ባልደራስ

ባልደራስ ለእውነተኛ ዴሞክራሲ ፓርቲ

ከባልደራስ ለእውነተኛ ዴሞክራሲ ፓርቲ የተሰጠ መግለጫ

የኢትዮጵያ ሕዝብ በተባበረ ትግል ጨቋኝ፣ ፀረ ኢትዮጵያና ፀረ-ዴሞክራሲ የነበረውን የሕወሓት/ኢሕአዴግ አገዛዝ አስወግዶ ዴሞክራሲያዊ ሥርዓት እንዲሰፍን መጠነ ሰፊ ትግል ማድረጉ ይታወቃል። ይህን ተከትሎ በዶ/ር ዐቢይ የሚመራው የኦዴፓ/ብልጽግና አመራር የሕዝቡን የለውጥ ፍላጎት ከዳር ለማድረስ በአደባባይ ቃል ገብቶ ኃላፊነቱን መረከቡም ይታወሳል። ኾኖም ይህንን ወደ ነፃነትና ወደ ዴሞክራሲ የሚደረግ የሽግግር ጥያቄ በተገቢው ሁኔታ ለመመለስ በጣም አቅቶታል። ላለፉት ሁለት ዓመታት በገሀድ እንደታየው የብልጽግና ፓርቲ እየተከተለ ያለው ፖለቲካ በተረኝነት መንፈስ የተቃኘ ነው። ለዚህም ነው ፓርቲው የኢትዮጵያን ፖለቲካ ማረጋጋትና፣ የሕዝቡን ሰላምና ጸጥታ ለማስከበርና ብሔራዊ መግባባት ለማስፈን ያቃተው።

ፓርቲያችን ባልደራስ ለእውነተኛ ዴሞክራሲ በኢትዮጵያ የምርጫ ቦርድ እውቅና አግኝቶ ለኢትዮጵያ የተሻለ የፖለቲካ አማራጭ ለሕዝብ አቅርቦ የሚንቀሳቀስ ፓርቲ መኾኑ የሚታወቅ ሲሆን፣ ለወደፊት ምርጫው በሚቃረብበትም ጊዜ ደግሞ የፖለቲካ፣ የኢኮኖሚና የማኅበራዊ ፖሊሲዎችን አጠናቅሮ ለኢትዮጵያ የተሻለ ፍኖተ ካርታውን ለሕዝብ በይፋ ለማቅረብ ናፍቋል። ይሁን እንጂ በዶክተር ዐቢይ የሚመራው መንግሥት አገሪቱን ለምርጫ ለማዘጋጀት በብቃት ሲሠራ አይታይም። ይልቁንም ጽንፈኝነትና ተረኝነት እያደገ እያደገ መጥቷል።

ሰሞኑን አዲስ አበባን ጨምሮ በአገራችን የተለያዩ ክፍሎች ጽንፈኞች በቀሰቀሱት አመጽ ከፍተኛ የሰብአዊ እልቂትና የአገር ሀብት ውድመት ተከስቷል። ባልደራስ ይህንን ውድመት የአንድ ጀምበር ወለድ ችግር አድርጎ አያየውም። ችግሩ ላለፉት ሃያ ሰባት ዓመታት የተዘራው ክፉ ዘር መራራ ፍሬና የሥርዓተ ትምህርቶቻችን ችግሮች ፍሬ ነው። ገበሬ የዘራውን ያንኑ ዐይነት ያጭዳል። ገብስ ዘርቶ ጤፍ ሊያጭድ እንደማይወጣ ከሃያ ሰባቱ ዓመት ብሎም ተለውጠናል ከተባለበት ጊዜ ጀምሮ ባሉት ሁለት ዓመታት ከፖለቲካችን እርሻ ያመረትነው ነገር ግጭትና መፈናቀል ነው።

ባልደራስ ከጥቂት ቀናት በፊት በከተማችን አዲስ አበባና በሌሎች የአገራችን ክፍሎች የተነሳውን የጽንፈኞች ኹከት በጽናት ያወግዛል። በሰኔ 22 ቀን 2012 ዓ.ም. በአዲስ አበባና በሌሎች የአገራችን ክፍሎች የተነሳው ብጥብጥና ውድመት ያሳሰበው ፓርቲያችን የሰላም፣ የመረጋጋትና የፍትሕ ጥሪ ለማደርግ ወስኖ መግለጫ ለማዘጋጀት የፓርቲያችን ፕሬዚደንትና ሌሎች ኃላፊዎች ሲዘጋጁ አቶ እሰክንድር ነጋ በፌደራል ፖሊስ ድንገት ታፍነው ከቢሮአቸው ተወስደዋል። አቶ እስክንድር ሲያዙ ይህንን መግለጫ ለማውጣት ደፋ ቀና ሲሉ ነበር። ፕሬዝዳንት እስክንድር በ24/10/2012፤ 10፡30 ሰዓት ላይ ከተያዙ በኋላ የአደረጃጀት ጉዳይ ኃላፊ የኾኑት አቶ ስንታየሁ ቸኮል በደቂቃዎች ልዩነት ወደ ቤታቸው በማቅናት ላይ እያሉ ከመንገድ ተይዘዋል። በተመሳሳይ ሁኔታ የፓርቲያችን የክፍለ ከተማ አደራጅ የኾኑት ወይዘሮ ቀለብ ስዩም በሰኔ 26 ቀን 2012 ዓ.ም. በመንግሥት ታስረዋል። ወይዘሮ ቀለብ ስዩም ማለት በቅርቡ በዋልታ ቴሌቪዠን ላይ ሲተላለፍ በነበረው ዶክመንተሪ በሕወሓት የደረሰባቸውን ግፍ እያነሱ ሲያነቡ የታዩት አባላችን ናቸው። ወይዘሮ ቀለብ ቀደም ባለው ጊዜ ለመስማት የሚዘገንን ግፍ የተቀበሉ ሴት ናቸው። የዶክተር ዐቢይ መንግሥት የእኚህን ሴት ብሶት ለፖለቲካ ፍጆታ ለማዋል የተጠቀመበት መኾኑ ወይዘሮ ቀለብን አሳዝኖ ነበር። ፈጽሞ ሊታመን በማይችል መልኩ መሪዎቻችንን በኹከት ተወንጅለው ታስረዋል። በተጨማሪም አቶ እስክንድርና አቶ ስንታየሁ በተያዙበት ጊዜ በፖሊስ ከፍተኛ የኾነ አካላዊ ድብደባ ተፈጽሞባቸዋል። ከዚህም በተጨማሪ ሁለት በሁለት ተኩል ገደማ በኾኑ ክፍሎች ከሌሎች እስረኞች በተለየ ሁኔታ እንዲታሰሩ ተደርገውና ለሰው ልጅ አስፈላጊ የኾኑ ነገሮች ተነፍገው በዓለም አቀፍና በአገራችን ሕግ ከተደነገገው የእስረኞች ሰብአዊ አያያዝ ውጭ ተይዘው በመከራ ላይ ይገኛሉ። በበቂ ሁኔታ አየር በማይገባባቸው ክፍሎች ውስጥ በመታሰራቸው ምክንያት በፓርቲያችን አመራሮች ማለትም በአቶ እስክንድር፣ በአቶ ስንታየሁና በወይዘሮ ቀለብ ስዩምና እንዲሁም ቀጥሎ በታሰረው የክፍለ ከተማ አመራራችን አቶ ቢኒያም ላይ የጤና እክል ቢደርስ ፓርቲያችን የብልጽግናን ፓርቲ አመራሮችን በኃላፊነት የሚጠይቅ መኾኑን ለማስገንዘብ እንወዳለን። የተያዙት አባሎቻችን በሕጉ መሠረት በወቅቱ ፍ/ቤት እንዲቀርቡና መብታቸው እንዲጠበቅ እንጠይቃለን። በተጨማሪም የሰላማዊ ትግል መሪ አቶ እስክንድር ነጋ እና አቶ ስንታየሁ ቸኮል በተያዙበት እለት በአዲስ አበባ በፖሊስ የተፈፀመባቸውን ከፍተኛ አካላዊ ድብደባ ያስፈጸሙ እና የፈጸሙ አካላት ተጣርቶ በሕግ ፊት እንዲጠየቁ ፓርቲያችን በጥብቅ ያሳስባል።

በባልደራስ አመለካከት ከላይ የተገለጸው በአመራሮቻችን ላይ የተፈፀመው ኢ-ሰብአዊነትን የተላበሰ አያያዝና የጥበቃ ሁኔታ በአጋጣሚ የተፈፀመ ሳይኾን ከዚህ ቀደም በፓርቲው ላይ በተከታታይ ሲደርስበት የነበረው ወከባና እንግልት ቀጣይ እርምጃ ነው። በባልደራስ ላይ የሚደርሰው ማቆሚያ የሌለው ግፍ የባልደራስ ፓርቲ በብልጽግና ፖለቲካ ላይ ያስመዘገበው የፖለቲካ የበላይነት በፈጠረው መጥፎ ቅናትና ቁጭት የተፈፀመ የቂም በቀል ድርጊት ነው።

ለነዚህ በደሎች እንደማሳያ እንዲኾን ለአብነት የሚከተሉትን ሐቆች እናቀርባለን፡-

1ኛ/ በፓርቲው ምስረታም ኾነ ከዚህ ቀደም ይሰጡ የነበሩ ጋዜጣዊ መግለጫዎቻችንን ማወክ፣ እንዳይከናወኑ መከልከልና ማዋከብ እንዲሁም ማንነታቸው የማይታወቁ ሰዎች ኹከት ሲፈጽሙ የመንግሥት የጸጥታ ተቋማት በቅርብ እርቀት ኾነው ምንም ዐይነት ሕጋዊ እርምጃ ለመውሰድ ሳይፈለጉ ሲቀሩና ዳተኛ ሲሆኑ መቆየታቸው፣

2ኛ/ ለፓርቲው ቅድመ ምስረታ ስብሰባ በኢንተርኮንቴንታል ሆቴል ውስጥ ፓርቲው ሊያደርገው የነበረውን ስብሰባ በመንግሥት አካላት መታገዱ፣

3ኛ/ የአገር ባህል፣ እሴትና ትውፊት ማሳያ የኾኑ ቅርሶች በመንግሥት በተደጋጋሚ ሲፈርሱና ሲወድሙ ፓርቲያችን በመቃወምና ለሕዝብ ለማሳወቅ ባደረገው ያላሰለሰ ጥረት ምክንያት በመንግሥት እስርን ጨምሮ ከፍተኛ እንግልትና መዋከብ እንዲደርስበት ሲደረግ መቆየቱ፣

4ኛ/ አዲስ አበባ ውስጥ በተለያዩ ምክንያቶች የነበሩ ክፍት ቦታዎች ላይ በሕገወጥ መንገድ እየተደረገ ያለውን የመሬት ወረራ በማውገዝ፣ እንዲሁም የአዲስ አበባ ነዋሪዎች ከእለት ጉርሳቸው ቆጥበው የገነቡትን የጋራ መኖሪያ ቤቶች በግፍና በዘረኝነት ነጥቆ ተረኛ ነን ለሚሉ መታደሉን በመቃወም፣ የድሀ ድሆች የኾኑ ዜጎች በተለያዩ አካባቢዎች ያቆሙትን ጎጆ በማንአለብኝነት ሲያፈርሱ ለሕዝብ በማጋለጣችንና፣ በወረርሽኝና በክረምት ወቅት ሲያፈናቅሉ ፓርቲያችን በመቃወሙ በተለያዩ የመንግሥት አካላት ከፍተኛ ማስፈራሪያና ጫና በአባላቱና በአመራሮቹ ላይ ሲደርስ መቆየቱ፣

5ኛ/ በአገራችን ላይ በተከሰተው የኮረና ወረርሽኝ (Covid 19) ምክንያት በሕዝባችን ላይ ዘርፈ ብዙ ሰብአዊ ቀውሶች ተከስተዋል። ይህንን ከግንዛቤ የከተተው ባልደራስ ለእውነተኛ ዴሞክራሲ ፓርቲ ከግማሽ ሚሊዮን ብር በላይ ከበጀቱ ቀንሶ እርዳታ ለሚያሻቸው ለአዲስ አበባ ነዋሪዎች ለማደል ሲንቀሳቀስ ከመንግሥት ከፍተኛ አካል የመጣ ትእዛዝ ነው በሚል የጸጥታ አካላት እርዳታውን እንዳንሰጥ ከልክለውናል። በተጨማሪም ፓርቲያችን በገንዘቡ የገዛውን የእርዳታ እህልና ቁሳቁስ በማገትና በአደባባይ እንዳይታደል በማድረግ በደል ተፈጽመዋል።

6ኛ/ በከተማችን በሚገኙ እድሜ ጠገብ ሀውልቶችና ታሪካዊ ቦታዎች አቅራቢያ ፓርቲያችን ጽዳት ለማድረግ ጠቅላይ ሚኒስትር ዐቢይ አሕመድ ራሳቸው በሚያበረታቱት የችግኝ ተከላ መርሐ ግብር መሠረት ፓርቲያችን የችግኝ ተከላ ለማካሄድ በሚያደርገው እንቅስቃሴ የጸጥታ ሀይሉ ሌላ ሥራ የሌለው እስኪመስል እግር በእግር እየተከታተለ ሲያደናቅፈን ቆይቷል። ለቅርሶቻችን ጠበቃ መኾናችን እያስጠቃን ነው። የምንሰራቸው ቅዱስ ሥራዎች ሁሉ መንግሥትን ሲያበሳጩ እናያለን። የተሻለ ራእያችን ስለምን ያስከስሰናል ለጋራው ቤታችን አስተዋጾ ለማድረግ ስንነሳ መንግሥት ለምን ያሰቃየናል። ይህ ኢትዮጵያውያን ሁሉ በጋራ ሊያወግዙት የሚገባ ተግባር ነው ።

ከዚህ በላይ ያመላከትናቸው ድርጊቶችና በፓርቲያችን አመራሮች ላይ በመንግሥት ሲደረግ የቆየው መጠነ ሰፊ ወከባና እንግልት እየደረሰብን ያለው በተረኛነት መንፈስ የሚመራው የኦዴፓ/ብልጽግና አመራር የሚወስዳቸውን የተሳሳቱ የፖለቲካ እርምጃዎች ያለምንም ለዘብተኛነት መርኅን መሠረት በማድረግ ስለምንታገል ነው። ሰሞኑን በአዲስ አበባ ከተማና በተለያዩ የአገራችን አካባቢዎች ጽንፈኞች ባደራጁትና በቀሰቀሱት መንጋ እየደረሰ ያለው ኢ-ሰብአዊ እልቂትና የአገር ሀብት ውድመት እንዲሁም እየቀጠለ ያለው የአካላዊና የሥነልቦናዊ ወከባ መነሻው በአርቲስት ሐጫሉ ሁንዴሳ ላይ በታቀደ መልኩ የተፈፀመውና በማናቸውም መመዘኛ ተቀባይነት የሌለው የፖለቲካ ግድያ ብቻ እንደኾነ አድርጎ መንግሥት ሙሉ በመሉ በሚቆጣጠራቸው ሚዲያዎች አማካይነት ቀን ከሌሊት በማስተጋባት ላይ ይገኛል።፡ ባልደራስ ለእውነተኛ ዴሞክራሲ ፓርቲ ይህን የመንግሥት አቀራረብ አይጋራም። በፓርቲያችን አመለካከት በሰሞኑ አዲስ አበባን ጨምሮ በአገራችን በተለያዩ ቦታዎች በደረሰው ኢ-ሰብአዊ ፍጅትና የአገር ሀብት ውድመት በጽንፈኛ ብሔርተኞች ጉዳይ ፈፃሚዎች እንደተፈፀመ መንግሥት በገለጸው በሚታመነው የሐጫሉ ሁንዴሳ የፖለቲካ ግድያ አማካይነት የተጫረ ቢሆንም በክብሪት የተሞላውን ሳጥን በጋራ ባለቤትነት የያዙት ጽንፈኞች ብቻ ሳይኾኑ የኦሕዴድ/ኦዴፓ/ብልጽግና አመራሮች ጭምር ናቸው። ለዚህ አባባላችን የሚከተሉትን ጭብጦች በአስረጂነት ማቅረብ ይቻላል፡-

1ኛ/ ከኦነግ ወደ አገር መግባት ጋር ተያይዞ ወደ አዲስ አበባ ከተለያዩ አካባቢዎች ለአቀባበል የመጡ በርካታ ዜጎች እንደነበሩ ይታወሳል። ኾኖም ይህንን ተገን በማድረግ የመጡ የጥፋት ኃይሎች ወይም አሸባሪዎች በከተማዋ መኻል የሚገኙ ታሪካዊ ቅርሶችን ለማፈራረስ እንዲሁም በከተማዋ ዳርቻ በተለይ በቡራዩ የሚኖሩ ንጹሐን ዜጎችን በማሸበር “ወደመጣችሁበት ተመለሱ” በማለት ባስነሱት ረብሻ ዘግናኝ የኾኑ ግድያዎችን፣ የንብረት ማውደምና ዜጎችን ማፈናቀል ተከስቷል። ይህንን የሽብር ተግባር ተቃውሞ የወጣውን የአዲስ አበባ ሕዝብ በተለይም ወጣቶችን መንግሥት በጸጥታ ኃይሉ አማካኝነት ገድሎና አብዛኞችን አፍሶ በካምፕ ውስጥ ማሰሩ ይታወቃል። በወቅቱ የሽብር ተግባር የፈፀሙትን ግን እስከዛሬ በፍትሕ አደባባይ አላስቆማቸውም።

2ኛ/ በአዲስ አበባ ዙሪያ በተለይም በለገጣፎ አካባቢ ለበርካታ ዓመታት ይኖሩ የነበሩ ዜጎችን ማንነታቸው እየተመረጠ ሲገደሉ፣ በተጨማሪም የኢትዮጵያ ኦርቶዶክስ ቤተክርስቲያን ስትቃጠል ዜጎች ላቀረቡት አቤቱታ ጠቅላይ ሚኒስትሩ መልስ የሰጡት እጅግ ዘግይተው ነበር። መልስ በሰጡበትም ጊዜ የተጠቀሙበት አባባል ስለ ጉዳዩ አልሰማሁም አላየሁም የሚል ነበር። ከዚያም በኋላ ተገቢና ሕጋዊ እርምጃ እንዲወሰድ አላደረጉም። ይህ በወቅቱ በሕግ የበላይነት ላይ የተፈፀመ ዳተኝነት ጽንፈኞች ይበልጥ እንዲበረታቱ አድርጓቸዋል።

3ኛ/ ከዚህ ቀደም በእሬቻ ክብረ በዓል አከባበር ላይ ተደርጎ በማይታወቅ መልኩ ለበዓሉ በጽንፈኛ ብሔረተኞች ሐሰተኛ የታሪክ ትርክት ላይ በመመስረት በወቅቱ የኦሮሚያ ክልል ምክትል ርዕሰ መስተዳድር የኾኑት አቶ ሽመልስ አብዲሳ በአደባባይ ባደረጉት ንግግር ላይ “ከ150 ዓመት በኋላ ነፍጠኞች ኦሮሞን በሰበሩበት በፊንፊኔ መልሰን አከርካሪያቸውን በመስበር እንዳይነሱ አድርገናቸዋል” በማለት በማንነት ላይ የተመሰረተ የተቆራኙ ማኅበረሰቦችን እርስ በርስ እንዲፋጁ የሚያነሳሳ ንግግር በአደባባይ ተናግረዋል።

4ኛ/ ምክንያቱ በውል ባልታወቀ ሁኔታ አቶ ጃዋር መሐመድ ጥበቃዎቼ ተነሱብኝ በማለት ባስነሳው አመጽ መንግሥት ይፋ ባደረገው መረጃ መሠረት ቁጥራቸው 86 የኾኑ ንጹሐን ዜጎች ሕይወት ተቀጥፏል፣ በበርካታ ዜጎች ላይ የአካል ጉዳት ደርሶባቸዋል፣ በርካቶች ተሰደዋል፣ እንዲሁም ከፍተኛ መጠን የነበረው ንብረት ወድሟል። ይህንን ግፍ ተከትሎ ጠቅላይ ሚኒስትሩ ወዲያውኑ መልስ መስጠትና ጥፋተኞችን ለሕግ ማቅረብ ሲገባቸው እስካሁን ይህ አልተደረገም። በወቅቱ ስለተፈፀመው ድርጊት ቆይተውም ቢሆን መልስ በሰጡበት ጊዜ የተፈፀመው ነገር ኢ-ሰብአዊ ድርጊት ሳይኾን ግጭት እንደኾነ አርገው አሳንሰው ነው ያቀረቡት። የተጣለባቸውን የዜጎችን ደኅንነት የመጠበቅና የማስጠበቅ ከፍተኛ መንግሥታዊ ኃላፊነት ቸል በማለት ስለተፈፀመው አስከፊ ድርጊት ከ14 ቀን በኋላ ባቀረቡት ትንተና የሟቾችን የዘውጌ ማንነት በማብራራት ሌሎችን ለበቀል የሚያነሳሳ ንግግር ማድረጋቸው ይታወሳል። ጠቅላይ ሚኒስትሩ እንደ አንድ የአገር መሪ አገሪቱ ላይ መከራ ሲዘንብ ምንም ባለመናገርና ለዜጎች መልእክት ለረጅም ጊዜ ባለመድረስ ግዴለሽነታቸውን አሳይተዋል። ይህም አልበቃ ብሎ ጠቅላይ ሚኒስትሩና የመከላከያ ሚኒስትሩ ሐረር ላይ ግጭቱን አስመልክቶ ባደረጉት ስብሰባ ከበቡኝ በሚል ለብዙኀን ዜጎች እልቂትና ለንብረት መውደም ምክንያት የነበረን ግለሰብ፤ “በመኻላችን ግጭት የለም፤ የቃላት አለመግባባት ተፈጥሮ ነው፣ ትላንትም አብረን ስንሠራ ነበር። ዛሬም ኾነ ነገ አብረን እንሠራለን” በማለት አሸባሪዎቹን የሚያበረታታ ጥፋተኞችም ከሕግ በላይ እንዲኾኑ የልብ ልብ የሰጠ ፍጹም ከመሪ የማይጠበቅ ድርጊት ኾኖ አልፏል።

5ኛ/ የአዲስ አበባ ምክትል ከንቲባ አቶ ታከለ ኡማ የፓርቲያቸውን የኦዴፓ/ብልጽግናን ድርጅታዊ አቋም በማንፀባረቅ “አዲስ አበባ የኦሮሞ የፖለቲካ ትግል ማዕከል ናት” የሚል ንግግር በአደባባይ አሰምተዋል። ምክትል ከንቲባው የከተማ ግብርና በሚል በተዘጋጀ የከተማውን መሬት የማደል ፕሮግራም ላይ ያደረጉት ንግግር የአዲስ አበባ ነዋሪዎችን በዜግነት ላይ የተመሰረተ የይዞታ ባለቤትነት የካደ ነው። ይህ የፖለቲካ አባባል ጽንፈኞች የተነሱበትን ዓላማ የሚያጠናክር፣ በአዲስ አበባ ነዋሪዎች ላይ ከፍተኛ ሥጋት የጫረ በየጊዜው ለሚደረገው ብጥብጥ በማዳበሪያነት ያገለገለ ነው። በከተማው ውስጥ በተረኛነት ስሜት እየተስፋፋ ያለው የመሬት ወረራ የኦዴፓ/ብልጽግና ድጋፍ ያለው ስለመኾኑ የአደባባይ ምስጢር ነው። የመሬት ወረራን በማጋለጥ አቤቱታ ያቀረቡ ሰዎች በወረዳ አመራሮች ከሚሰጣቸው መልስ ለመታዘብ የሚቻለው ይህንኑ ነው።

ከላይ ከተራ ቁጥር አንድ እስከ አምስት የገለጽናቸው ማሳያዎች ከብዙ በጥቂቱ ሲሆኑ የመንግሥት ከፍተኛ ባለሥልጣናት በአገራችን እየታየ ለሚገኘው ሥርዓት አልበኝነትና ሲልም ሽብርተኛነት ቀጥተኛ ተጠያቂዎች እንደሆኑ ባልደራስ ለእውነተኛ ዴሞክራሲ ፓርቲ አበክሮ ያምናል። ባልደራስ ለእውነተኛ ዴሞክራሲ ፓርቲ በማንም ዜጋ ላይ የሚደረግ ግድያን በፍጹም ያወግዛል። በዘፋኝ ሐጫሉ ሁንዴሳ ላይ የተፈፀመውንም ግድያ ያወግዛል። ገዳዮቹንም በፍትሕ እንዲዳኙ አበክሮ ይጠይቃል።

እንደሚታወቀው በሕገ መንግሥቱ ውስጥ አዲስ አበባ የኦሮሚያ ክልል ማዕከል እንደመኾኑ ልዩ ጥቅም ይከበርለታል የሚለውን የሕገ መንግሥቱን አንቀጽ ባልደራስ በጽኑ ይቃወማል። ይህንን አንቀጽ ብቻ ሳይኾን ባልደራስ ሕገ መንግሥቱ ሙሉ በሙሉ ተሽሮ አዲስ ሕገ መንግሥት እንዲዘጋጅ በተደጋጋሚ ሲገልጽ እንደቆየ ይታወቃል። ወደፊትም ትግሉን አጠናክሮ ይቀጥላል። ኦሕዴድ ብልጽግናን ከመቀላቀሉ በፊት በአዲስ አበባ ላይ ፍጹም የተሳሳተ ድርጅታዊ አቋም “አዲስ አበባ የኦሮሞ ናት” በሚል መግለጫ ማውጣቱ የቅርብ ጊዜ ትውስታ ነው። ይህም አቋም ጽንፈኛው አካል አሁን እያደረሰ ላለው ሽብር እንደመነሻነት ወስዶታል። ይህ ጉዳይ ለአገራችን ሕልውና ከፍተኛ ኪሳራ ያመጣል። የሚሻለውና ለኢትዮጵያ አገራችን መጻኢ እድል የሚበጀው የተባበረች ኢትዮጵያን በጋራ መገንባት ነውና ባልደራስ ለዚህ ሳይታክት ይሠራል።

ባልደራስ የአዲስ አበባን ሕዝብ ለፖለቲካ ተሳትፎ ሲያደራጅ ቆይቷል። አሁንም በዚሁ ሕጋዊና ሰላማዊ መንገድ ሕዝብን ማደራጀት ይቀጥላል። ፓርቲው የቆመለትና የተቋቋመበት ዓላማም ይህ ነው። ባልደራስ ለእውነተኛ ዴሞክራሲ ፓርቲ የዘፋኝ ሐጫሉ ሁንዴሳን ሞት ተከትሎ ለደረሰው የሕይወት፣ የአካልና የንብረት ጉዳት ሙሉ ለሙሉ ተጠያቂው መንግሥት መኾኑን በድጋሚ እየገለጸ የሚከተሉትን ሕጋዊ ጥያቄዎችን ያቀርባል።

1ኛ/ መንግሥት ለጠፋው የንጹሐን ዜጎች ሕይወት፣ ለንብረታቸው መውደም፣ ስደት፣ የሥነ ልቦና ቀውስና የኢኮኖሚ ድቀት ሙሉ በሙሉ ኃላፊነት በመውሰድ ሕይወታቸውን ላጡ ቤተሰቦቻቸው ተገቢውን ካሳ በመክፈል፣ የተሰደዱ ዜጎችን ወደ ቀያቸው ተመልሰው ሰላማዊ ሕይወት እንዲጀምሩ አስፈላጊውን ሁሉ በአስቸኳይ እንዲያደርግና እንዲሁም አስተማማኝ ጸጥታና ሰላም የማስፈን ኃላፊነቱን በአግባቡ እንዲወጣ እንጠይቃን።

2ኛ/ ጠቅላይ ሚኒስትሩ የጸጥታ ምክር ቤት በሚል ከከፍተኛ የመንግሥት ባለሥልጣናት ጋር ባደረጉትና በቴሌቭዥን በተላለፈ ውይይት ላይ የጠቅላይ ዓቃቤ ሕግ ሚኒስቴርና የፌዴራል ፖሊስ ኮሚሽነር የሰጡት አስተያየት የተጠርጣሪዎችን በፍርድ ፊት ንጹሕ ኾኖ የመታየት ሰብአዊ መብታቸውን የጣሰ ከመኾኑም በላይ፤ እንደቀድሞው ከፍትሕ በፊት ዜጎችንና ድርጅቶችን የማሸማቀቅና የዳኞችን ነፃነት በእጅጉ የሚጋፉ ኾኖ አግኝተነዋል። በመኾኑም በዕለቱና ከዚያ ተከትሎ የተከሰቱት ጉዳዮችን የሚያጣራ ገለልተኛ አጣሪ አካል ተቋቁሞ የደረሰውን መጠነ ሰፊ ውድመት እንዲመረመር አበክረን እንጠይቃለን።

3ኛ/ በአዲስ አበባ ከተማ ውስጥ የተከሰተው የንብረት መውደም የጸጥታ አካል ምንም ዐይነት ምላሽ ሳይሰጥ ቆሞ ተመልካች እንደነበረ የከተማው ነዋሪ የሚያውቀው ሐቅ ነው። እንደ ባልደራስ እምነት ይህ ፍጹም ተገቢ ያልኾነ ቸልተኛነትና እሱን ተከትሎ የመጣ የማኅበረሰቡ እራሴን ከሽብርተኛ ጥቃት ልከላከል ብሎ መነሳት ፍጹም ተፈጥሯዊ ግዴታ በመኾኑ የሚደገፍ ነው። በአዲስ አበባ ውስጥ የሚገኙ ፖሊሶችና የጸጥታ ኃይሎች በተደጋጋሚ በከተማ ውስጥ የተከሰተውን ኹከት በሚመለከት የከተማውን ጸጥታ በማስከበር ረገድ በተደጋጋሚ ቸልተኛነት ማሳየታቸውን ነዋሪው ሕዝብ በትዝብት ተመልክቶታል። ይህም የኾነበት ምክንያት በአዲስ አበባ ውስጥ በፖሊስነት እየተመለመሉና እየሰለጠኑ ያሉት የከተማው ነዋሪ ሥነ ልቦና የሌላቸውና ከሌላ አካባቢ የመጡ በመኾናቸው እንደኾነ ባልደራስ በጽኑ ያምናል። ይህ ሁኔታ መለወጥ እንደሚኖርበትና የአዲስ አበባ ሰላምና ጸጥታ ከነዋሪዎቿ በተውጣጣ የፖሊስ ኃይል መጠበቅ እንዳለበት ፓርቲያችን በጽናት ያምናል፤ ለዚህም ይታገላል።

በዚህ አጋጣሚ የአዲስ አበባ ነዋሪ በባልደራስ ሳይኾን በራሱ ተነሳሽነት እራሱን ለመከላከል የወሰደውን እርምጃ ባልደራስ እያደነቀ፣ ይህ የአዲስ አበባ ሕዝብ እራሱን ለመከላከል የወሰደውን እርምጃ ለጽንፈኞችና ለደጋፊዎቻቸው የእግር እሳት እንደኾነባቸው ይገነዘባል። የአዲስ አበባ ነዋሪ ለወደፊትም ከሞግዚት አስተዳደር ነፃ ለመውጣት እራሱን በሰላማዊ ትግል አደራጅቶ አዲስ አበባ ራሷን የቻለች ፌዴራላዊ ክልል እንድትኾን ሊታገል ይገባል።

በመጨረሻም ገዢው ፓርቲ የሕግ የበላይነትን ባለማስከበሩ የተፈጠረውን ከፍተኛ በአገር ደረጃ የደረሰ ውድመትና ክስረት በሌሎች ላይ ለማላከክ የተጓዘበት ርቀት እና የጦስ ዶሮ የማድረግ ተውኔት ክሹፍ ሐሳብነት ከትላንት አንዳች ያለመማር ውጤት መኾኑና ባልደራስ ለማስገንዘብ ይወዳል። የድርጅታችን አመራሮችም ከሕግ ውጪ የፈጸሙት አንዳች ወንጀል የለም።

ባልደራስ ለእውነተኛ ዴሞክራሲ ለተሻለች ኢትዮጵያ ትግሉን የሚቀጥል ሲሆን በመሪዎቻችን ላይ የሚደረግ ግፍ ከትግላችን ወደኋላ እንድናፈገፍግ አያደርገንም። የፓርቲያችን መሪ አቶ እስክንድር ነጋና አብረውት የታሰሩት ጓዶቹ በሐሰት ተወንጅለው ሲታሰሩ ይህ የመጀመሪያ አይደለም። ጀግናው እስክንድር በሕወሓት/ኢሕአዴግ ዘመን በኢትዮጵያ ሐቀኛ ዴሞክራሲና ለእውነተኛ ሕገ መንግሥታዊ ሥርዓት በሰላማዊ መንገድ ሲታገል በሐሰት ተወንጅሎ ከ10 ዓመት በላይ መታሰሩ ይታወሳል። አሁንም የቀጠለው ይኸው የቀድሞ በሐሰት ወንጅሎ የማሰር አባዜ ነው። ይህ እውነታ የሚያመለክተው ገዢው ፓርቲ ለራሱ ብልጽግና የተሰኘ የዳቦ ስም ቢሰጥም፣ በተግባር ከብልጽግና ይልቅ ኢሕአዴግ ቁጥር ሁለት ኾኖ መቀጠሉን ፍንትው አድርጎ የሚያሳይ ነው። እውነት ለተወሰነ ጊዜ ተሸፍኖ ይቆይ ይኾናል እንጂ አይጠፋም። የፓርቲያችን አመራሮች የሚያምኑበት እውነት ነፃ ያወጣቸዋል። በአሁኑ ሰዓት አገራችን ኢትዮጵያ በከፍተኛ ውጥረት ላይ ትገኛለች። በአንድ በኩል የዓባይ ጉዳይ፣ በሌላ በኩል የክልልነት ጥያቄ፣ ድህነትና የፖለቲካ አለመግባባት አገራችንን ወጥረት ውስጥ ከቷታል። በዚህ ጊዜ መንግሥት ልበ ሰፊ ኾኖ ለተሻለ ሽግግር መሥራት ሲገባው ጽንፈኝነትን ሲያራምድ እንዲሁም ፖለቲከኞችንና የመብት ታጋዮችን ሲያስር ይታያል። ይህ ሁኔታ አገሪቱን ወደ በለጠ አለመረጋጋት ከመውሰዱ በፊት ሊቆም ይገባል ብሎ ፓርቲያችን ያምናል።

ባልደራስ ለእውነተኛ ዴሞክራሲ ፓርቲ በተከሰተው ግጭት ወዳጅ ዘመዶቻቸውን ላጡ መጽናናትን፣ አካላቸው ለተጎዳ ቶሎ ማገገምን እየተመኘ፣ ንብረታችው ለጠፋ ካሳ እንዲሰጣቸው ያሳስባል።

ፈጣሪ አምላክ ኢትዮጵያን ይባርክ!
ድል ለዴሞክራሲ!
ሐምሌ 1 ቀን 2012 ዓ.ም.
አዲስ አበባ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!