European Union Flag

የአውሮፓ ሕብረት

ሕብረቱ ምርጫውን አልታዘብም ሲል
ኢትዮጵያ ሕብረቱ ሉዓላዊነትን የሚጋፋ ጥያቄ በማቅረቡ ትከሳለች
በምርጫው ታዛቢ ላለመላክ የተፈለገውም ኢትዮጵያ ሉዓላዊነቴን የሚጋፋ አካሔድ አልቀበልም በማለቷ ነው

ኢዛ (ማክሰኞ ሚያዝያ ፳፮ ቀን ፳፻፲፫ ዓ.ም. May 4, 2021)፦ የአውሮፓ ሕብረት በኢትዮጵያ የሚካሔደውን አገር አቀፍ ምርጫ 2013 ታዛቢዎቹን እንደማይልክ አስታወቀ። ውሳኔውን የኢትዮጵያ መንግሥት ያልተገባ ብሎታል።

የአውሮፓ ሕብረት በቀጣዩ ምርጫ ታዛቢዎችን ለመላክ እቅድ ይዞ የነበረ ሲሆን፤ አሁን ግን ይህንን እቅድ መሰረዙን በይፋ አስታውቋል።

እንደ አውሮፓ ሕብረት ገለጻ፤ ምርጫውን ለመታዘብ ያልቻልኩበት ነው ብሎ የጠቀሰው፤ የምርጫው ታዛቢዎችን ለመላክ በቁልፍ መለኪያዎች ከኢትዮጵያ ባለሥልጣናት ጋር ስምምነት ላይ ባለመደረሱ ነው ብሏል።

የደኅንነትንም ሥጋት እንደ ምክንያት ያስቀመጠ ሲሆን፤ የተልዕኮ ገለልተኝነትና ሌሎች መሠረታዊ መስፈርቶች ያለመሟላታቸውን በመግለጽ፤ ምርጫውን የመታዘብ እቅዱን ሰርዟል።

በአውሮፓ ሕብረት ውሳኔ ተንተርሶ ዛሬ የኢትዮጵያ የውጭ ጉዳይ ሚኒስቴር ቃል አቀባይ አምባሳደር ዲና ሙፍቲ እንደገለጹት ደግሞ፤ የአውሮፓ ሕብረት ይህንን መሰሉን መግለጫ የሰጠው ኢትዮጵያ ሉዓላዊነቷን የሚጻረር አካሔድን አልቀበልም በማለትዋ ነው ብለዋል።

አምባሳደር ዲና ጨምረው እንዳመለከቱት፤ የምርጫ ታዛቢ አልክም ብሎ መግለጫ ያወጣበት ሌላው ምክንያት ደግሞ፤ ሕብረቱ ከኢትዮጵያ ኮምዩኒኬሽን መሣሪያዎች ውጪ የራሴን ይዤ ልግባ በማለቱ ነው።

ይህ ብቻ ሳይኾን የምርጫ ቦርድ ተግባርና ኃላፊነትን የሚጻረር ጥያቄዎች አቅርቦ እንደነበር የጠቆሙት ቃል አቀባዩ፤ ይህ ጥያቄው ውድቅ ስለኾነበት ታዛቢ አልክም ማለቱንም አመልክተዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!