Ethiopia Zare (ሰኞ ሚያዝያ 18 ቀን 2002 ዓ.ም. April 26, 2010)፦ ግንቦት 15 ቀን 2002 ዓ.ም. የቀረው ጊዜ በቀናት የሚቆጠሩ ሲሆን፤ ገዥው ፓርቲና ተቃዋሚ ፓርቲዎች በተለያዩ ቦታዎች የምረጡኝ ቅስቀሳ ማድረጋቸውን ቀጥለዋል።

 

በኢህአዴግ በኩል ቤት ለቤት ሳይቀር የምረጡኝ ቅስቀሳ እየተደረገ ሲሆን፤ ዋና ተቀናቃኝ ነው የሚባልለትና ስምንት ፓርቲዎችን ያቀፈው መድረክም በአዲስ አበባ፣ በደሴና በወልዲያ የምርጫ ቅስቀሳውን አጠናክሯል። ኢዴፓና መኢአድም በየበኩላቸው የምረጡኝ ቅስቀሳቸውን እያከናወኑ መሆኑ ታውቋል።

 

የኢህአዲግ ደጋፊ መሆኑን የሚገልጸው የባህር ወርቅ መስመስ ህዝቦች ዴሞክራሲያዊ ድርጅት (ባወመህዴድ) ፓርቲ ደግሞ የምርጫ ምልክቱ በሬ መሆኑን አስታውቆ፤ ሚያዝያ 14 ቀን 2002 ዓ.ም. ለ15 ደቂቃ ያህል በኢትዮጵያ ቴሌቪዥንና ራዲዮ ድርጅት ባሰራጨው የምረጡኝ ቅስቀሳ “በሬውን ምረጡ! እንዳትረገጡ!” በማለት ቅስቀሳውን አሰምቷል።

 

ይኸው የፖለቲካ ተቋም አማራ የሆነው የመስመስ ህዝብ ወኪል ነኝ፤ በ13ኛው ክ/ዘመን ወደ ደቡብ ኢትዮጵያ ፈልሼ መኖር ከጀመርኩ ወዲህ ተረስቼ ቆይቼአለሁ፤ በዘመነ ኢህአዴግ ግን ማንነቴ ታውቋል፤ አሁን የምታገለውም ከሃዲያዎች ጭቆናና የበላይነት ራሴን ነፃ ለማውጣትና ማንነቴን ለማስመስከር ነው እንጂ ተቋሜ ኢህአዴግን የሚቃወምበት ምክንያት የለውም ሲል ለቅስቀሳ በተሰጠው የአየር ጊዜ ግልጽ አድርጓል። ከጥንትም “መስመስ አማራ ነው” የሚለው ባወመህዴድ፤ “በዘር የሚፈጸመውን ግፍና በደል የሚያስቆም፣ ጎጠኝነትን የሚቃወምና ለፍትሃዊነት የሚሠራ ነውና በሬን ምረጡ!” ሲል ድምፁን አሰምቷል።

 

በወረ-ኢሉ፣ በወረ-ይመኑ፣ በኩታ-በር፣ በደብረ-ብርሃን፣ በመሐል-ሜዳ፣ በደብረ-ታቦር፣ በባሕር-ዳር፣ ... ወዘተ በእያንዳንዱ ኢትዮጵያዊ አባ-ወራ መኖሪያ ቤት በር ላይ የንብ ዓርማ ያለው የኢህአዴግ የምረጡኝ ወረቀት ተለጥፎ መታየቱ የተገለጸ ሲሆን፤ ከፍ ሲል በተገለጹት አካባቢዎች አብዛኞቹ ተሸከርካሪዎች የንብ ዓርማን በዘመቻ መልክ ለጥፈው እንዲዘዋወሩ ገዥው ፓርቲ ከፍተኛ ጫና እያደረገ መሆኑን ለመረዳት ተችሏል።

 

ገዥው ፓርቲ ቤት ለቤት እየዞረ የሚያደርገው ተደጋጋሚ ቅስቀሳ አዲስ አበባ ከተማም ከሚያዝያ 14 ቀን ጀምሮ የቀጠለ ሲሆን፣ ከሦስቱ ሁለቱ መሣሪያ ባነገቡ የፌደራል ፖሊስ አባላት መንደር ለመንደር ሳይቀር ጥበቃ እየተደረገላት ነው። ፖሊስ በአዲስ አበባ ከተማ ጥበቃውን ያጠናከረው መንግሥት፤ የፌደራል ዐድማ በታኝ ኃይሎቹን የምርጫ 97 ቅዋሜ በታየባቸው መንደሮች ዐድማ በታኝ ኃይሎች የድንጋይ መመከቻ ጋሻ ይዘውና መከላከያ ቆብ ደፍተው በህዝቡ መሃል መታየት መጀመራቸው ተዘግቧል።

 

ኢህአዴግ ከዚህ በተጓዳኝ የቡና ጠጡ ፕሮግራም በማዘጋጀት በየቀበሌው የሚያደርገውን የምረጡኝ ቅስቀሳ አጧጡፏል። ተቃዋሚዎች በተለያዩ የሀገሪቱ ክፍል በመዘዋወር በሚጠሩት ህዝባዊ ስብሰባዎች በርካታ ሰዎች እየተገኙ ስኬታማ ድጋፍ በማግኘት ላይ መሆናቸውን እየገለጹ ሲሆን፤ መኢአድ በአዲስ አበባ፣ መድረክ በደሴ፣ ኢዴፓ በጎንደርና ባህር ዳር ብዛት ያለው ህዝብ በመሰብሰብ ህዝባዊ ድጋፍ ማግኘታቸውን አስታውቀዋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!