Ethiopia Zare (ኀሙስ የካቲት 27 ቀን 2000 ዓ.ም. March 6, 2008)፦ የሓዳር ጋዜጣ አሣታሚና ዋና አዘጋጅ የነበረው ጋዜጠኛ ዳዊት ከበደ ዛሬ ጠዋት በደህንነት ሰዎች ታፍኖ መወሰዱን የኢትዮጵያ ዛሬ ምንጭ አረጋገጠ።

 

ከምርጫ 97 ጋር በተያያዘ የፖለቲካ ውዝግብ ከሁለት ዓመታት በኋላ ከእስር የተለቀቀው ጋዜጠኛ ዳዊት ከበደ ከእስር እንደተፈታ ወደ ሙያው ለመሰማራትና ቀደም ሲል በአንባቢያን ከፍተኛ አድናቆትን ያተረፈችውን ሓዳር ጋዜጣን በድጋሚ እንዳያሳትም በመከልከሉ ምክንያት "አውራምባ ታይምስ" የተሰኘ አዲስ የጋዜጣ ፈቃድ እንዲያወጣ የተገደደ ሲሆን፣ አዲሱን ጋዜጣ ባሣተመበት ዕለት ጠዋት በቢሮው አቅራቢያ ከሚገኝ ካፍቴሪያ ሻሂ በመጠጣት ላይ እያለ በደህንነት ሰዎች ታፍኖ መወሰዱ ታውቋል።

 

ዳዊት ከበደን ከብዙ ፍለጋ በኋላ አመሻሹ ላይ 6ኛ ፖሊስ ጣቢያ እንደሚገኝ ተረጋግጧል። ለእስር የበቃበትን ምክንያት ይህን ዘገባ እስከተጠናቀረበት ጊዜ ድረስ ያልታወቀ ሲሆን፣ ዘመዶቹና የሥራ ባልደረቦቹ ለማየት የተከለከሉ መሆኑን ለመረዳት ችለናል።

 

ድርጊቱ ጋዜጠኞች በስጋት እንዲሰሩ ሆን ተብሎ የተቀናበረ ነው የሚሉ ታዛቢዎች፤ ከምርጫው በኋላ ሰሞኑን ብቅ ያሉ ደፋር ጋዜጠኞችን ለማስፈራራትና ለማስደንገጥ የታለመ ሳይሆን አይቀርም ብለዋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!