Eskinder Nega

የባልደራስ ለእውነተኛ ዴሞክራሲ ፕሬዝዳንት አቶ እስክንድር ነጋ

“በቁጥጥር ሥር የዋለው በአዲስ አበባ ኹከትና ግጭት እንዲፈጠር በመቀስቀስ ተጠርጥሮ” ጠቅላይ ዓቃቤ ሕግ

ኢዛ (ረቡዕ ሰኔ ፳፬ ቀን ፳፻፲፪ ዓ.ም. July 1, 2020)፦ የአርቲትስት ሐጫሉ ሁንዴሳን ግድያ ተከትሎ በአዲስ አበባና በተለይም በኦሮሚያ ክልል በርካቶች እየታሰሩ ሲሆን፣ ዛሬ ረቡዕ ሰኔ 24 ቀን በአዲስ አበባ ከታሰሩት ውስጥ የባልደራስ ለእውነተኛ ዴሞክራሲ ፓርቲ ፕሬዝዳንት እስክንድር ነጋ መታሰሩ ተገለጸ።

ዛሬ ማምሻውን የፌዴራል ጠቅላይ ዓቃቤ ሕግ የድንበር ተሻጋሪ ወንጀሎች ጉዳዮች ዳይሬክተር የኾኑት አቶ ፈቃዱ ጸጋ ለኢትዮጵያ ቴሌቭዥን እንደገለጹት፤ እስክንድር የታሰረው “በአዲስ አበባ ኹከትና ግጭት እንዲፈጠር በመቀስቀስ ተጠርጥሮ” በቁጥጥር ሥር መዋሉን ተናግረዋል።

የፌዴራል ፖሊሶች እስክንድርን በቁጥጥር ሥር ያዋሉት በቢሮ ውስጥ እንዳለ መኾኑን መረጃዎች ይጠቁማሉ። እስክንድር የአዲስ አበባን ሕዝብ መብት ለማስከበር “ባልደራስ ለእውነተኛ ዴሞክራሲ ፓርቲ” የሚል ፓርቲ ማቋቋሙ የሚታወቅ ሲሆን፤ ከፓርቲው ምሥረታ በፊትና የፓርቲው ፕሬዝዳንት ከመኾኑ በፊት በሰብዓዊ መብት ተሟጋችነትና በጋዜጠኝነቱ ይታወቃል።

ከትናንት በስቲያ ሰኞ ሰኔ 22 ቀን ከምሽቱ ሦስት ሰዓት ተኩል ግድም ባልታወቁ ሰዎች በጥይት የተገደለውን አርቲስት ሐጫሉን ግድያ ተከትሎ በትናንትናው ዕለት (ሰኔ 23 ቀን 2012 ዓ.ም.) አስከሬኑን ከቤተሰቡ ላይ በመቀማት ወደ አዲስ አበባው የኦሮሚያ ብልጽግና ጽሕፈት ቤት የወሰዱትና በጃዋር መሐመድ ሲመራ ከነበሩት ቡድኖች ውስጥ አቶ ጃዋርን ጨምሮ 35 ሰዎች መታሰራቸውን መዘገባችን አይዘነጋም

በዕለቱ በብልጽግና ጽሕፈት ቤት አንድ የኦሮሚያ ልዩ ኃይል ፖሊስ ከእነ ጃዋር ወገን በተተኮስ ጥይት መገደሉን ፖሊስ ገልጿል። የኦፌኮው አቶ በቀለ ገርባም ከሴት ልጃቸውና ከሹፌራቸው ጋር መታሰራቸውም ተዘግቧል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!