Federal Attorney General

ጠቅላይ ዓቃቤ ሕግ

ከኢፌዲሪ ጠቅላይ ዓቃቤ ሕግ የተሠጠ መግለጫ

የኢፌዲሪ ጠቅላይ ዓቃቤ ሕግ የፍትሕ ሥርዓቱን የማጠናከርና የሕግ የበላይነትን የማክበርና የማስከበር ተግባሩን አጠናክሮ ለማስቀጠል ዘርፈ ብዙ ሥራዎችን እያከናወነ እንደሚገኝ ይታወሳል፡፡ በተለይም መንግሥት የሕግና የፍትሕ ሥርዓቱን ለማሻሻልና በዘርፉ አሳታፊነትን ለማጎለበት በሠጠው ትኩረት መሠረት ከመንግሥት መዋቅር ውጭ ከፍተኛ ልምድና ብቃት ያላቸውን የሕግ ባለሙያዎች ያካተተ የሕግና ፍትሕ ጉዳዮች አማካሪ ጉባዔ በማቋቋም የሰብዓዊና የዴሞክራሲ ምህዳሩን ሊያሰፉ የሚችሉ ሕጎች ላይ ማሻሻያ አድርጓል።

አንዳንዶቹ ከ20 ዓመት በላይ ለማሻሻል ተብሎ ከፍተኛ የሀብት ብክነት ሲፈጸምባቸው የነበረው በአማካሪ ጉባዔ በአጭር ጊዜ ውስጥ እንዲሻሻል የተደረጉት ተጠቃሽ ናቸው።

የሕግ የበላይነትን በማረጋገጥ የዴሞክራሲ ምህዳሩን ለማስፋትና ሕዝባችን በፍትሕ ሥርዓቱ ያለውን አመኔታ ለማሻሻል በተወሰደው የማሻሻያ እርምጃ፤ ለሕዝባችን ተስፋን ያሰነቁ ተግባራት ተፈጽመዋል።

በሌላ በኩል የሕግ ተጠያቂነትን ከማረጋገጥ ጋር በተያያዘ በከባድ ሰብዓዊ መብት ጥሰት፣ በጅምላ ጭፍጨፋና ከባድ የሙስና ወንጀል ፈጽመዋል ተብለው የተጠረጠሩ የመንግሥት ባለሥልጣናት፣ የሥራ ኃላፊዎች እንዲሁም የዚህ ድርጊት ተሳታፊ የኾኑ ተጠርጣሪዎችን በቁጥጥር ሥር በማዋል ጉዳያቸው በፍርድ ቤት እንዲታይ ተደርጓል።

ይሁን እንጂ ከቅርብ ጊዜ ወዲህ በተለያዩ የአገሪቱ ክፍሎች እየተበራከቱ የመጡ የወንጀል ተግባራት በተለይም በብሔር ወይም በክልሎች መካካል፣ በግለሰቦችና ቡድኖች በሚፈጠር ግጭት መነሻነት ወንጀል የተፈጸመባቸው አካባቢዎች ዋና ዋና ተጠርጣሪዎችን በሕግ ቁጥጥር ሥር እንዲውሉ በማድረግ የተደራጀ የምርመራና ክስ የመመስረት ሒደት ላይ እንገኛለን።

በዚህ መሰረት፣ በኦሮሚያ ክልል ምዕራብ ጉጂ ዞንና በደቡብ ክልል ጌዲዮ ዞን አንዳንድ አካባቢዎች፣ በሶማሌ ብሔራዊ ክልል በጅግጅጋና ሌሎች ዞኖች፣ በቤንሻንጉል ጉሙዝ ብሔራዊ ክልል ካማሽ ዞን፣ መተከል ዞን፣ በደቡብ ክልል በሐዋሳ፣ በቴፒና ሸካ ዞን፣ በኦሮሚያ ክልል አዳማ ከተማ፣ ምሥራቅ ሸዋ፣ አርሲ፣ ምሥራቅ ሐረርጌ፣ ባሌ ዞን፣ ምዕራብ አርሲ፣ ምዕራብ ሸዋና አዲስ አበባ ዙሪያ ኦሮሚያ ልዩ ዞን፣ በአማራ ክልል ሰሜን ሸዋ ዞንና በኦሮሞ ብሔረሰብ አስተዳደር፣ በአዊ ብሔረሰብ ዞን በጃዊ ወረዳ፣ በጎንደር፣ በአዲስ አበባ በሃይማኖት ተቋማት እንዲሁም በአንዳንድ የከፍተኛ የትምህርት ተቋማት የተፈጸመውን ወንጀል ድርጊቶችን መነሻ በማድረግ ተጠሪጣሪዎችን ቁጥጥር ሥር የማዋል ሥራ ተጀምሯል።

ይህ በእንዲህ እንዳለ የካቲት 5 ቀን 2012 ዓ.ም በክቡር ምክትል ጠቅላይ ሚኒስትሩ የሚመራ የፌዴራል፣ የፍትሕና የጸጥታ መዋቅር አመራሮች እንዲሁም የክልሎች ርዕሰ መስተዳድሮችና የፍትሕና የጸጥታ መዋቅር አመራሮች ባካሔዱት አስቸኳይ ግምገማ ለውጡን ተከትሎ በተለያዩ የአገሪቱ ክፍሎች ማንነትን መሠረት ያደረጉ፣ በሃይማኖት ተቋማት ላይና በከፍተኛ ትምህርት ተቋማት ላይ የተፈጸሙ ወንጀሎች እንዲሁም በከባድ የሙስና ወንጀል ተጠርጥረው ያልተያዙ ተጠርጣሪዎችን ለፍርድ ለማቅረብ ከመቼውም ጊዜ በላይ በቁርጠኝነት ሕዝቡን ይዞ እየሠራ መኾኑን ገልጿል።

መንግሥት በለውጡ ማግስት የፖለቲካ ምህዳሩን ለማስፋት በሕግና ፍትሕ ሥርዓቱ ላይ እምርታዊ ለውጥ ለማምጣት በርካታ ተግባራትን ሲያከናውን እንደነበረ እሙን ነው። የፍርድ ወሳኔ ያገኙና ጉዳያቸው በምርመራ ላይ ያሉ ተጥርጣሪዎችን በምሕረት አዋጅ ክሳቸው እንዲቋረጥ ተደርጓል። በርካቶቹ በይቅርታ ከእስር እንዲፈቱ ተደርገዋል። ይህ የመንግሥት ሆደ ሰፊነትን ያልተረዱ አንዳንድ አካላት ኢ-መደበኛ በኾነ ቡድናዊ አደረጃጀት በርካታ ወንጀሎችን ሲፈጽሙ ተስተውሏል። በዚህም ክቡር የሰው ልጅ ሕይወት ጠፍቷል፣ የሕዝብና የመንግሥት ሀብትና ንብረት ተዘርፏል፣ ወድሟል። ስለኾነም ከእንግዲህ ወዲህ ለአገራችን ደኅንነትና ለሕዝባችን ሕልውና ሲባል ከዚህ በኋላ ማናቸውንም በወንጀል ድርጊት ውስጥ የሚሳተፉ አካላትን እንደማይታገሥ ጽኑ አቋም ተይዟል።

ከፍተኛ አመራሩ ባደረገው ግምገማ በየቦታው የሚፈጠሩ የወንጀል ድርጊቶች ዋነኛ ችግር የፖለቲካ አመራሮች እጅ ያለበት መኾኑን በሚገባ የተረዳ ሲሆን፥ ይህን የማይገባ ተግባር ሲያስፈጽምና ሲፈጸም በዝምታ ሲያልፍ የነበረው አመራር ከዚህ እንዲታረም በዚህ አጋጣሚ ማሳሰብ ይፈልጋል።

በአገሪቱ በሚፈለገው መጠን የሕግ የበላይነትን በማስከበር ዘንድ የነበረውን ፈተና ለአንዴና ለመጨረሻ ጊዜ የምንሻገረው እንደሚኾን እሙን ነው። ስለኾነም እነዚህን ሕገ ወጥ ተግባራት የምንሸከምበት ጫንቃና በወንጀል የተጠረጠሩ ግለሰቦችን ለፍርድ የማናቀረብበት ምንም ምክንያት የማይኖረን መኾኑን እንገልጻለን።

ስለኾነም በዛሬው መድረካችን በተፈጸሙ ወንጀሎች ላይ የተሳተፉ አካላትን በሕግ ፊት ለማቅረብ፣ የዜጎች ሰብዓዊ መብት ጥሰት ለመከላከል የተጀመረው ሥራ ተጠናክሮ እንዲቀጥል እንዲሁም ተጠርጣሪዎች በሕግ ፊት እንዲቀርቡ በሚደረገው ጥረት ላይ የሚያደናቅፉ አካላት ላይ ያለምንም ምሕረት በማያዳግም ሁኔታ ተጠያቂ የሚያደረግ መኾኑን መግለጽ ይፈልጋል።

በሌላ በኩል ከወንጀል ድርጊቶች ጋር በተያያዘ የተጀመረው የተጠረጠሩትን ግለሰቦች ለፍርድ የማቅረብ ሒደቱ ተጠናክሮ የሚቀጥል ይኾናል፤ በዚህም የሕግ የበላይነትን የማስከበር እንቅስቃሴ ለድርድር አይቀረብም። ሕብረተሰቡም ጥፋት ፈጻሚዎችን ለሕግ ለማቅረብ በሚደረገው ርብርብ እንደ ወትሮው ሁሉ አሁንም የተለመደ ትብብሩን እንዲቀጥል በዚህ አጋጣሚ እንጠይቃለን።

ኢፌዲሪ ጠቅላይ ዓቃቤ ሕግ
የካቲት 5 ቀን 2012 ዓ.ም.
አዲስ አበባ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!