Ethiopia Zare (ማክሰኞ ነሐሴ 19 ቀን 2001 ዓ.ም. August 25, 2009)፦ የመንግሥት የደህንነት ሰዎች፣ ካድሬዎችና የወረዳ ቀበሌ ሹማምንቶች፤ በአባላትና በደጋፊዎቻቸው ላይ ያልተቋረጠ የማወዋከብ ድርጊት እየፈጸሙ መሆኑን የኦሮሞ ፌደራሊስት ዲሞክራሲያዊ ንቅናቄ (ኦፌዲን) አስታወቀ።

 

የፓርቲው ዋና ፀሐፊ አቶ በቀለ ጅራታ እንደገለጹት “ኦፌዲን ማናቸውንም ህዝባዊ ተሣትፎ እንዳያደርግ የገዢው ፖርቲ አባል የሆነው ኦህዲድ እና የኦሮሞ ክልላዊ መንግሥት ታጣቂዎችና ካድሬዎች ያላቋረጠ የማዋከብ፣ የአፈናና የእስራት ተግባር በመፈጸም ላይ ናቸው” በማለት ተናግረዋል።

 

“አዲስ አበባ ወደሚገኘው ጽ/ቤታችን የሚመጡ የኦሮሚያ ክልል ነዋሪዎች በሙሉ ወከባ እየተፈጸመባቸው ነው፤ ይኸው ድርጊት ከቅርብ ጊዜ ወዲህ ተባብሶ ከመቀጠሉም በላይ ከእኛ ጋር መሆናቸው ከታወቀ ወደ ትውልድ አካባቢያቸው እንዳይመለሱ ተጽዕኖ ይደረግባቸዋል፤ የታሰሩም አሉ። በተለይ በምርጫ ብንሳተፍ ፓርቲያችን በህዝብ ዘንድ ተቀባይነትን ሊያገኝ የሚችልባቸውን ሰዎቻችንን ነው የመንግሥት የደህንነት ሰዎች በማጥቃት ላይ የሚገኙት ...” ሲል ኦፌዲን ገልጿል።

 

“ይህ ሁሉ የሚሆነው በ2002 ዓ.ም. ምርጫ ተሳትፎ እንዳናደርግና በዕጩ ተወዳዳሪነት የምናቀርበው አንድም ሰው እንዳይኖረን ለማድረግ ነው። በአጠቃላይ በኦፌዲን ላይ የበረታው ጫና በቀጣዩ ምርጫ የሚኖረንን የተሳትፎ ተስፋ አደብዝዞታል። ይህ ደግሞ ለመንግሥትም ይሁን ለሀገሪቱ የማይጠቅም ነው” ብለዋል አቶ በቀለ ጅራታ።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!