፓጋንዳዎች መከፋፈሎች እንደነበሩ ይታወቃል። በተለይም ከ1991 ዓም ጀምሮ በድርጅቱ ውስጥ ሰላምና መረጋጋት ታይቶ አይታወቅም። በተለይም ደግሞ ከ1992 ዓም ጀምሮ እስከዛሬ ድረስ በኦነግ ሊ/መንበር በአቶ ዳውድ ኢብሳ አመራር ሥር ድርጅቱ ሶስት ትላልቅ የመከፋፈል አደጋዎች አጋጥመውታል።

በአቶ ዳውድ አመራር ሥር ድርጅቱ የተለያዩ ውድቀቶች ገጥመውታል። ባጠቃላይ ድርጅቱ የሚጠበቅበትን ተልዕኮ መወጣት ለምን አልቻለም የሚለው በብዙዎች ለዓመታት ሲጠየቅ ለነበረው ጥያቄ ተገቢ መልስ መስጠት ያስፈልጋል።

የታሪክ አጋጣሚ ሆኖ አቶ ዳውድ ኢብሳ ወደ ኦነግ ሊ/መንበርነት የመጡት በፈረንጆቹ 1999 ወይም እንደ ኢትዮጵያ አቆጣጠር በ1991 ዓ ም ነበር።

ይህም በድርጅቱ ጠቅላላ ጉቦዔ ሳይሆን በ1991 አነስተኛ ቁጥር የነበረውና በአስቸኳይ በተቀመጠ የድርጅቱ ማዕከላዊ ኮሚቴ ስብሰባ ላይ ነበር። በዚያን ጊዜ የተቀመጠው የኦነግ ማዕከላዊ ኮሚቴ ከወሰናቸው ውሳኔዎች መካከል አንዱ ስድስት ወር ባልበለጠ ጊዜ ውስጥ የድርጅቱ ጠቅላላ ጉባዔ ተደርጎ አዲስ መሪ እንድመረጥ የሚል ሲሆን አቶ ዳውድ ኢብሳን በሊ/መንበርነት የመረጠው በጊዜያዊነት ነበር።

ይሁን እንጂ አቶ ዳውድ ኢብሳ ወደዚህ ሃላፍነት ከመጡበት ጊዜ ጀምሮ ድርጅቱንና የኦሮሞን ሕዝብ ትግል ወደፊት ከማራመድ ይልቅ ራሳቸውን የሁሉም ነገር ማዕከል አድርገው ሥልጣናቸውን ለማጠከር ከመሥራት ውጭ ለኦሮሞ ሕዝብ ትግል ያበረከቱት አስተዋጽዖ በጣም ጥቂት ነው። ስድስት ወር ባልበለጠ ጊዜ ውስጥ እንዲካሄድ ተወስኖ የነበረው የድርጅቱ 3ኛ ጠቅላላ ጉባዔም ተጓቶ ለአምስት ዓመት እንድራዘም ተደረገ።

ከጠቅላላ ጉባዔው መጓተትና ከሚደርስባቸው የተላያዩ ጫናዎች ጋር በተያያዘ እንዲሁም የድርጅቱ ሕገ ደንብና አሰራር ተፋልሷል፣ አባላት መብታቸውን ተነፍገዋል በማለት ጥያቄ ያነሱ ብዙ ልምድ ያካበቱ የድርጅቱ አመራሮችና አባላት በ1993 ዓ ም ድርጅቱን ለቀው እንዲወጡ ተደረገ። በዚህ ምክንያት ከድርጅቱ የወጡ ነባር የአመራር አባላት የኦሮሞ ነፃነት ግንባር የሽግግር አመራር በሚል ስያሜ ራሳቸውን ሲያደራጁ ግንባሩ ለሁለት ተከፈለ።

አሁንም ከግንባሩ 3ኛ ጠቅላላ ጉባዔ በኋላ በ2000 ዓ.ም. ለሁለተኛ ጊዜ በአቶ ዳውድ ሥር ኦነግ ለሁለት ተከፍሎ በርካታ የበሰሉና ልምድ ያላቸው የአመራር አባላት ከድርጅቱ ወጥተው የኦነግ ጊዚያዊ ኮሚቴ በሚል ተደራጁ።

በወቅቱ የተፈጠሩ አለመግባባቶችን በአግባቡ ለመፍታት የተደረጉ ጥረቶች በሊ/መንበሩ ገታራ አቋምና አካሄድ ሳይሳኩ ቀርተው ግንባሩ ለሁለት ተከፈለ። አቶ ዳውድ በ2000 ዓ ም መካሄድ የነበረበት ጠቅላላ ጉባዔ ተካሂዶ አዲስ መሪ እንዳይመረጥ ኾነ ብለው በማስተጓጎል ድርጅቱ ለሁለት ተከፍሎ በአንደኛው አንጃ ሊ/መንበር ኾነው መቀጠልን መረጡ።

በድርጅቱ ውስጥ ችግር እንድፈጠር ያደረጉበት ምክንያትም የሥልጣን ዕድሜያቸውን ለማራዘም በማሰብ ነው። እሳቸው የማይመሩት ኦነግ እንዳይኖር ለማድረግ ሌት ተቀን የሚሰሩ መሆናቸውን በተላያዩ አጋጣሚዎች የተረጋገጠ ጉዳይ ነው።

ይህ ብቻ ሳይሆን እንደገና በኢትዮጵያ አቆጣጠር 2003 ዓም ከኦሮሞ ነፃነት ግንባር በተለያዩ ጊዜያት ወጥተው አንጃ ከፈጠሩ ድርጅቶች ጋር ድርድር ተደርጎ ግንባሩ ወደ ቀድሞ አንድነቱ እንዲመለስ በነባር አባላትና የድርጅቱ መሥራቾች የተደረገው ጥረት በማጨናገፍ እንዳይሳካ ያደረጉት አቶ ዳውድ ኢብሳ ነበሩ።

በዚህ ምክንያት የኦነግን ድርጅታዊ አንድነት የደገፉ የአመራርና በርካታ የግንባሩ አባላት “የውስጥ ጠላት” ተብለው ተፈርጀው ድርጅቱን ለቀው እንዲወጡ ተደረገ።

በ2003 ግንባሩን ለቀው የወጡ የድርጅቱ አመራርና ነባር አባላት ተሰባስበው የኦሮሞ ዴሞክራሲያዊ ግንባር የሚል ድርጅት ሲያቋቁሙ ግንባሩ አሁንም ለሶስተኛ ጊዜ በአቶ ዳውድ አመራር ሥር ተከፈለ። ቀደም ስል በተፈጠሩ መከፋፈሎችና በኋላ ላይ በ2003 ዓ ም በተፈጠረው መከፋፈል በድርጅቱ ላይ ከፍተኛ ጉዳት ደርሷል።

በ2000 ዓ ም መካሄድ የነበረበት ጠቅላላ ጉባዔም እስከ 2009 እንዲቆይ ተደርጎ አቶ ዳውድ ኢብሳ ከድርጅቱ ሕገ ደንብ ውጭ ሥልጣናቸን ለዘጠኝ ዓመት አራዘሙ።

ከ13 ዓመት በኋላ በ2009 ዓም አሁንም ኤርትራ ውስጥ በተቀመጠው ጠቅላላ ጉባዔ ላይ አቶ ዳውድ ኢብሳ ታማኝ የኾኑ የራሳቸውን ሰዎች በአስመራጭነት ሰይመው ከ18 የሥልጣን ዓመታት በኋላ እንደገና እንድመረጡ ተደረገ። እነሆ የድርጅቱ ሊ/መንበር ኾነው የሥልጣን ወንበሩን ከተቆናጠጡ 21 ዓመት አስቆጥረዋል።

አመራር ራሱን የቻለ ጥበብ አለው። የአንድ መሪ ችሎታ የሚለካው በአመራር ዘመኑ በሚያስመዘግበው ውጤት ነው። አንድ መሪ ለሌላ ሰው ምሳሌ መኾን፣ አርቆ አስተዋይ፣ እውነት ላይ ተመሥርቶ በሀቀኝነት ሲሰራና ተዓማኒነት ያለው ሰው ሆኖ ከራሱ ጥቅም የሕዝብን ጥቅም የሚያስቀድም ፣ችሎታና ራዕይ ያለው ሲሆን ነው።
አንድ መሪ ብዛትና ጥራት ያላቸውን ተከታዮች ማፍራት ይጠበቅበታል። ጠንካራ መሪ አስመሳዮችን ሳይሆን ነገ ተተኪ መሪዎች መኾን የሚችሉ ብቃት ያላቸውን እያፈራና እየቀርጸ መሄድ የሚችል መኾን አለበት። አቶ ዳውድ ኢብሳ ፈጽሞ የዚህ ሰው መኾን አልቻሉም። ችሎታውም ፍላጎቱም የላቸውም።

የኦሮሞ ነፃነት ግንባር ድርጅታዊ መርህ የአንድ ግለሰብ አመራር ሳይሆን የጋራ አመራር (Collective leadership) ላይ የተመሰረተ መኾኑ በድርጅቱ ሕገ ደንብ ወስጥ ተድንግጓል። ማንም ይሁን ማን ግለሰብ ለድርጅቱ ይታዘዛል፣ አናሳ ድምፅ ለብዙኋን ድምፅ ይገዛል፣ በብዙሃን የተወሰነ ውሳኔ በሁሉም ዘንድ ተግባራዊ ይሆናል፣ የሕግ የበላይነት መከበር የግድ ነው።

አቶ ዳውድ ኢብሳ የጋራ አመራር ከመስጠት ይልቅ የራሳቸውን ፍላጎትና የሥልጣን ጥማት ለማርካት ሲባል ለ 21 ዓመታት የኦሮሞ ነፃነት ግንባርን አቀጨጩት።

በሐሳብና በሪዮተዓለም ሳይሆን የሀሰት ፕሮፓጋንዳና ውዥንብር በድርጅቱ ውስጥ በመንዛትና በማስነዛት ነበር የኖሩት። ዛሬም ይህንኑ እያራመዱ እንደሚገኙ የአደባባይ ሚስጥር ነው። ርካሽ ፕሮፓጋንዳና በሀሰት ወሬዎች ብልሹ አሰራሩንና አካሄዱን የሚተቹ አመራሮችና አባላት ላይ የስም ማጥፋት ዘመቻን ማካሄድ ቋሚ ሥራቸው አድርገዋል። በዚህ ድርጊታቸው የአባላት ብዛት እና ጥራት በእጅጉ እንዲቀነስ በማድረግ የኦሮሞ ነፃነት ግንባርና ትግሉን አመነመኑት።

ለድርጅቱ መዳከም ቀደም ስል የነበሩ ሌሎች የድርጅቱ ከፍተኛ አመራርም በቸልተኝነት በማለፋቸው ተጠያቂዎች ቢኾኑም አቶ ዳውድ ኢብሳ ለድርጅቱ መዳከም ዋና ተጠያቂ ናቸው። ለራቸው ፍላጎትና ጥቅም ሲሉ የኦሮሞ ነፃነት ግንባርን ትግል ክፉኛ ጎድተውታል ብለን እናምናለን። ራሳቸውን እንደ መሪ ሳይሆን እንደ ንጉስ የሚቆጥሩ፣ በዙሪያቸው የተኮለኮሉ የመንደር ሰዎችን እንጂ ሌላውን የማይሰሙ ናቸው።

ዘመዶቻቸውና የመንደራቸው፣ እንዲሁም በጥቃቅን ጥቅማ ጥቅሞች የሚደለሉ ግለሰቦችም እሳቸውን ለማንገስና ጥቅማቸውን ለማስጠበቅ በድርጅቱ ውስጥ ለውጥ አንዳይመጣ እንቅፋት ሲኾኑ ኖረዋል።

አቶ ዳውድ ኢብሳ በሊ/መንበርነት በቆዩባቸው 21 ዓመታት የድርጅቱን ገንዘብና ሀብት ብቻቸውን ሲያዙበት ኖረዋል። በድርጅቱ ውስጥ አድልዎ በመፍጠር የአከባቢያቸውን ሰዎችና ዘመዶች ቁልፍ የሥራ መደቦች ላይ በመመደብ ጥቅማቸውን አስጠብቀዋል። በዚህ መሰል አካሄድ ከድርጅቱ ሕገ ደንብና አሰራር ውጭ የራሳቸውን አምባገነንነት በድርጅቱ ላይ አንግሰዋል። አቶ ዳውድ ኢብሳ 21 ዓመት በሊ/መንበርነት በቆዩበት ጊዜያት ድርጅቱ ፈራርሶ ከነበረበት ወረደ እንጂ እድገት አላሳየም።

በአመራር ዘመናቸው የኦነግ ኮር አመራርና መዋቅሩ እንዲፈርስ ተደርጓል። የጋራ አመራር የሚለው በሐሳብ እንጂ በተግባር ሊታይ አልቻለም።. በአቶ በዳውድ ኢብሳ አመራር ያልረኩ እውቀትና ቸሎታ ያላቸው በርካታ አባላት በየጊዜው ድርጅቱን ለቀው ወጥተዋል። ዛሬ ኦነግ ውስጥ የተማሩና ልምድ የቀሰሙ አባላት ቁጠር አነስተኛ ነው፡፡

ድርጅታዊ መዋቅር ጠብቆ ከመሥራት፡ በመዋቅር ውስጥ መዋቅር በድርጅት ውስጥ ስውር ደረጅት ዘርግቶ በመቆላለፍ በአባላት መካከል ጥርጣሬና መከፋፈል እንድኖር ማድረግ የተለመደ ሆኗል፡፡ ዛሬም ይህ በገሃድ የሚታይ ነው።

በአገር ውስጥ የሚካሄደውን የድርጅቱን ሥራ ሌሎች የድርጅቱ አመራሮች እንዳያውቁትና እንዳይሳተፉበት በማደረግ ከመንደራቸው ጥቂት ሰዎች ጋር ኾነው በመቆጣጠር እንዳሻቸው ሲያደርጉ ቆይ ተዋል፡፡ አገር ውስጥ የነበረው መዋቅር በብዛት በወያኔ የደህንነት መዋቅር እጅ ነበር ማለት ይቻላል፡፡

ሊ/መንበሩ ያደራጁዋቸው በወያኔ መዋቅር ውስጥ የሚሰሩ የአከባቢያቸው ሰዎች ነበሩ፡፡ ለዚህም ግርማ ጥሩነህ የሚባለው ዘመዳቸው አይነተኛ ምሳሌ ነው፡፡ ግርማ ጥሩነህ በርካታ የኦሮሞ ወጣቶቸና ታጋዮችን ሲያሳስር የነበረ የወያኔ ሰላይ ነበር፡፡ የግርማ ጥሩነህን ጉዳይ እንዲያጣራ በድርጅቱ የተሰየመው ኮሚቴ ግለሰቡ ከወያኔ ጋር የሚሰራ መኾኑነ ቢያረጋግጥም በአቶ ዳውድ ኢበሳ ተቀባይነት አላገኘም፡፡

ይባስ ብለው ከድርጅቱ አመራር ተውጣጥቶ ጥናቱን ያካሄደውን ኮሚቴ በመወንጀል አንዲገለሉ ተደርጓል።

በትጥቅ ትግሉም በኩል በቂ ጥናትና ዝግጅት ሳይደረግበትና ከሌሎች የድርጅቱ አመራሮች ጋር ሳይመከርበት በተለያዩ ጊዜያት አቶ ዳውድ ኢብሳ ያሰማሯቸው የኦሮሞ ነፃነት ሠራዊት አመርቂ ውጤት ሳያስገኙ በወያኔ ሠራዊት እጅ ገብተው ጉዳት ስደርስበት ቆይቷል። ሆኖም ላደረሱት ኪሳራዎችና ውድቀት አንድም ጊዜ ተጠያቂ ኾነው አያውቁም፡፡ ባጠቃላይ አቶ ዳውደ ኢብሳ ገና ወደ ሊ/መንበርነት በመጡ ማግሰት የኦሮሞ ነፃነት ግንባር ዋና መቀመጫ ወደ አስመራ፣ ኤርትራ መዛወሩ በሳቸው ለሚሰራው ጥፋት ተጠያቂ ለማድረግ አልተቻለም።

የኦሮሞ ነፃነት ግንባር ከ27 አመት በኋላ ሰላማዊ የትግል ስትራቴጂን መርጦና ወስኖ ከኢትጵያ መንግሥት ጋር ተደራድሮ 2010 አ.ም ወደ አገር ቤት መመለሱ ይታወሳል፡፡ ወደ አገር ቤት ሲመለስ ያኔ ኦሮሚያን ሲያስተዳድር የነበረው ኦህዲድን ጨምሮ ከሌሎች የኦሮሞ ድርጅቶች ጋር የኦሮሚያንና የኦሮሞን ሕዝብ ጥቅም ለማስከበር አብሮ ለመሥራት መወሰኑም ይታወሳል።

አቋሙንና ፖሊሲዎቹንም በሄደበት ሁሉ ለሕዝቡ አሳውቋል። የኦሮሞ ሕዝብም ኦነግ ወደ አገር ቤት መመለሱን ከሁሉም አከባቢዎች በሚሊዮኖች ወጥቶ የተቀበለውም ሰላማዊ ትግሉን በመደገፍ መኾኑን ያረጋግጣል፡፡ እንኳን በደህና ወደ ሰላማዊ ትግል መጣችሁ በማለት ተቀበለን እንጂ የትጥቅ ትግሉን ትታችሁ ለምን መጣችሁ አላለንም፡፡

ይሁን እንጂ ኤርትራ ማስልጠኛ ካምፕ ውስጥ የነበሩ የኦሮሞ ነፃነት ሠራዊት አባላት በሰላማዊ መንገድ ወደ አገር ቤት ቢገቡም የኦሮሞ ነፃነት ሠራዊት ዋና አዛጅ የኾኑት አቶ ዳውድ ኢብሳ አገር ውስጥ የነበሩ የሠራዊቱ አባላት ወደ ሰላማዊ ትግል እንዲመለሱ ለማድረግ የሚጠበቅባቸውን አላደረጉም፡፡

በመንግሰት በኩልም የነበረው ችግር እንዳለ ሆኖ አቶ ዳውድ ኢብሳ “ማን ማንን ያስፈታል” በማለት በሚዲያ ያስተላለፉት መልዕክት ጥርጣሬን በማንገስ ለመንግሰት ወታደራዊ እርምጃ በር ከፍቷል፡፡ የትግል ስልት ጥበብን ይጠይቃል። አቶ ዳውደ ኢብሳ አዲስ አበባ ከተማ ተቀምጠው የትጥቅ ትግልን ለመምራት የሚያደርጉት አጉል ጥረት ድርጅቱ በሰላማዊ መንገድ በሚያደርገው ትግል ላይ ትልቅ ተጽእኖ መፍጠሩ አለ የማይባል ሀቅ ነው፡፡

ከተቀሩት የድርጅቱ አመራር አባላት በመደበቅ የሚፈጽሟቸው ሕገወጥ ድርጊቶች በድርጅቱ አመራር ውስጥ የሰፋ ልዩነት እንድፈጠር ምክንያት ከኾኑት መካከልም ይሄኛው ዋናውና ትልቁ መኾኑን ለሕዝባችንና ለወዳጆቻችን መግለጽ እንወዳለን፡፡

ሰላማዊ ትግልንና የትጥቅ ትግልን ቀላቅሎ ማካሄድ ድርጅቱን መጉዳቱ በግልጽ ታይቷል።፡ አቶ ዳውድ ኢብሳ በወቅቱ በኦነግ ሥራ አስፈጻሚ ኮሚቴ የተላለፈውን ውሳኔ ወደ ጎን በመተው በትጥቅ ትግል የተሰማሩ የኦሮሞ ነፃነት ሠራዊት አባላትን ለአባ ገዳዎችና ለኦሮሞ ሕዝብ ሰጥቼሃለሁ ማለታቸውም የጋራ አመራርን ውሳኔ ያፋለሰ እና ሌላኛው የስልት ስህተት መኾኑንም በዚሁ አጋጣሚ ጠቀሰን ማለፍ እንወዳለን፡፡

ሥራ አስፈጻሚ ኮሚቴው ይህንን አባባል በዝምታ የተመለከተው የድርጅቱን አንድነት ለመጠበቅ እንጂ አምኖበት እንዳልነበረ በዚሁ አጋጣሚ መግለጽ እንፈልጋለን፡፡

ይህ በአንዲህ እንዳለ ከኦነግ ከፍተኛ አመራር ውስጥ ሊ/መንበሩ ያሰማራቸው ጥቂት ግለሰቦች የኦሮሞ ነፃነት ሠራዊትን መቀላቀላቸውና የኦሮሞ ነፃነት ግንባር ሠራዊት ከፍተኛ አመራር በማለት በትጥቅ ትግል መቀጠል መምረጣቸውን ማወጃቸው፣ አንዲሁም ጥቂት አባላት በቴሌፎን ሠራዊቱን ለመገናኘት መሞከርና የሰላማዊ ትግሉን ሥነ ምግባር ያለማክበር ድርጅቱ ላይ ከፍተኛ ጉዳት አድርሷል።

በተለይም በወለጋና ጉጂ የሚኖረው ሕዝባችን ላይ ከፍተኛ ወከባ፣ የአገር ውስጥ ስደት፣ የሕይወትና የንብረት ጉዳት በማስከተል የሕዝቡን የመንቀሳቀስ ነፃነትና ሰላማዊ ኑሮ አናግቷል።

በውጭ ያሉ ጥቂት የድርጅቱ አመራር አባላት የነበሩ ግለሰቦችም ከትጥቅ ትግል ውጪ የሚያዋጣን የለም በማለት ገንዘብ በማሰባሰብና በየጊዜው በማህበራዊ ሚዲያና በONN ቴሌቪዥን ላይ ወጥተው በኦነግ ስም የሚያስተላልፉት መልዕክትና የሚያደርጉት ቅስቀሳዎችና ጥሪዎች ከድርጅቱ የትግል ስትራቴጂና ከአገሪቷ ሕግ ጋር የሚጣረዙ በመሆናቸው በድርጅቱ ሰላማዊ እንቅስቃሴ ላይ ከፍተኛ ተጽዕኖ አሳድሯል።

ከፊል የድርጅቱን የአመራር አባላት የትጥቅ ትግል ደጋፊዎች፣ ሌሎችን ደግሞ በሰላማዊ መንገድ ለመታገል የሚፈልጉና ከመንግሥት ጋር ያበሩ በማለት የስም ማጥፋት ዘመቻ እያካሄዱ ራሳቸውን ወደር የማይገኝለት የነፃነት ታጋይ አስመስለው በማቅረብ በድርጅቱ ውስጥ መከፋፈል አንዲኖር በሰፊው ዘመቻ አካሂደዋል።

ይህም በአመራሩ ውስጥ ክፍፍል ፈጥሮ የድርጅቱን በሰላማዊ መንገድ የመታገል ውሳኔ አክብረው ለተግባራዊነቱ የሚሰሩትን ስም ለማጥፋት ግልጽና ሰውር ቅስቀሳ ማካሄድ ዕለታዊ ተግባራቸው ሆኗል። ከድርጅቱ ደንብና ሥነ ሥርዓት ውጭ የተለያዩ ሰዎች በተለያዩ ስሞች በፌስ ቡክና በሚዲያ ወጥተው አብዛኛውን የአመራር አባላት የተለያዩ ስሞችን በመስጠት በሚያካሄዱት የስም ማጥፋት ዘመቻዎች የድርጅቱን አባላትና ደጋፊዎችን ውዥንብር ውስጥ አንዲገቡ ለማድረግ ሞክረዋል።

ኦነግ ወደ አገር ቤት ከተመለሰ በኋላ ድርጅቱ ከሕዝብ ጋር ለመገናኘት ያገኘውን ዕድል በመጠቀም የድርጅቱን አመራርና መዋቅር ማሻሻልና ማደስ አለብን ብለው አብዛኛው የአመራር አባላት ሐሳብ ቢያቀርቡም በአቶ ዳውድ ኢብሳ ዘንድ ተቀባይነት አላገኘም።

የተለያዩ ምክንያቶችን በመደርደር እስካሁን ሁነኛ ጠቅላላ ጉባዔ ሊደረግ አልቻለም። ግልጽና ነጻ ምርጫ ተካሂዶ አገር ውስጥ ከነበሩ አባላት ውስጥ ብቃት ያላቸው ሰዎች ወደ አመራርነት እንድመጡ ሐሳብ ቢቀርብም ይህንን ጥያቄ ወደጎን በመተው ነባር አመራሩ ብቻ በአመራር እንዲቀጥል ተወሰነ። ዛሬም ቢሆን አቶ ዳውድ ኢብሳ በታህሳስ 2013 ሊደረግ የተወሰነውን ጠቅላላ ጉባዔ ለማደናቀፍ አስቀድመው ድርጅቱ ውስጥ ችግር በመፍጠር ከድርጅቱ ደንብና ሥነ ሥርዓት ውጪ በመንቀሳቀስ ላይ ይገኛሉ።

ጠቅላላ ጉባዔ የሚያስፈልገው ድርጅቱ የሚከተለውን ስትራተጂና ታክቲክ፥ አመራርን ለማደስ፣ በፖለቲካ ፕሮግራሙና በድርጅቱ የመተዳደሪያ ደንብ ላይ ሰፊ ውይይት በማካሄድ ካለው ወቅታዊ ሁኔታ ጋር አጣጥሞ ትግሉን ወደፊት አንዲራመድ ለማስቻል ነው። አንድ የፖለቲካ ድርጅት ካለው ወቅታዊ ሁኔታ ጋር ለመራመድ የሚያስችለው ተሃድሶ ካላካሄደና ታክቲክና ስትራተጂውን በመገምገም የእርምት እርምጃዎችን አየወሰደ ካልተራመደ በሒደት መክሰሙ የማይቀር ነው።

የኦሮሞ የፖለቲካ ፓርቲዎችን በተመለከተ ሁሉም ማለት በሚቻል ደረጃ ከኦነግ የወጡ ናቸው ማለት ይቻላል። በመኾኑም በመካከላቸው ጉልህ የኾነ ልዩነት አንደሌለ ይታወቃል። በመኾኑም በተፈጠረው መልካም አጋጣሚ በመጠቀም ያሉትን ጥቃቅን ልዩነቶች በማሰውገድ በአንድ ጥላ ሥር በመሰባሰብ የትግሉን ጎራ ማጠናከር የሚል የኦነግ ቋሚ ፖሊሲና ጽኑ አቋም ነበር። የሕዝባችን ጥያቄም የኦሮሞ ፖለቲካ ድርጅቶች አንድነት ፍጠሩ የሚል ነው። ይህን ጥያቄ ለመመለስ ሙከራዎች ቢደረጉም አቶ ዳውድ ኢብሳና የተወሰኑ የአመራር አባላት ፍላጎት በማጣት ለብቻ መታገልን በመምረጣቸው ሊሳካ አልቻለም።

ይህን በሚመለከት የኦነግ ሥራ አስፈጻሚ ኮሚቴ የጋራ አመራር ውሳኔን ለማክሸፍ በሃሰት የስም ማጥፋትና ርካሽ ፕሮፓጋንዳዎችን በመጠቀም የኦሮሞ የፖለቲካ ድርጅቶች ህብረትና አንድነት እውን አንዳይሆን ተደርጓል። በዚህም ምክንያት የኦሮሞ ነፃነት ትግል ጎራ አንዳይጠናከርና አንዳይረጋጋ ሆኗል።

ዛሬ በአመራሩ ድክመት ኦነግ ቀደም ስል የነበረው ክብር፡ ድጋፍና ተቀባይነት ተሸርሽሮ እየተመናመነ መኾኑ ግልጽ ነው። ሕዝቡ የነፃነት ትግሉን በእጁ አስገብቶ ያለ በቂ አመራር በራሱ መንገድ ታግሎ መስዋዕትነትን ከፍሏል። እየታገለም ነው። የኦሮሞ ሕዝብ በድርጅቱ ዓላማ፣ ስምና ዓርማ ሥር ተሰልፎ ታገለ አንጂ የአንድን ግለሰብ የበላይነት ከተጸየፈ ሰነባብቷል። ስለኾነም የኦሮሞ ነፃነት ግንባር ከላይ የተገለጹትን ግምገማዎችን ካካሄደ በኋላ የሚከተሉትን ውሳኔዎችና አቋሞችን ወስዷል።

1. አቶ ዳውድ ኢብሳ ላለፉት 21 ዓመታት በላይ በአመራር ላይ በቆዩበት ግዜያት በድርጅቱ ላይ ባደረሱት ጉዳትና መበታተን በተጨማሪ ባሁኑ ወቅትም ከድርጅቱ ሕግና ሥርዓት ውጪ የሃሰት ፕሮፓጋንዳና የስም ማጥፋት ዘመቻን በድርጅቱ አመራሮች ላይ በማካሄድ በድርጅቱ ውስጥ ውዥንብርና መደናገር አንዲፈጠር አድርገው ድርጅቱን ለ4ኛ ግዜ በመክፈል ላይ ይገኛሉ።

በመኾኑም ጉዳያቸው ተጣርቶ በቀጣዩ የድርጅቱ ጠቅላላ ጉባዔ ላይ ውሳኔ አስኪያገኝ ድረስ የሰራ አስፈጻሚ ኮሚቴው ነሓሴ 1, 2012 በወሰነው መሰረት አሁንም ከድርጅቱ ሊ/መንበርነት ታግደው እንደሚቆዩ ለድርጅቱ አባላት፣ ለደጋፊዎቹ፣ ለኦሮሞ ሕዝብና ለሌሎች አካላት በድጋሚ እናሳውቃለን። አቶ ዳውድ ኢብሳ ከድርጅቱ ደንብና ሥርዓት ውጭ የድርጅቱን ሀብትና ንብረት በመቆጣጠር ለፈለጉት ብቻ ከማዋላቸው በተጨማሪ ከድርጅቱ ሕግና ሥርዓት ወጭ የግል መዋቅር በመዘርጋት ላይ አንዳሉ አያሳወቅን ሕዝባችን ኦነግን ለ 4ኛ ጊዜ ለመናድ አየተሸረበ ያለውን የሴራ ፖለቲካና አፍራሽ ድርጊት ከጎናችን ቆሞ አንዲታገለው ጥሪያችንን እናስተላልፋለን። እኛም አጥብቀን የምንታገል መሆናችንን እናረጋግጣለን።

2. የድርጅቱ ንብረትና ሃብት የጋራ ወይም የአባላት በሞላ አንጂ የግል አይደለም። የድርጅቱ አባላት ሀብት ንብረታቸውን የማወቅም ኾነ የመቆጣጠር መብት አላቸው። ይሁን አንጂ ላለፉት ሁለት አመታት የድርጅቱ የገቢ ምንጭ ከየት አንደኾነ፡ ለምንና አንዴት አንደሚወጣ አንኳን አባላት ለድርጅቱ አመራር ሪፖርት ቀርቦ አያውቅም። የፋይናንስ ሥርዓት ተዘርግቶ በሥርዓት ተግባር ላይ አየዋለ አንዳልኾነ በግልጽ የሚታይ ነው።

በድርጅቱ ስምና በግል በተከፈቱ የባንክ አካውንቶች ውስጥ ገብቶ የነበረው ገንዘብም እየተዘረፈ ለግል ጥቅም አየዋለ መኾኑን አባሎቻችን እንዲያውቁት እንፈልጋለን። ይህ ጉዳይ በሚመለከተው አካል ተጣርቶ ለሕግ በማቅረብ አስፈላጊውን ውሳኔ እንደሚያገኝ ለአባሎቻችንና ለሕዝባችን በዚሁ አጋጣሚ መግለጽ እንሻለን።

3. ኦነግ ለጋራ አመራር አንጂ ለግለሰብ አመራር ቦታ የለውም። የኦነግ መተዳደሪያ ደንብም ይህንኑ ያረጋግጣል። ይሁን አንጂ አቶ ዳውድ ኢብሳ የድርጅቱ ሕገ ደንብ ያልሰጣቸውን ሥልጣን ያላቸው በማስመሰል በግል የወሰዱትና አየወሰዱ ያሉት ሕገወጥ አርምጃዎች በምንም ሁኔታ ተቀባይነት አይኖረውም።

የኦነግ ሥራ አስፈጻሚ ኮሚቴ በአቶ ዳውድ ኢብሳ እየተወሰዱ ያሉትን ሕገወጥ አርምጃዎች አያወገዘ በማወቅም ኾነ ባለማወቅ ከሳቸው ጋር በመወገን አፍራሽ ተልዕኮ ላይ የተሰማሩ አንዳንድ አባላት ወደ ትክክለኛው የትግል መስመር አንዲመለሱ እንመክራለን።

4. የኦነግ የሥራ አስፈጻሚ ኮሚቴ ድርጅቱ በሰላማዌ መንገድ ለመታገል ወስኖ ወደ አገር ቤት የተመለሰበትን የትገል ስትራቴጂ አንዲሁም ከሁለት ዓመት በፊት ከመንግሥት ጋር የተደረሰውን ስምምነት በማክበር ሕጋዊና ሰላማዊ ትግሉን የሚቀጥል መኾኑንና በዚህ የሰላማዊ ትግል ስትራቴጂ የማያምኑና የማያከብሩ አባላት የተለየ አቋም ይዘው ከድርጅቱ ጋር መቀጠል የማይችሉ መኾንናቸውን እያሳወቅነ መስሏቸው ወይም በስሜት የተሳሳተ አቋም የያዙ አባላት ወደ ትክክለኛው መስመር አንዲመለሱ አናሳስባለን።.

በትጥቅ ትግል ተሰማርተው ከሜዳ ያልገቡ የኦሮሞ ነፃነት ሠራዊት አባላትም ከመንግሥት ጋር በሰላማዊ መንገድ ተነጋግረው ወደሰላማዊ እና ሕጋዊ ትግል እንዲቀላቀሉ ጥሪያችንን እናስተላልፋለን።

5. ከአንድ ወር በፊት ጀምሮ የኦነግ ከፍተኛ አመራርን “ከሃዲ” “ጠላት” እና የመሳሰሉ ስሞችን በመለጠፍ አንዲሁም አገሪቷን አየመራ ካለው ፓርቲ ጋር ተቀላቅለዋል በማለት ሲነዛ የቀየውና አየተነዛ ያለው ርካሽ አሉባልታ አንደተለመደው ራስን አቻ የማይገኝለት ታጋይና ጀግና አስመስሎ ለማቅረብ ታስቦ መኾኑና በድርጅቱ ውስጥ ለዓመታት የቆዩት ብሹ አሰራሮች አውነታው እንዳይወጣ በመሸፋፈን ለእውነት የሚታገሉትን ታጋዮች ስም ለማጉደፍ እየተደረገ ያለ የፖለቲካ ሴራ በመኾኑ የኦሮሞ ሕዝብ እውነታውን ለይቶ አንዲረዳ አናስገነዝባለን።

ለሚነዙ ውዥንብሮችና የሀስት ውንጀላዎች ሁሉ ምንጩ አቶ ዳውድ ኢብሳ መሆናቸውን በድጋሚ አንገልጻለን። ቀደም ሲል የኦነግ አመራር የሚታወቀው እውነትን መናገርና በተዓማኒነታቸው ነው። በአቶ ዳውድ የአመራር ዘመን ግን የሴራ ፖለትካ በድርጅቱ ውስጥ የተንሰራፋ በመኾኑ ይህን ከድርጅቱ በማጽዳት የድርጅቱን ዝና ወደ ነበረበት ለመመለስ በቁርጠኝነት እንታገላለን፣ የድርጅቱ አባላትና ደጋፊዎችም ለዚህ እንዲሰሩ ጥሪ አናቀርባለን።

6. የአንድ መሪ ጥንካሬ ትግልን ቋሚ ሥራው በማድረግ የሚመዘን አይደለም። የወቅቱን ተጨባጭ ሁኔታ በመረዳትና ትግሉን ወደፊት ሊያራምድ የሚችል ሐሳብ የሚያመነጭ አመራር ማስገኘት ወሳኝ ነው። ።

ይህም ሊሳካ የሚችለው አሳታፊ፡ ዲሞክራሲያዊና ከሁሉም የኦሮሚያ የምርጫ ወረዳዎች የተወከሉ አባላት የሚሳተፉበት ጠቅላላ ጉባዔ እውን ማድረግ ሲቻል ብቻ ነው። ስለኾነም ኦነግ የድርጅቱ ማዕከላዊ ኮሚቴ በመጋቢት ወር 2012 ያስተላለፈውን ውሳኔ መሰረት በማድረግ ጠቅላላ ጉባዔው በተያዘለት የጊዜ ሰሌዳ እንዲደረግ በቁርጠኝነት በመንቀሳቀስ ላይ ይገኛል።

ስለዚህ በተለያዩ ቦታዎች የምትገኙ ነባር የድርጅቱ አባላትና ታጋዮች፡ በተለያዩ ምክንያቶች ከድርጅቱ የራቃችሁ፡ የተገፋችሁና የተረሳችሁ አባላት ለታሰበው ጉባዔ መሳካት የበኩላችሁን ድርሻ አንድትወጡ የትግል ጥሪ አናስተላልፍላችኋለን።

7.የኦሮሞ ነፃነት ትግል ከውስጥና ከውጭ የገጠሙትን ችግሮችና ያለበትን ድክመት በማስወገድ ትግሉን አጠናክሮ የኦሮሞን ሕዝብ አንድነት ለማስቀጠል ከተለያዩ የኦሮሞ የህብረተሰብ ክፍሎች ፣ ነባር የድርጅቱ ታጋዮች፡ የሃይማኖት መሪዎች፡ ምሁራን፡ አባ ገዳዎችና ወጣቶች የሚያካትት የጋር ምክክር (Intra Oromo dialogue) መድረክ ለማዘጋጀት በሚደረገው እንቅስቃሴ ኦነግ የበኩሉን አስተዋጽዎ ያበረክታል።

የኦሮሞ ነፃነት ትግል ለአንድ ድርጅት ብቻ የሚተው ሳይሆን ሁሉም ዜጋ ሊሳተፍበት የሚገባ ብሔራዊና ሕዝባዊ ትግል ነው።

ሕዝባችንም ይህንን በመገንዘብ በሰላማዊ መንገድ የሚደረገውን ትግል በማጠናከርና በማጎልበት የኦሮሞ ብሔራዊ መግባባትን እውን ለማድረግ የሚደረገውን ጥረት ለማሳካት አንዲተባበር ጥሪያችንን አናስተላልፋለን።

8. ብዙ አመታት ባስቆጠረው የኦሮሞ ነፃነት ትግል ውስጥ ኦነግ ከተለያዩ ብሔርና ብሄረሰቦች ትግል ጋር የትግል አጋርነትና ወዳጅነት ለመፍጠር ጥረቶች አድርጓል። ይህም የትግል አጋርነትና ወዳጅነት በእኩልነት፡ በመከባበርና በዲሞክራስያዊ መርህ ላይ መኾንን መሰረት ያደረገ ነው።

ለታክቲክ ወይም ለግዜያዊ ጥቅም ተብሎ የሚደረግ ትብብር ዘለቄታዊ ጥቅም አያስገኝም። በተለይም ሕወሃት በኦሮሞ ሕዝብና በኦሮሞ ታጋዮች ላይ ላደረሰው ከፍተኛ ጉዳት ይቅርታ ጠይቆ በኦሮሞ ሕዝብ ቅቡልነት አስኪያገኝ ድረስ ኦነግ ከዚህ ድርጅት ምንም አይነት ግንኙነት የሌለው መኾኑን በድጋሚ እያሳወቅነ አቶ ዳውድ ኢብሳ ከአመራሩ ዕውቅና ውጪ የፋይናንስ ሰራተኛውን ባለፈው ጊዜ መቐሌ በተካሄደው የሕወሓት ስብሰባ ላይ አንዲሳተፍና ግኑኘት ለማድረጉ መላኩ የድርጅታችንን ፖሊሲ የጣሰ ሕገወጥ ድርጊት መኾኑን መግለጽ እንፈልጋለን። ይህ በእንዲህ እያለ ኦነግ በኦሮሞና በትግራይ ሕዝብ መካከል ያለው ወንድማዊና ዘላቂ ግንኙነት አንዲጠናከር ይሰራል።

9. በመጨረሻም የኦሮሞ ነፃነት ግንባር ድርጅቱ ከተጋረጠበት አደጋ ለመታደግና ያለውን ድክመት ለማረም የሚሰራ መኾኑ እያሳወቀ የኢትዮጵያ ብሔራዊ የምርጫ ቦርድ ከድርጅታችንና ከአገሪቱ የፓርቲ ሕግና ደንብ ውጪ እየተንቀሳቀሱ ያሉትን የአቶ ዳውድ ኢብሳ ሕገወጥ እንቅስቃሴዎችን አንዲከታተል እያስገነዘብን የኦነግ ሊ/መንበር የሚል ስም በመጠቀም ከቦርዱና ከተለያዩ አካላት ጋር ግኑኘት ለማድረግ የሚያደርጓቸው ጥረቶች በድርጅታችን ዘንድ ተቀባይነት እንደሌለው ደግመን እናሳውቃለን። የኦሮሞ ነፃነት ግንባር ጠቅላላ ጉባዔ ተደርጎ አዲስ መሪ አስኪመረጥ ድረስ የድርጅቱ ተወካይና መሪ ምክትል ሊ/መንበሩ አቶ አራርሶ ቢቂላ እንደኾኑ በድጋሚ እናሳውቃለን።

የኦሮሞ ነፃነት ግንባር

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!