Lidetu Ayalew

አቶ ልደቱ አያሌው

  • ፖሊስ ከሕግ በላይ መኾኑን ያሳየበት ነው ተባለ

  • ጉዳዩ የፖለቲካ ውሳኔ የሚሻ ስለመኾኑ ተመጠቆመ

ኢዛ (ሐሙስ መስከረም ፳፰ ቀን ፳፻፲፫ ዓ.ም. October 8, 2020)፦ የኦሮሚያ ጠቅላይ ፍርድ ቤት ተዘዋዋሪ ችሎት አቶ ልደቱ አያሌው በመቶ ሺህ ብር ዋስ ከእስር ተለቀው ጉዳያቸውን በውጭ ኾነው እንዲከታተሉ ያጸናው ውሳኔ እስካሁን አለመተግበሩ አነጋጋሪ ኾኗል። ፖሊስ ከሕግ በላይ መኾኑን ያሳየበት ነው ተብሎ እየተተቸ ነው።

የኦሮሚያ ጠቅላይ ፍርድ ቤት ተዘዋዋሪ ችሎት አቶ ልደቱ አያሌው የምሥራቅ ሸዋ ዞን አዳማ ከፍተኛ ፍርድ ቤት የሰጠውን የ100 ሺህ ብር ዋስትና በማጽደቅ ከእስር እንዲፈቱ የወሰነው ማክሰኞ መስከረም 26 ቀን 2013 ዓ.ም. ቢኾንም፤ አቶ ልደቱ ከእስር ሊለቀቁ አልቻሉም።

የውሳኔውን አለመተግበር በተመለከተ የኢዴፓ ሊቀመንበር ለተለያዩ የመገናኛ ብዙኀን እንደገለጹት፤ የኦሮሚያ ጠቅላይ ፍርድ ቤት ተዘዋዋሪ ችሎት ያሳለፈውን ውሳኔ እንዲተገብር የውሳኔው ግልባጭ የደረሰው የቢሾፍቱ ፖሊስ መምሪያ፤ አቶ ልደቱን ከእስር ሊለቅ አለመቻሉን ነው።

አቶ ልደቱ የፍርድ ቤቱ ውሳኔ አለመተግበሩ በፍትሕ ሥርዓቱ ላይ ተስፋ ስለመቁረጣቸው የገለጹት የኢዴፓ ሊቀመንበር አቶ አዳነ ታደሰ፤ “ፍርድ ቤቱ እንድለቀቅ ቢወስንም፤ ፖሊስ እንደማይለቀኝ አምናለሁና በዚሁ ልሰናበት” በማለት አቶ ልደቱ ለፍርድ ቤቱ ገልጸው እንደነበር አስታውሰዋል።

ለሦስተኛ ጊዜ የፍርድ ቤት ትእዛዝ ባለመቀበል አቶ ልደቱ በእስር እንዲቆዩ ያደረገው የደብረዘይት (ቢሾፍቱ) ፖሊስ መምሪያ ጉዳይ፤ “የፍርድ ቤት ትእዛዝ እንዴት አይከበርም? ፖሊስ ከሕግ በላይ መኾኑን ለማሳየት ነው?” የሚሉ ጥያቄዎች እያስነሳም ነው።

በዚሁ ጉዳይ ላይ የኢትዮጵያ ሰብአዊ መብት ኮሚሽንን ጨምሮ ጉዳዩን የሚከታተሉ አካላት፤ የፍርድ ቤት ትእዛዝን አለመቀበል፤ የፍትሕ ሥርዓቱን ጥያቄ ውስጥ ያስገባ በመኾኑ፤ የፍርድ ቤት ትእዛዝ ያለአንዳች ምክንያት መከበር እንዳለበት ማሳሰባቸው አይዘነጋም።

እንደ አቶ አዳነ እምነት በፍትሕ ሥርዓቱ የታየው ሒደት ከዚህ በኋላ አቤት የሚሉበት የሌላቸው ስለመኾኑ የሚያመለክት ስለኾነ፤ ጉዳዩ የፖለቲካ ውሳኔ የሚሻ ስለመኾኑ እስከመጠቆም ደርሰዋል።

አቶ ልደቱ ያልተፈቀደ የጦር መሣሪያ በመያዝ የተከሰሱ ሲሆን፤ ቀደም ብሎም ከአርቲስት ሐጫሉ ሁንዴሳ ግድያ በኋላ በደብረዘይት (ቢሾፍቱ) አመጽና ብጥብጥ ለመፍጠር በገንዘብ ጭምር ድጋፍ አድርገዋል በሚል ተጠርጥረው መታሰራቸው የሚታወስ ሲሆን፤ ለእስር ከተዳረጉም ከ80 ቀናት በላይ ኾኗቸዋል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!